އަންހެނުން ގައުމު ބިނާކުރުމުގައި ދޭ އެއްބާރުލުން ގުނާ އަދަދު ނުކުރެވޭނެ: ރައީސްގެ އަނބިކަނބަލުން
ސުއިޒާ ފަދަ ޚިދުމަތްތެރި އަންހެން ބޭފުޅުންގެ މަސައްކަތްތައް ވެސް ފާހަގަކުރަން ޖެހޭ
ހޮނިހިރު ދުވަހު އޮތް ބައްދަލުކުރެއްވުމުގެ ތެރެއިން
އަންހެނުން ގައުމު ބިނާކުރުމުގައި ދޭ އެއްބާރުލުން ގުނާ އަދަދު ނުކުރެވޭނެ ކަމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙުމަދު ވިދާޅުވެއްޖެއެވެ.
ރައީސްގެ އަނބިކަނބަލުން ފަޒްނާ މިހެން ވިދާޅުވީ ރައީސް އިބްރާހީމް މުޙައްމަދު ސޯލިޙުގެ ދައުވަތަކަށް މިހާރު ރާއްޖެ ވަޑައިގެން އުޅުއްވާ, އދ.ގެ އާންމު މަޖިލީހުގެ 76 ވަނަ ސެޝަންގެ ރައީސް އަދި ރާއްޖޭގެ ފޮރިން މިނިސްޓަރ ނ.ޢ.ޢ.ވ ޢަބްދުﷲ ޝާހިދުގެ އަނބިކަނބަލުން ޢާއިޝަތު ސުއިޒާ، އެކަމަނާގެ އަރިހަށް ކުރެއްވި އިޙްތިރާމްގެ ޒިޔާރަތުގައެވެ.
މި ބައްދަލުކުރެއްވުން ބާއްވާފައި ވަނީ ހޮނިހިރު ދުވަހުގެ ހެނދުނު ރައީސުލްޖުމްހޫރިއްޔާގެ ރަސްމީގެކޮޅު، މުލިއާގޭގައެވެ.
މި ބައްދަލުވުމުގައި ފަޒްނާ ވަނީ ކޮންމެ ފަރުދަކަށް ނުވަތަ ގައުމަކަށް ލިބޭ ޝަރަފަކާއި ފަޚުރެއްގެ ފަހަތުގައި އެތައް ބައެއް, އަދި ޚާއްސަ ގޮތެއްގައި އެތައް އަންހެނެއްގެ ރޯލު ހިމެނޭނެކަން ފާހަގަކުރައްވާފައެވެ. އަދި، ދިވެހި ގައުމަށް ލިބުނު މި ޝަރަފާއި، އާންމު މަޖިލީހުގެ ރައީސްގެ ކާމިޔާބީގެ ފަހަތުގައިވާ އެއް ބޭފުޅަކީ އެމަނިކުފާނުގެ އަނބިކަނބަލުން ކަމުގައި ފާހަގަކުރައްވައި، ފަޒްނާ ވަނީ ދިވެހި އަންހެން ދަރިޔެއްގެ ހައިސިއްޔަތުން އެކަމާ އެކަމަނާ ފަޚުރުވެރިވެވަޑައިގަންނަވާ ކަމުގައި ވިދާޅުވެ، ސުއިޒާއަށް މަރުހަބާ ދަންނަވާފައެވެ. އަދި އދ.ގެ އާންމު މަޖިލީހުގެ 76 ވަނަ ސެޝަންގެ ރައީސްގެ ކާމިޔާބީ ފާހަގަކުރަމުންދާ ދަނޑިވަޅުގައި ސުއިޒާ ފަދަ ޚިދުމަތްތެރި އަންހެން ބޭފުޅުންގެ މަސައްކަތްތައް ވެސް ފާހަގަކުރަން ޖެހޭ ކަމަށް ފަޒްނާ ވިދާޅުވިއެވެ.
ފަޒްނާ ވިދާޅުވީ ގައުމު ބިނާ ކުރުމުގައި އަންހެނުންގެ ދައުރު އޮންނަނީ ހަމައެކަނި އޮފީސް މާހައުލުގައި ނޫންކަމަށާއި، ދިރިއުޅުމުގެ ވަކި ހިސާބަކުން ދެމަފިރިންކުރެ އެކަކު ގޭގައި ތިބެން އިޚްތިޔާރު ކުރާއިރު ގިނަ ފަހަރު އެކަން ކުރަނީ އަންހެނުން ކަމަށެވެ. އެގޮތުން، އަންހެނުން ގައުމު ބިނާކުރުމުގައި ދޭ އެއްބާރުލުން ގުނާ އަދަދު ނުކުރެވޭނެ ކަމަށް ފަޒްނާ ވިދާޅުވިއެވެ.
މީގެ އިތުރުން ފަޒްނާ ވަނީ އދ.ގެ އާންމު މަޖިލީހުގެ ރައީސްގެ އުންމީދީ ރިޔާސަތަށް ފުރިހަމަ ކާމިޔާބީއަކަށް އެދިވަޑައިގަންނަވާކަމަށާއި، ޚާއްސަކޮށް މުޅި ދުނިޔެ ކޮވިޑްގެ މި ހާލަތުން އަރައިގަތުމުގައާއި، އަންހެނުންނަށް ދިމާވާ ތަފާތު ކަންކަމަށް އިސްކަން ދެއްވައިގެން އަންހެނުން ބާރުވެރިކުރުވުމާއެކު އަންހެނުންގެ ހައްގުތައް ރައްކާތެރިވާނެ އުސޫލަކުން މަސައްކަތް ކުރައްވާނެކަމަށް އުންމީދުކުރައްވާ ކަމުގައި ވިދާޅުވިއެވެ.
އދ.ގެ އާންމު މަޖިލީހުގެ ރައީސްގެ އަނބިކަނބަލުންވަނީ ރައީސުލްޖުމްހޫރިއްޔާގެ އަނބިކަނބަލުން، އެކަމަނާއާ ބައްދަލުކޮށްލެއްވުމަށް ދައުވަތު ދެއްވީތީ އުފާކުރައްވާ ކަމަށް ވިދާޅުވެ ޝުކުރު އަދާކުރައްވާފައެވެ.
