ސަރުކާރުގެ ހުރިހާ ވުޒާރާއަކުން ވެސް މީހުން ބިނާކުރުމަށް ބޭނުންވާ ދާއިރާތައްވަނީ ހޯދިފައި - މިނިސްޓަރ ޑރ. ހަސަން
މި ސަރުކާރުގެ ފުރަތަމަ 100 ދުވަހުގެ ތެރޭގައި މުޅި ރާއްޖޭގެ ޓްރެއިނިންގ ނީޑްސްތައް އައިޑެންޓިފައިކޮށްފައި
ޑރ. އިބްރާހީމް ހަސަން - ހަޔަރ އެޑިއުކޭޝަން މިިނިސްޓަރ
ސަރުކާރުގެ ހުރިހާ ވުޒާރާއަކުން ވެސް މީހުން ބިނާކުރުމަށް ބޭނުންވާ ދާއިރާތައް ހޯދާފައިވާކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގެ ތިމަރަފުށީ ދާއިރަގެ މެމްބަރު އަބްދުއްﷲ ރިޔާޒު ކުރެއްވި ސުވާލަކަށް މަޖިލީހުގެ ތަޅުމުގައި ޖަވާބު ދެއްވަމުންނެވެ. މިނިސްޓަރ ހަސަން ވިދާޅުވީ، މީހުން ބިނާކުރުމަށް ބޭނުންވާ ތަފާތު އެކިއެކި ދާއިރާތައް ދެނެގަނެ، އެ ދާއިރާތަކުން މީހުން ބިނާކުރުމަށް ޓަކައި ކުރެވޭ މަސައްކަތްތައް މި ދަނީ ފުޅާކުރައްވަމުން ކަމަށެވެ. އެގޮތުން މި ސަރުކާރުގެ ފުރަތަމަ 100 ދުވަހުގެ ތެރޭގައި މުޅި ރާއްޖޭގެ ޓްރެއިނިންގ ނީޑްސްތައް އައިޑެންޓިފައިކޮށްފައިވާ ކަމަށެވެ. އަދި ދާދި ފަހުން ސަރުކާރުގެ ހުރިހާ ވުޒާރާއަކުން ވެސް މީހުން ބިނާކުރުމަށް ބޭނުންވާ ދާއިރާތައް ހޯދާފައިވާކަން މިނިސްޓަރ ފާހަގަ ކުރެއްވިއެވެ.
ޑޭޓާތައް ލިބުމުން މުސްތަޤުބަލުގައި ސަރުކާރުން ސްޓޫޑަންޓް ލޯނު ދޭއިރުގައި ވެސް، ސްކޮލަރިޝިޕްތައް ދޭއިރު ވެސް ރާއްޖެއަށް އެންމެ މީހުން ބޭނުންވާ ދާއިރާތަކަށް އަމާޒުކޮށްގެން ކުރިއަށްދާނެކަން މިނިސްޓަރ ފާހަގަކުރެއްވިއެވެ. އޭރުން ޓީޗަރުން ވެސް، ޑޮކްޓަރުން ވެސް އަދި ނަރުހުން ވެސް ބިނާކުރުމަށް ޓަކައި ކުރެވޭ މަސައްކަތްތަކަށް ރަނގަޅު ނަތީޖާއެއް ލިބިގެންދާނެ ކަމަށް ވިދާޅުވިއެވެ. މި ފަހަކަށްއައިސް ވަކި ދާއިރާތަކަށް ޚާއްޞަކޮށްގެން ސްކޮލަރޝިޕްތައް އިޢުލާންކޮށްފައި ވާނެ ކަން ފާހަގަކުރައްވަމުން މިނިސްޓަރ ވިދާޅުވީ، އެގޮތަށް އެކަން ކުރީ އެ ދާއިރާތަކަށް މީހުން ބިނާކުރުމުގެ ބޭނުން ބޮޑުވާތީއާއި، އޭގެ އިމްޕެކްޓް އަންނަލެއް ބޮޑުވާނެ ކަމަށް ފެންނާތީ ކަމަށެވެ. މިހާރު ކުރައްވާ މަސައްކަތަކީ، ކުރިން ކުރާ މަސައްކަތަށް ވުރެ ބޮޑަށް ވަކި އަމާޒަކަށް ކުރައްވާ މަސައްކަތެއް ކަމަށާއި، ކުރިއަށް އޮތް ދުވަސްތަކުގައި އޭގެ ނަތީޖާ ފެންނާނެ ކަމަށް ވިދާޅުވިއެވެ.
އެއްވެސް ކައުސިލަކުން ވަކި ދާއިރާއެއްގެ ކޯހެއް ހިންގަން ބޭނުންވާނަމަ މިނިސްޓްރީން އެ ފުރުސަތު ވެސް ފަހި ކޮށްދިނުމަށް މަސައްކަތް ކުރައްވާ ކަމުގައި ވިދާޅުވިއެވެ.
