ފަންނާނުންގެ ހައްގުގައި މިވަގުުވެސް ގިނަ މަސައްކަތްތަކެއް ކުރަމުންދާކަމަށް ހެރިޓޭޖް މިނިސްޓަރ ޔުމްނާ މައުމޫން ވިދާޅުވެއްޖެއެވެ.

މިނިސްޓަރ މިހެން ވިދާޅުވީ އަބުޑީ މޯލްޑިވްސްގެ ފަރާތުން ކުރިއަށްގެންދިޔަ, ރޮދިން ކުރެހުމުގެ ކޯހުގެ ބައިވެރިންނަށް ސަނަދު ދިނުމުގެ ހަފްލާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

މިނިސްޓަރ ވިދާޅުވީ ފަންނުވެރިކަން ކުރިއެރުވުމަކީ މި ސަރުކާރުގެ މުހިންމު ސިޔާސަތެއް ކަމަށެވެ. މި ސަރުކާރުން ފަންނާއި ތަރިކައިގެ މިނިސްޓްރީގެ އުފެއްދީ ފަންނާއި ސަގާފީ ތަރިކަ ރައްކާތެރިކޮށް މިފަދަ ފަންނުތައް ދިރުވައި އާލާކުރުމަށް ކަމަށް މިނިސްޓަރ ވިދާޅުވިއެވެ.

އެހެންކަމަށްވާއިރު، މި ފަންނުތައް ކުރިއަރުވަން މިނިސްޓްރީއާއި، ނެޝަނަލް ސެންޓަރ ފޯރ އާރޓްސްގެ ފަރާތުން މިވަގުތުވެސް ގިނަ މަސައްކަތްތަކެއް ކުރަމުންދާކަން މިނިސްޓަރ ފާހަގަކުރެއްވިއެވެ. އެގޮތުން މިފަދަ ކޯސްތައް ކުރިއަށްގެންދިއުމުގައި އެހީތެރިކަން ފޯރުކޮށްދިނުމާއި، އާރޓް ގެލަރީއާއި އޮލިމްޕަސް މަރާމާތުކުރުމާއި، އާރޓިސްޓުންގެ ހައްގުތައް ރައްކާތެރިކުރުމަށް ބިލެއް އެކުލަވާލުމުގެ މަސައްކަތްވެސް ކުރަމުންދާކަމަށް ވިދާޅުވިއެވެ. އާރޓިސްޓުންގެ ރެޖިސްޓްރީއެއްވެސް މިހާރު ހެދިފައިވާނެ ކަމަށާއި، އާރޓިސްޓުންގެ ޑައިރެކްޓްރީއެއް ހެދުމުގެ މަސައްކަތް މިހާރު ފެށިފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ތަފާތު އީޖާދީ ފަންނުވެރި މަސައްކަތްތަކަށް ރާއްޖޭގައިވެސް ޑިމާންޑު އޮތް ކަން މިހާރު މިވަނީ ހާމަވެފައި ކަމަށެވެ. ތަފާތު ފަންނުތައް ދިރުވަން އަމިއްލަ ފަރާތްތަކުން އިސްނަގައިގެން މަސައްކަތްކުރުން އިތުރުވާނެ ކަމަށް އުންމީދުކުރައްވާކަމަށް މިނިސްޓަރ ޔުމްނާ ވިދާޅުވިއެވެ.

މިފަދަ މަސައްކަތްތައްކުރާ އަމިއްލަ ފަރާތްތަކާއި ޖަމިއްޔާ ޖަމާއަތްތަކާއި، ކައުންސިލްތަކާއި ގުޅިގެން މިފަދަ ފަންނުތައް ކުރިއަރުވަން މަސައްކަތްކުރައްވާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.

އަބުޑީ މޯލްޑިވްސްއާއި އެންސީއޭ ގުޅިގެން ކުރިއަށްގެންދިޔަ ރޮދިން ކުރެހުމުގެ ކޯސް ފުރިހަމަކުރި 41 ދަރިވަރަކާ ސަނަދު ހަވާލުކޮށްފައިވެއެވެ.

މި ރަސްމިއްޔާތުގައި މިނިސްޓަރ ޔުމްނާގެ އިތުރުން އެމްއެމްއޭގެ ގަވަރުނަރު ޢަލީ ހާޝިމްވެސް ބައިވެރިވެވަޑައިގެންނެވިއެވެ.