ސަފާރީ އަޑިއަށް ދިޔަ ހާދިސާގެ ތަހުގީގު ކުރިއަށްދާ ކަަމަށް ފުލުހުން ބުނެފިއެވެ.

ރާއްޖެއެމްވީއަށް ފުލުހުން ބުނީ މި ހާދިސާގެ ތަހުގީގު ކުރިއަށްދާ ކަަމަށާއި ސަފާރީ އަޑިއަށް ދިޔައީ ކީއްވެގެންތޯ ބެލުމުގެ މަސައްކަތް ތަހުގީގުގެ ތެރެއިން ކުރިއަށްދާ ކަމަށެވެ. އެހެންކަމުން މިވަގުތު އިތުރު މައުލޫމާތު ދެވެން ނެތް ކަމަށް ވެސް ބުންޏެވެ.

މިދިޔަ މަހުގެ 26 ވަނަ ދުވަހު މި ސަފާރީ އަޑިއަށް ގޮސްފައިވާއިރު ސަފާރީން މާލެ ގެނައި އެކަކު ވަނީ މަރުވެފައެވެ. ނިޔާވެފައިވަނީ އުމުރުން 41 އަހަރުގެ ބިދޭސީ ފިރިހެނެކެވެ. މި ހާދިސާއާ ގުޅިގެން ޖުމްލަ ހަތް މީހުން ހޮސްޕިޓަލަށް ގެނެސް ފަރުވާދީފައިވާއިރު އެ ސަފާރީން ޖުމްލަ 17 މީހުން ދަތުރުކުރިއެވެ. ހާދިސާގެ ރިޕޯޓް ލިބިފައިވަނީ އާދިއްތަ ދުވަހުގެ 08:39 ހާއިރު ކަމަށް އެމްއެންޑީއެފުން ވަނީ ބުނެފައެވެ.

ސަފާރީ އަޑިއަށް ދިޔައީ ބޮލިފުށި ކައިރިން ފުރައިގެން މާލެއަށް ދަތުރުކުރަމުން ދަނިކޮށެވެ. ފުލުހުން ބުނީ މައުލޫމާތު އާންމު ނުކުރިނަމަވެސް ކަނޑުމަތީގެ ހާދިސާތައް މިގޮތަށް ހިނގުމުން ތަހުގީގު ނިންމައި، އެކަމެއްގައި މީހެއްގެ އިހުމާލެއްވާނަމަ ފިޔަވަޅު އެޅުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާ ކަމަށެވެ.