ޖަރުމަން ލީގުގައި ހޮނިހިރު ދުވަހުގެރޭ އޯގްސްބާގް ބަލިކޮށް ތާވަލުގެ ދެވަނައަށް ބޮރޫޝިއާ ޑޯޓްމުންޑް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޑޯޓްމުންޑް މޮޅުވީ 2-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ޑޯޓްމުންޑުންނެވެ. މެޗު ފަށައިގެން 10 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ރަފައެލް ގުއެރެއިރޯއެވެ. މިއީ އޭރިއާ ތެރެއިން ޑޯޓްމުންޑުގެ ޑޮންޔެލް މާލެންއަށް އޯގްސްބާގުގެ ޖެފެރީ ގޯވެލެއު ކުރި ފައުލަކަށް ރެފުރީ ދިން ޕެނަލްޓީއެކެވެ.

އެކަމަކު މެޗުގެ 35 ވަނަ މިނެޓުގައި އޯގްސްބާގުން ވަނީ ނަތީޖާ އެއްވަރުކޮށްފައެވެ. އޭރިއާ ތެރެއިން ލިބުނު ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ބްރައިޓަނުގެ ލޯނު އެއްބަސްވުމެއްގެ ދަށުން ކުޅެމުން އަންނަ އަންޑީ ޒެކީރީއެވެ.

އެކަމަކު ދެވަނަ ހާފު ފަށައިގެން ހަވަނަ މިނެޓުގައި ޑޯޓްމުންޑުން ވަނީ މި މެޗުގައި އަލުން ލީޑު ނަގާފައެވެ. ކެޕްޓަން މާކޯ ރެއުސްގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ޔޫލިއަން ބްރަންޓެވެ. އަދި އޭގެ ހަ މިނެޓު ފަހުން ލީޑު ފުޅާކުރަން އޭރިއާ ތެރެއިން ރެއުސްއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

މި މޮޅާއެކު ތާވަލުގެ ދެވަނައަށް ޑޯޓްމުންޑް ޖެހިލީ ކުޅުނު ހަތް މެޗުން ލިބުނު 15 ޕޮއިންޓާއެކުއެވެ. ތާވަލުގެ ތިންވަނައިގައި އޮތް ފްރެއިބާގަށްވެސް ހަތް މެޗުން 15 ޕޮއިންޓް ލިބިފައިވާއިރު، އެއްވަނައިގައި އޮތީ ހަ މެޗުން 16 ޕޮއިންޓް ހަމަކޮށްފައިވާ އެންމެ ފަހުގެ ޗެމްޕިއަން ބަޔާން މިއުނިކެވެ.