ކުރިއަށް އޮތް ތިން އަހަރަށް ކްރިކެޓް ބޯޑް އޮފް މޯލްޑިވްސް (ސީބީއެމް) ގެ މީޑިއާ ޕާޓްނަރަކަށް ރާއްޖެޓީވީ ހަމަޖައްސައިފިއެވެ.
ކްރިކެޓް ބޯޑުގެ މީޑިއާ ޕާޓްނަރަކަށް ރާއްޖެޓީވީ ހަމަޖެއްސުމަށް އެއްބަސްވީ ހޮނިހިރު ދުވަހުގެ ހަވީރު ސޯލްޓް ކެފޭގައި ބޭއްވި ރަސްމިއްޔާތުގައެވެ. މި އެއްބަސްވުމުގައި ރާއްޖެޓީވީގެ ފަރާތުން ހެޑް އޮފް ސްޕޯޓްސް ހުސެއިން ފަރިޔާޒް ސޮއިކުރެއްވިއިރު، ކްރިކެޓް ބޯޑުގެ ފަރާތުން އެއްބަސްވުމުގައި ސޮއިކުރެއްވީ އެ ބޯޑުގެ ރައީސް މުޙައްމަދު ފައިސަލެވެ.
އެއްބަސްވުމުގައި ސޮއިކުރެއްވުމަށްފަހު ދެއްވި އިންޓަވިއުއެއްގައި ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒް ވިދާޅުވީ މި ސަރަހައްދަށް ބަލާއިރު ކްރިކެޓަކީ އެއް ނަންބަރު ކުޅިވަރު ކަމަށާއި، އެކަމަކު އެ ފެންވަރަށް ރާއްޖޭގެ ކްރިކެޓް ނުދިޔަ ނަމަވެސް، ކްރިކެޓް ކުރިއަރުވަން ކްރިކެޓް ބޯޑުން ވަރަށް ގިނަ މަސައްކަތްތަކެއް ކުރަމުން ގެންދާކަން ފާހަގަކޮށްލެވޭ ކަމަށެވެ. އެހެންކަމުން އެ މަސައްކަތްތައް އެއްބާރުލުންދިނުމަށް ކްރިކެޓް ބޯޑާއެކުގައި ރާއްޖެޓީވީން ވަރަށް ގިނަ މަސައްކަތްތަކެއް ކުރާނެ ކަމަށްވެސް ވިދާޅުވިއެވެ.
ހޮނިހިރު ދުވަހު ބޭއްވި ރަސްމިއްޔާތުގައި ކްރިކެޓް ބޯޑުގެ މީޑިއާ ޕާޓްނަރަކަށް ރާއްޖެޓީވީ ހަމަޖެއްސިއިރު، މި ރަސްމިއްޔާތުގައި ވަނީ އެ ބޯޑުގެ އެހެނިހެން ޕާޓްނަރުންނާއެކުވެސް އެއްބަސްވުމުގައި ސޮއިކޮށްފައެވެ. އެގޮތުން ކްރިކެޓް ބޯޑުން ވަނީ ރާއްޖޭގެ ކުޅިވަރަށް އަބަދަށްފެހި "މައިލޯ" އާއެކުވެސް އެއްބަސްވުމުގައި ސޮއިކޮށްފައެވެ. މި އެއްބަސްވުމުގެ ދަށުން ރާއްޖޭގެ ކްރިކެޓް ކުރިއެރުވުމަށް މައިލޯއާއެކު އެ ބޯޑުން މަސައްކަތްކުރާނެއެވެ.
މީގެ އިތުރުން ކްރިކެޓް ބޯޑުގެ މީޑިއާ ޕާޓްނަރެއްގެ ގޮތުގައި ރާއްޖެޓީވީގެ އިތުރުން ރާއްޖޭގެ އޮންލައިން ނޫސް "އަދަދު" ވެސް ވަނީ ހަމަޖައްސާފައެވެ.
ކްރިކެޓް ބޯޑުން ޕާޓްނަރުންނާއެކު ސޮއިކުރިއިރު، މިދިޔަ ސެޕްޓެމްބަރު މަހު ބޭއްވި އަހަރީ އާންމު ޖަލްސާގައި ފައިސަލް ވަނީ ކްރިކެޓް ބޯޑުން 2030 ވަނަ އަހަރަށް އަމާޒުކޮށް ދުރުރާސްތާ ޕްލޭނެއް ހަދާނެ ކަމަށް ވިދާޅުވެފައެވެ.
ހޮނިހިރު ދުވަހު ބޭއްވި ރަސްމިއްޔާތަށްފަހު "ރާއްޖެ.އެމްވީ" އަށް ދެއްވި އިންޓަވިއުއެއްގައި ފައިސަލް ވިދާޅުވީ ބޭނުމަކީ ހުރިހާ އެންމެން ބައިވެރިކޮށްގެން ޕްލޭނެއް ހެދުން ކަމަށާއި، އެގޮތުން އެންމެ ގުޅިގެން ރަނގަޅު ޕްލޭނެއް ހެދިއްޖެ ނަމަ، ކްރިކެޓް ކުރިއަރާނެ ކަމުގެ ޔަގީންކަން އެބައޮތް ކަމަށެވެ. އަދި ކްރިކެޓުގައި ހަރަކާތްތެރިވާ އެންމެންގެވެސް އަމާޒަކީ ރަނގަޅު ކުޅުންތެރިންތަކެއް އުފެއްދައި، ބައިނަލްއަގުވާމީ މައިދާނުގައި ރަނގަޅު ކާމިޔާބީއެއް ހޯދުން ކަމަށާއި، އެހެންކަމުން އެކަންކަން ހާސިލުކުރުމަށް އެންމެން އެއްބަސްވެވޭ ޕްލޭނެއް ހެދިއްޖެނަމަ، އެކަމުގެ ފައިދާ ކްރިކެޓަށް ކުރާނެ ކަމަށްވެސް ވިދާޅުވިއެވެ.
ކްރިކެޓް ބޯޑުގެ ރައީސަކަށް ފައިސަލް އިންތިޚާބުވެވަޑައިގަތީ މިދިޔަ އަހަރުގެ ސެޕްޓެމްބަރު މަހު ބޭއްވި އިންތިޚާބު ކާމިޔާބުކުރެއްވުމަށްފަހުއެވެ. މީގެ ކުރިން އެ ބޯޑުގެ ނައިބު ރައީސްކަމާއި ޖެނެރަލް ސެކްރެޓަރީކަންވެސް ކުރެއްވި ފައިސަލް އެ އިދާރާއާ ހަވާލުވެވަޑައިގެން އެންމެ ފުރަތަމަ ކުރެއްވި މަސައްކަތްތަކުގެ ތެރޭގައި ކްރިކެޓް ބޯޑުގެ ހިންގާ ކޮމިޓީން ކުރިއަށް އޮތް ހަތަރު އަހަރުގެ މަސައްކަތްތައް ބައްޓަންކުރާނެ ގޮތްތަކެއް ކަނޑައެޅުމަށް "ޕްލޭން 120" ގެ ނަމުގައި ކުރު މުއްދަތުގެ ޕްލޭނެއް އެކުލަވާލުން ހިމެނެއެވެ.
