ޕޮލިސް ބޯޑުން ވަކި ކުރަން ނިންމާފައިވާ ފުލުހުންގެ 7 އޮފިސަރުންގެ ތެރެއިން ފަސް އޮފިސަރުން ސިވިލް ކޯޓަށް މައްސަލަ ހުށަހަޅައިފިއެވެ.

ފުލުހުންގެ ގާނޫނަށް ގެނައި ބޮޑެތި އިސްލާހުތަކުގެ ތެރެއިން އެއް އިސްލާހަކީ ފުލުހުންގެ ބޯޑެއް އުފެއްދުމެވެ. މިބޯޑުން ފުލުހުންގެ ލީޑަރޝިޕްގައި ތިއްބަވަނީ ގާބިލް ބައެއްތޯ ކަށަވަރުކުރަންޖެހެއެވެ. އެގޮތުން އެގާނޫނަށް އަމަލުކުރަން ފަށާތާ 4 މަސް ދުވަހުގެ ތެރޭ ފުލުހުންގެ އިދާރާ އިސްލާހުކުރުމުގެ މަސައްކަތް ނިންމުމަށް ގާނޫނުގައި ބުނެފައިވެއެވެ. ގާނޫނުގައިވާ ގޮތުން ކޮމިޝަންޑް އޮފިސަރުންގެ ތެރެއިން ކޮމިޝަނަރ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުން، ފުލުހަކަށް ވީތީ އެމީހަކަށް ލިބިފައިވާ ގާނޫނީ ބާރާއި އިޚްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭތޯ ބޯޑުން ބަލަން ޖެހެއެވެ.

އެގޮތަށް އެ ބޯޑުން ކުރި މަސައްކަތުގައި 7 އޮފިސަރަކު މަގާމުން ވަކިކުރުމަށް ނިންމައި, ކޮމިޝަނަރ އޮފް ޕޮލިސް މުޙައްމަދު ހަމީދަށް, އެކަން ތަންފީޒުކުރުމަށް ފޮނުވާފައިވަނީ ނިމިގެންދިޔަ އޮގަސްޓްމަހުގެ 9 ވަނަ ދުވަހުއެވެ. މިހާތަނަށް އައިއިރު ސީޕީ ނިންމަވާފައިވަނީ އޭގެތެރެއިން ދެ އޮފިސަރަކު މަގާމުން ވަކިކުރުމަށެވެ. އެއީ އެސިސްޓެންޓް ޕޮލިސް ކޮމިޝަނަރ މުޙައްމަދު ޖަމްޝީދާއި އެސިސްޓެންޓް ކޮމިޝަނާ އަޙުމަދު މުހައްމަދު (ޓޫފޯ)އެވެ. އެ ދެ ބޭފުޅުން މަގާމުން ވަކިކުރުމުގެ އިޖުރާއަތްތައް ވަނީ ފަށާފައެވެ.

ފުލުހުންގެ އޮފިސަރުންތަކެއް މަގާމުން ވަކިކުރަން ނިންމުމާއި ގުޅިގެން އެ ދެ ބޭފުޅުންވެސް ހިމެނޭ ގޮތަށް ސިވިލް ކޯޓަށް 5 އޮފިސަރުންގެ ފަރާތުން ވަނީ މައްސަލަ ހުށަހަޅުއްވާފައެވެ. ދެން މިމައްސަލަ ހުށަހަޅުއްވާފައިވާ ތިން އޮފިސަރުންނަކީ ސުޕްރިންޓެންޑެންޓް އޮފް ޕޮލިސް އިސްމާޢީލް ޝަމީމް އާދަމް އާއި ޗީފް ސުޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް އަދި ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ދާއޫދުއެވެ.

އެ މައްސަލައާ ގުޅޭ ގޮތުން 5 އޮފިސަރުން ތަމްސީލުކުރާ ދިވެހި ޗެމްބަރސްއިން ނެރުނު ބަޔާނެއްގައި ބުނެފައިވަނީ, އެ އޮފިސަރުންކުރެ އެއްވެސް އޮފިސަރަކަށް އަމިއްލަ ދިފާއުގައި ބަސްބުނުމަށާއި، ޖަވާބުދާރީވުމުގެ ފުރުސަތު ލިބިފައިނުވާ ކަމަށެވެ.

އެކަމުގެ ސަބަބުން އޮފިސަރުންގެ ދުސްތޫރީ އަދި ގާނޫނީ ހައްގުތަކެއް ގެއްލިފައިވާކަން ބަޔާނުގައި ވަކީލުން ފާހަގަ ކޮށްފައިވެއެވެ. ސިވިލް ކޯޓަށް ހުށަހެޅީ އެ ސަބަބާއި ފިޔަވަޅު އެޅުމުގައި ގާނޫނީ ގޮތުން ބޮޑެތި ފުށުއެރުންތަކެއް އިޖުރާއީ ގޮތުން ވެސް ހުރުމާއެކު ކަމަށް ބަޔާނުގައިވެއެވެ.

މިމައްސަލަ މިހާރު ވަނީ ސިވިލް ކޯޓުން ބަލައިގަނެފައިކަމަށްވެސް ވަކީލުންގެ ބަޔާނުގައި ބުނެފައިވެއެވެ.

މީގެއިތުރުން ވަކީލުން ވަނީ މި މައްސަލާގައި ވަގުތީ އަމުރަކަށްވެސް އެދިފައެވެ. އެގޮތުން ޝަރީއަތުން ގޮތެއް ކަނޑައެޅުމުގެ ކުރިން އޮފިސަރުން ވަޒީފާއިން ވަކިކުރުމާގުޅޭ އެއްވެސް ކަމެއް ނުކުރުމަށާއި، ވަޒީފާ އަދާކުރުމުގެ ހައްގަށް ހުރަސްއެޅިދާނެ އެއްވެސް ކަމެއް ނުކުރުމަށް ފުލުހުންގެ އިދާރާއަށާއި ފުލުހުންގެ ބޯޑުގެ މައްޗަށް އަމުރުކޮށްދިނުމަށް އެދިފައިވެއެވެ.

ސިވިލް ކޯޓަށް މައްސަލަ ހުށަހެޅުމުގައި ބާކީ ތިބި ދެ އޮފިސަރުންކަމުގައިވާ އެސިސްޓެންޓް ކޮމިޝަނާ ފަރުހާދު ފިކުރީ އާއި ޗީފް ސުޕްރިންޓެންޑެންޓް އަޙުމަދު ޝުހާދު ބައިވެރިއެއް ނުވެއެވެ.

ފުލުހުންގެ ބޯޑުން އޮފިސަރުންތަކެއް ވަކިކުރަން ނިންމި މައްސަލާގައި ދާދިފަހުން ރައްޔިތުންގެ މަޖިލީހުގައި ހޯމް މިނިސްޓަރާއި ޢިމްރާން ޢަބްދުﷲއާ ކުރެވުނު ސުވާލުތަކަށް ޖަވާބު ދެއްވަމުން ވިދާޅުވެފައިވަނީ ޕޮލިސް ބޯޑުން ކަންކޮށްފައިވަނީ ގާނޫނާއި އެއްގޮތަށް ކަމަށާއި އެކަމުގެ ތެރެއަށް ސިޔާސީ އެއްވެސް ނުފޫޒެއް ފޯރުވާފައިނުވާނެކަމަށެވެ. ފުލުހުންގެ ބޯޑުން ނިންމާ ނިންމުން އަންގަންވީ ފަރާތް ގާނޫނުގައި ބަޔާންކޮށްފައިވާއިރު, ބޯޑުން އެކަން ކޮށްފައިވަނީ އެގޮތަށް ކަމަށާއި، ބޯޑުގެ ނިންމުން މިހާތަނަށް ވެސް މިނިސްޓަރާ ހިއްސާ ކޮށްފައި ނުވާ ކަމަށް ވެސް ވިދާޅުވިއެވެ. ބޯޑުގެ ނިންމުމުގައި މިނިސްޓަރުގެ ދައުރެއް ނެތް ކަމަށް ތަކުރާރުކޮށް ވިދާޅުވިއެވެ.