އަތޮޅުތެރޭގައި މަސައްކަތްކުރާ ސިއްހީ ދާއިރާގެ ހުރިހާ މުވައްޒަފުންނަށް މިރޭ މުސާރަ ޖަމާވެ ނިމޭނެ ކަމަށް ފިނޭންސް މިނިސްޓްރީން ބުނެފިއެވެ.
ރާއްޖެ އެމްވީން ކުރި ސުވާލަކަށް ޖަވާބުދެއްވަމުން ފިނޭންސް މިނިސްޓްރީގެ މީޑިއާ އޮފިޝަލް މުހައްމަދު ޝަނޫން ވިދާޅުވީ އަތޮޅުތެރޭގައި ސިއްހީ ދާއިރާގައި މަސައްކަތްކުރާ މުވައްޒަފުންގެ ތެރެއިން މުސާރަ ޖަމާނުވަނީ ބައެއް މުވައްޒަފުންނަށް ކަމަށެވެ. އެ މުވައްޒަފުންގެ މުސާރަ މިރޭ ޖަމާވާނެ ކަމަށް އޭނާ ވިދާޅުވިއެވެ.
ޝަނޫން ވިދާޅުވީ މީގެ ކުރިން އަތޮޅުތެރޭގެ ހުރިހާ މުވައްޒަފުންގެ މުސާރަ ޝީޓުތައް ފޮނުވާފައިވަނީ އެކްސެލް ޝީޓެއްގައި ކަމަށެވެ. މިމަހުން ފެށިގެން މިކަން ކުރަމުންދަނީ ސިސްޓަމްގެ ތެރެއިން ބަނޑޭރި ޕޯޓަލުން މިކަން ކުރާ ގޮތަށް ކަމަށް ޝަނޫން ވިދާޅުވިއެވެ.
މުވައްޒަފުންގެ މައުލޫމާތުތައް ސިސްޓަމަށް އަޅާނީ އޮފީސްތަކުން ކަމަށް ޝަނޫން ވިދާޅުވިއެވެ. ބައެއް މުވައްޒަފުންނަށް މުސާރަ ޖަމާވުން ލަސްވެފައިވަނީ މި މައުލޫމާތުތައް ސިސްޓަމަށް އެޅުމުގެ ތެރޭގައި ދިމާވި ބައެއް މައްސަލަތަކުގެ ސަބަބުން ކަމަށް ޝަނޫން ވިދާޅުވިއެވެ.
އާންމުކޮށް ސަރުކާރު މުވައްޒަފުންގެ މުސާރަ މަސް ނިމުމުގެ ކުރިން ޖަމާވެއެވެ. އެހެންނަމަވެސް މިމަހު ސަރުކާރު މުވައްޒަފުންގެ ތެރެއިން އަތޮޅުތެރޭގެ ސިއްހީ މުވައްޒަފުންގެ މުސާރަ ޖަމާނުވެ ލަސްވާތީ މުވައްޒަފުން ގެންދަނީ ކަންބޮޑުވުން ފާޅުކުރަމުންނެވެ.
