1400 ކެމެރާ ހޯދުމަށް ޝަރުތު ހަމަނުވުމުން 200 ކެމެރާއަށް އަދަދު މަދުކޮށް އަލުން ބީލަމަށް ހުޅުވާލައިފި
9 އޮކްޓޯބަރު 2021 | ހޮނިހިރު 02:43ބީލަމުގައި ރަޖިސްޓްރީ ވެވޭނެ އެންމެ ފަހު ވަގުތަކީ 2021 އޮކްޓޯބަރ 19ގެ 16:00
އޮޕްރޭޝަން ބްލޫރޭ 2021
ކުރިން އިއުލާނުކޮށްފައިވާ ބޮޑީ ވޯން ކެމެރާގެ އަދަދު 1،400 އިން މަދުކޮށް 200 ކެމެރާ ހޯދުމަށް އިއުލާނުކޮށްފިއެވެ.
ދިވެހި ފުލުހުންގެ ޚިދުމަތުން ކެމެރާގެ އަދަދު މަދުކޮށް އަލުން އިއުލާނުކޮށްފައި ވަނީ ކުރިން ކޮށްފައިވާ އިއުލާނަށް ކުރިމަތިލީ ފަރާތްތަކުގެ ޝަރުުތު ހަމަ ނުވުމުންނެވެ.
ފްރަންޓްލައިންގައި މަސައްކަތްކުރާ ފުލުހުންނަށް 1400 "ބޮޑީ ވޯން ކެމެރާ" ނުވަތަ ގައިގާ ހަރުކުރާ ކެމެރާ ސަޕްލައި އަދި ޑެލިވަރީ ކޮށްދޭނެ ފަރާތެއް ހޯދަން އިއުލާނުކޮށްފައިވަނީ އޯގަސްޓު މަހުގެ އެއްވަނަ ދުވަހެވެ.
އަލުން 200 ކެމެރާ ހޯދުމަށް ކޮށްފައިވާ އިއުލާންގައި ބުނެފައިވަނީ ބީލަމުގައި ރަޖިސްޓްރީ ވެވޭނެ އެންމެ ފަހު ވަގުތަކީ 2021 އޮކްޓޯބަރ 19 ވަނަ ދުވަހުގެ 16:00 ކަމަށެވެ. ބީލަމަށް ރަޖިސްޓްރީ ކުރަން ދެވިފައިވާ ގަޑީގެ ފަހުން ލިބޭ އެއްވެސް ފޯރމެއް ބަލައި ނުގަނެވޭނެ ކަމަށްވެސް އިއުލާންގައި ބުނެފައިވެއެވެ. މިޕްރޮޖެކްޓާ ގުޅިގެން ޕްރީބިޑް ބައްދަލުވުމެއް ނޯންނާނެކަމަށްވެސް ފުލުހުން ބުނެއެވެ.
ބީލަން ހުޅުވުން އޮންނާނީ 2021 އޮކްޓޯބަރ 28 ވަނަ ދުވަހުގެ 13:30 ގައި އަމީނީމަގު، އިސްކަންދަރު ކޮށި 1 ގައެވެ.
ފުލުހުންގެ މަސައްކަތަށް ބޮޑީ ވޯން ކެމެރާ އިތުރުކޮށް، ޓެސްޓުކުރުމަށް މިދިޔަ އަހަރުގެ ފެބުރުއަރީ މަހު ވަނީ ޕައިލެޓް ޕްރޮގްރާމެއް ކުރިއަށް ގެންގޮސްފައެވެ. އޭރު ކޮމިޝަނާ އޮފް ޕޮލިސް، މުހައްމަދު ހަމީދު ވިދާޅުވީ ބޮޑީ ކެމެރާގެ ސަބަބުން ފުލުހުންގެ ހިދުމަތުގެ ފެންވަރު ރަނގަޅުކުރުމަށް އެހީވެދޭނެ ކަމަށެވެ. އެގޮތުން އާންމުންނާ މުއާމާލާތް ކުރުމާއި ފުލުހުންގެ މިސްކޮންޑަކްޓާއި ގުޅޭ ޝަކުވާތައް އަންނަ މިންވަރު މަދުކޮށް، ރައްޔިތުން ފުލުހުންނަށް ކުރާ އިތުބާރު ބޮޑުކޮށްދޭނެ ވަސީލަތެއްކަން ސާބިތުވެފައިވާކަން ހަމީދު ފާހަގަކުރެއްވިއެވެ.
ބޮޑީ ވޯން ކެމެރާއާ ގުޅޭ ގޮތުން މިނިސްޓަރ އޮފް ހޯމް އެފެއަރޒް އިމްރާން އަބްދުﷲ މީގެ ކުރިން ވިދާޅުވެފައިވަނީ ބޮޑީ ކެމެރާ ބޭނުން ކުރުމަކީ ޕޮލިސީ ލެވަލްގައި އެކަން ކުރަން ނިންމައި، ކެމެރާތައް ހޯދުމުގެ މަސައްކަތް ދިވެހި ފުލުހުންގެ ޚިދުމަތުން ކުރަމުންދާ ކަމެއް ކަމަށެވެ. އެގޮތުން 2020 ވަނަ އަހަރުގެ ޕެންޑަމިކާ ގުޅިގެން ބަޖެޓުން އެ ޚަރަދު ނުކުރެވުމާ ގުޅިގެން 2021 ވަނަ އަހަރުގެ ބަޖެޓުގައި އެކަން ހިމަނާފައިވާ ކަމަށް ވިދާޅުވިއެވެ.
