ގަތަރުގެ ވޯޓުގައި އަންހެން ކެންޑިޑޭޓުންނަށް ނާކާމިޔާބީ
އަންހެން 28 ކެންޑިޑޭޓަކު ކުރިމަތިލާފައިވޭ
ގަތަރުގެ ޝޫރާ ކައުންސިލް ވޯޓު ގުނުމުގެ މަސައްކަތް ކުރިޔަށްދަނީ
ގަތަރުގެ ޝޫރާ ކައުންސިލަށް މެމްބަރުން ހޮވުމަށް ނެގި ވޯޓުން އެއްވެސް އަންހެން ކެންޑިޑޭޓަކު ނުހޮވި ނާކާމިޔާބީއާ ކުރިމަތިލާން ޖެހިއްޖެއެވެ.
30 މެމްބަރުން ހޮވަންޖެހޭ މި ކައުންސިލަށް 28 އަންހެން ކެންޑިޑޭޓަކު ކުރިމަތިލާފައި ވީނަމަސް 30 ގޮނޑިއަށްވެސް ހޮވިފައިވަނީ ފިރިހެން ބޭފުޅުންނެވެ. މިހެން ކަމުން އެގައުމުގެ އަމީރަށް ލިބިގެންވާ ޚާއްސަ ބާރުގެ ދަށުން އައްޔަން ކުރާ އިތުރު 15 ގޮނޑިއަށް ގެންނަވާނީ ކޮން ބޭފުޅުންނެއްކަން އަންދާޒާކޮށްލެވޭ ކަމަށް އެގައުމުގެ ސިޔާސީ މާހިރުން ބުނެއެވެ.
މުޅިއަކު 233 ކެންޑިޑޭޓުން ކުރިމަތިލާފައިވާއިރު އޭގެ ތެރެއިން އެންމެ ފަހު ވަގުތު 101 ކެންޑިޑޭޓަކު ވަނީ ކެންޑިޑެސީ ދޫކޮށް ފަހަތަށް ޖެހިފައެވެ. ގިނަ ކެންޑިޑޭޓުންނަށް ކާމިޔާބު ނުވާނޭ ކަމުގެ ޔަގީންކަން ލިބުމާއިއެކު ވަނީ ކެންޑިޑެސީ ދޫކޮށް ހޮވޭނެކަމަށް ޔަގީންވި ކެންޑިޑޭޓުންގެ ފަހަތަށް އަރާފައެވެ.
ޝޫރާ ކައުންސިލަކީ ގާނޫނު ހުށަހަޅާ، ބަޖެޓު އެކުލަވާލާ އަދި މިނިސްޓަރުން ހޮވުމުގެ ބާރު ދީފައިވާ 45 މެމްބަރުންގެ މައްޗައް އުފެދިފައި އޮންނަ ކައުންސިލެކެވެ.
