އައްޑޫ ސިޓީގެ ކަރަންޓަށް ދިމާވެފައިވާ މައްސަލައަށް މިއަހަރު ނިމުމުގެ ކުރިން ދާއިމީ ހައްލެއް ލިބޭނެ: ފެނަކަ އެމްޑީ

އައްޑޫ ސިޓީގެ ކަރަންޓަށް ދިމާވެފައިވާ މައްސަލައަށް ދާއިމީ ހައްލެއް މިއަހަރު ނިމުމުގެ ކުރިން ގެނެވޭނެކަމަށް ވަރަށް ބޮޑަށް އުންމީދުކުރައްވާކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަޙުމަދު ސަޢީދު މުޙައްމަދު ވިދާޅުވެއްޖެއެވެ.

ރާއްޖެ ޓީވިގެ "ފަލަސުރުޚީ" ޕްރޮގްރާމްގައި އައްޑޫ ސިޓީގެ ކަރަންޓްގެ މައްސަލައަށް ހައްލެއް އަންނާނީ ކޮންއިރަކުންތޯ ކުރި ސުވާލަށް ޖަވާބު ދެއްވަމުން ސައީދު ވިދާޅުވީ މިއަހަރުގެ ޑިސެމްބަރ ނިމުމުގެ ކުރިން އެމައްސަލަ ހައްލުވާނެކަމުގެ ވަރަށް ބޮޑު އުންމީދެއް އެބައޮތްކަމަށެވެ. ނަމަވެސް އެކަމުގެ ތަފްސީލެއް ނުދެއްވައެވެ.

އައްޑޫ ސިޓީގެ ގުޅިފައިވާ ރަށްތަކަށް އަންނަނީ ކަރަންޓް ކަނޑައިގެން ދިޔުމުގެ މައްސަލަ ތަކުރާރުކޮށް ދިމާވަމުންނެވެ. ކަރަންޓް ބޭނުންކުރާ މިންވަރު އިތުރުވެ ލޯޑް މަތިވާތީވެ ފެނަކައިން އަންނަނީ އައްޑޫ ސިޓީގެ އެކި ހިސާބުތަކުން ބައެއް ފަހަރު ކަރަންޓް ކަނޑަމުންނެވެ. 2017 ވަނަ އަހަރުން ފެށިގެން އަންނަނީ މިމައްސަލަ ކުރިމަތިވަމުންނެވެ. ފެނަކައިން ވަނީ މީގެކުރިން ކަރަންޓްގެ ޑިމާންޑް ބޮޑުވަމުންދާތީ ޖަނަރޭޓަރު އެކިފަހަރު މަތިން އެސިޓީއަށް ގެންގޮސްގެން އެމައްސަލަ ހައްލުކުރުމަށް މަސައްކަތްކޮށްފައެވެ.

ތަކުރާރުކޮށް ކަރަންޓް ކެނޑި މިކަމުގެ ސަބަބުން އާންމުން ގެންގުޅޭ އިލެކްޓްރޯނިކް ސާމާނު ހަލާކުވަމުންދާތީ ރައްޔިތުންގެ ޝަކުވާތައް ވަނީ އިތުރުވެފައެވެ. މީގެ އިތުރުން ފެން ލިބުމުގައި ދަތިވެ، ކޮންމެ ދުވަހަކު އެތައް ގަޑި އިރުތަކެއް ރައްޔިތުން އަނދިރީގައި އުޅެންޖެހޭ  ކަމަށް އެސިޓީގެ ރައްޔިތުން ބުނެއެވެ.