އެޗްއީއޯސީއަށް ވޮލަންޓިޔަރުން ހޯދަނީ
11 އޮކްޓޯބަރު 2021 | ހޯމަ 08:29މާލެ ސަރަހައްދުގައި ކުރެވޭ މަސައްކަތުގައި ވޮލަންޓިއަރުން ބޭނުންވޭ
ކޮވިޑާ ގުޅޭ މަސައްކަތްތައް ދަރުބާރުގޭގައި ކުރިއަށްދަނީ
ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އަށް ވޮލަންޓިޔަރުން ހޯދަން އިއުލާންކޮށްފިއެވެ.
ހެލްތް މިނިސްޓްރީން ވަނީއެޗްއީއޯސީއާއި އެ ސެންޓަރުގެ ދަށުން ގްރޭޓަރ މާލެ ސަރަހައްދުގައި ކުރެވޭ މަސައްކަތުގައި ވޮލަންޓިއަރުންގެ ގޮތުގައި މަސައްކަތް ކުރަން ބޭނުންވާ ފަރާތްތައް ހޯދުމަށް އިއުލާންކޮށްފައެވެ. އެގޮތުން ޝައުޤުވެރިވާ ފަރާތްތަކުގެ ދަފުތަރެއް އެކުލަވާލުމަށް އެ ސެންޓަރުން ނިންމާފައިވާއިރު، އެ ފަރާތްތަކަށް ޚާއްސަ ތަމްރީނު ވެސް ދެވޭނެކަމަށް އެޗްއީއޯސީން މައުލޫމާތު ދެއެވެ.
އެޗްއީއޯސީން މައުލޫމާތު ދޭ ގޮތުގައި ތަމްރީނު ޕްރޮގްރާމް ފުރިހަމަ ކުރާ ފަރާތްތަކުގެ ތެރެއިން އެ ވަގުތެއްގައި ހެލްތް އެމަޖެންސީ އޮޕަރޭޝަން ސެންޓަރުގައި ކުރަންޖެހޭ މަސައްކަތްތަކަށް ރިޔާއަތްކޮށް ވޮލަންޓިއަރުން ނަގަމުންދާނެއެވެ.
އެ ސެންޓަރުން ވަނީ ގްރޭޓަރ މާލެ ސަރަހައްދުގައި ކުރެވޭ މަސައްކަތުގައި ވޮލަންޓިއަރުންގެ ގޮތުގައި މަސައްކަތްކުރުމަށް ޝައުޤުވެރިކަން ހުރި ފަރާތްތަކުން އޮންލައިންކޮށް ހުށަހެޅުމަށް އެދިފައެވެ.
ކޮވިޑް-19އާ ގުޅިގެން ސަރުކާރުން ގެންދިޔައީ ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) ގެ ނަމުގައި ސެންޓަރެއް އުފައްދައިގެން މަސައްކަތް ކުރަމުންނެވެ. ނަމަވެސް މިދިޔަ އަހަރުގެ ޖުލައި މަހުގެ 1 ވަނަ ދުވަހު ސަރުކާރުން ވަނީ އެންއީއޯސީ އުވާލައި، އެތަނުގެ ދަށުން ކުރަމުންގެންދިޔަ މަސައްކަތްތައް އެޗްއީއޯސީގެ ދަށަށް ބަދަލުކޮށްފައެވެ. އެންއީއޯސީގެ މަސައްކަތްތައް އެޗްއީއޯސީއަށް ބަދަލު ކުރި ނަމަވެސް އެ ސެންޓަރުން ދެމުން އައި ޚިދުމަތްތައް އެއްވެސް ދަތިކަމެއް ނެތި ދެވޭނެ ކަމަށާއި، ސެންޓަރަށް ގެނައި ހަމަ އެކަނި ބަދަލަކީ އޮޕަރޭޝަން ކުޑަކޮށް، އިދާރީ ގޮތުން ހިންގުމަށް ގެނެސްފައިވާ ބަދަލުކަމަށް މިނިސްޓްރީން އޭރު ބުނެފައިވެއެވެ.
ކޮވިޑް-19 އާ ގުޅިގެން ގިނަ އިދާރާތަކެއް އެކުލެވޭ ގޮތަށް ސަރުކާރުން ދަަރުބާރުގޭގައި އެކުލަވާލި މި ސެންޓަރުން ދަނީ ކޮވިޑާ ގުޅިގެން ކުރަންޖެހޭ ކަންކަން ވިލަރެސް ކުރަމުންނެވެ.
