ބޮޑުކޮށް މުސާރަ ދެވުނު މީހުންގެ ތެރެއިން 32 މީހެއްގެ އަތުން އެ ފައިސާ އަނބުރާ ލިބިފައިނުވާކަމަށް ފިނޭންސް މިނިސްޓްރީން ބުނެފިއެވެ.
އޮގަސްޓު މަހުގެ މުސާރަ ދިންއިރު ސިއްހީ ދާއިރާގެ 1،796 މުވައްޒަފެއްގެ މުސާރަ ބޮޑުކޮށް ވަނީ ދެވިފައެވެ. އިތުރަށް ދެވުނު ފައިސާ އަނބުރާ ހޯދުމުގެ މަސައްކަތް ފިނޭންސް މިނިސްޓްރީން ކުރަމުން ދާއިރު މިކަމާގުޅިގެން ރާއްޖެއެމްވީން ކުރި ސުވާލަކަށް ޖަވާބުދެއްވަމުން ފިނޭންސް މިނިސްޓްރީގެ މީޑިއާ އޮފިޝަލް މުޙައްމަދު ޝަނޫން ވިދާޅުވީ އެ ފައިސާ އަނބުރާ ހޯދުމުގެ މަސައްކަތް އަދިވެސް ކުރިއަށްދާކަމަށެވެ.
އެފައިސާ އަނބުރާ ދީފައި ނުވަނީ 32 މީހެއް ކަމަށް ޝަނޫން ވިދާޅުވިއެވެ. ޝަނޫން ވިދާޅުވީ އެމީހުންގެ މުސާރައިން އެ ބައި އުނިކުރަމުން ދާނެ ކަމަށާއި, އެބައި އަނބުރާ ހޯދާނެ ކަމަށެވެ.
މިކަމާއި ގުޅިގެން ފިނޭންސް މިނިސްޓްރީން މީގެ ކުރިން ބުނެފައިވަނީ މުވައްޒަފުންނަށް މުސާރައިގެ ގޮތުގައި ދޭންޖެހޭ އަދަދަށްވުރެ އިތުރަށް މުސާރަ ދެވުނީ މުސާރަ ޝީޓްގެ އަދަދުތައް އިސްފަސްވުމުގެ ސަބަބުން ކަމަށެވެ.
އެ މައްސަލަ ފާހަގަ ކުރެވުމާއެކު ކަމާގުޅޭ އިދާރާތަކާ ގުޅިގެން އެ ފައިސާ އަނބުރާ ހޯދުމުގެ މަސައްކަތް ފަށާފައިވާ ކަމަށް ފިނޭންސްއިން ބުނެފައިވެއެވެ. އަދި ދައުލަތުގެ މާލިއްޔަތުގެ ގަވާއިދުގައިވާ ގޮތުގެ މަތިން މުސާރަ އުނިވެފައިވާ ފަރާތްތަކަށް އެ ފައިސާ ދިނުމާއި އިތުރަށް ދެވިފައިވާ ފައިސާ އަނބުރާ ހޯދުމުގެ މަސައްކަތް ކުރަމުންދާ ކަމަށް ބުނެފައިވެއެވެ. ކުރިއަށްއޮތްތަނުގައި މިފަދަ މައްސަލައެއް ދިމާނުވާނެކަމަށް ފިނޭންސުން ބުނެފައިވެއެވެ.
