ފަހު ވަގުތު ބެލްޖިއަމް ބަލިކޮށް ފްރާންސް ފައިނަލަށް

ޔުއެފާ ނޭޝަންސް ލީގުގެ ސެމީ ފައިނަލުގައި ބުރާސްފަތި ދުވަހުގެރޭ ފަހު ވަގުތު ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމް ބަލިކޮށް ފައިނަލަށް ދުނިޔޭގެ ޗެމްޕިއަން ފްރާންސް ދަތުރުކޮށްފިއެވެ.

މި މުބާރާތުގެ ސެމީ ފައިނަލް މެޗުތަކާއި ފައިނަލް މެޗު އިޓަލީގައި ކުޅޭއިރު، ބުރާސްފަތި ދުވަހުގެރޭ ކުޅުނު މެޗުން ފްރާންސް މޮޅުވީ ފަހަތުން އަރައި 3-2 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ބެލްޖިއަމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 37 ވަނަ މިނެޓުގައި ޔަނިކް ކަރާސްކޯ ބެލްޖިއަމަށް ލީޑު ނަގައިދިންއިރު، އޭގެ ތިން މިނެޓު ފަހުން އެ ޓީމަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ ރޮމެލޫ ލުކާކޫއެވެ. މި ދެ ލަނޑު ޖަހަންވެސް ފުރުސަތު ތަނަވަސްކޮށްދިނީ ކެވިން ޑި ބްރޭނާއެވެ.

އެކަމަކު ދެވަނަ ހާފުގައި ކުޅުން ރަނގަޅުކޮށް ފްރާންސުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ 62 ވަނަ މިނެޓުގައި ކަރީމް ބެންޒެމާ ފްރާންސަށް ފަރަގު ކުޑަކޮށްދިންއިރު، އެ ޓީމަށް ނަތީޖާ އެއްވަރުކޮށްދިން ލަނޑު އޭގެ ހަތް މިނެޓު ފަހުން ލިބުނު ޕެނަލްޓީއަކުން ކާމިޔާބުކޮށްދިނީ ކީލިއަން އެމްބާޕޭއެވެ. މިއީ އޭރިއާ ތެރެއިން ފްރާންސްގެ އެންޓޮއިން ގްރީޒްމަނަށް ކުރި ފައުލަކަށް ދިން ޕެނަލްޓީއެކެވެ.

މި މެޗު ނިމެން ތިން މިނެޓަށް ވެފައި ވަނިކޮށް ލުކާކޫ ބެލްޖިއަމަށް ލަނޑެއް ޖަހައިދިން ނަމަވެސް، އޭނާ އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ. އެއާއެކު މެޗުގެ ފަހު މިނެޓުގައި ތިއޯ ހެނާންޑޭޒް ވަނީ ލަނޑެއް ޖަހައި، މި މެޗުން ފްރާންސް މޮޅުކޮށްދީފައެވެ.

މި މޮޅާއެކު މި ފަހަރުގެ ނޭޝަންސް ލީގުގެ ފައިނަލުގައި ފްރާންސް ބައްދަލުކުރަން ޖެހޭނީ ސްޕެއިނާއެވެ. މުބާރާތުގެ ފައިނަލަށް ސްޕެއިން ދަތުރުކުރީ ސެމީގައި 2-1 ގެ ނަތީޖާއަކުން އިޓަލީ ބަލިކުރުމަށްފަހުއެވެ.