ހިޔާ ފްލެޓުތަކުގެ ކުލި ކުޑަކޮށްދިނުމަށް އެދި ތިންވަނަ ފަހަރަށް ރައީސް އޮފީހަށް ހުށަހަޅައިފި
ކުއްޔަކީ މަހަކު 7,500 ރުފިޔާ، ފުލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު 1,000 ރުފިޔާ ނަގާނެ
ހިޔާ މަޝްރޫއުގެ ފްލެޓްތައް
ހިޔާ މަޝްރޫއުގެ ފްލެޓްތަކަށް މަހަކު ދައްކަން ޖެހޭ ކުލި ކުޑަކޮށް ދިނުމަށް އެދި ތިންވަނަ ފަހަރަށް ރައީސް އޮފީހަށް ހުށަހަޅާފައިވާ ކަމަށް މާލޭގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ހިޔާ ފްލެޓްތަކުގެ ކުއްޔަކީ މަހަކު 7,500 ރުފިޔާއެވެ. އަދި ފުލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު 1,000 ރުފިޔާ ނަގާނެއެވެ. ފްލެޓްތަކަށް ފައިސާ ދައްކާ ޚަލާސް ކުރަން ޖެހޭނީ 25 އަހަރުގެ މުއްދަތަށް ބަހާލައިގެންނެވެ. ކުލި ބޮޑުވުމާއި ގުޅިގެން ފްލެޓު ލިބުނު މީހުން ދަނީ އެކަމާއި ކަންބޮޑުވުންފާޅު ކުރަމުންނެވެ. އަދި ފްލެޓްގެ ފިނިޝިން މަސައްކަތް ކުރަން ޖެހުމާއެކު އަތުން ވަރަށް ބޮޑު ހަރަދެއް ހޭދަވާ ކަމަށް އެމީހުން ބުނެއެވެ.
މިމައްސަލައާ ގުޅިގެން މޭޔަރު މުއިއްޒު ވިދާޅުވީ ހިޔާ މަޝްރޫއުގެ ފްލެޓްތަކަށް މަހަކު ދައްކަންޖެހޭ އަދަދު 5600އަށްވުރެ ކުޑަކޮށް ދިނުމަށް އެދި 3 ވަނަ ފަހަރަށް ރައީސް އޮފީހަށް ނިމިދިޔަ ހަފުތާގައި ސިޓީ ފޮނުވާފައިވާނެ ކަމަށެވެ. އަދި ފިނިޝިން މަސައްކަތަށް މަދުވެގެން 9 މަސް ދުވަސް ދިނުމަށް ތަކުރާރުކޮށް އެދިފައިވާ ކަމަށް ވިދާޅުވިއެވެ.
ހިޔާ ފްލެޓުތަކުގެ ކުލީގެ މައްސަލަ ބޮޑުވެފައިވާއިރު، ރައްޔިތުންގެ މަޖިލީހަށް ހިޔާ ފްލެޓާ ގުޅިގެން ހުށަހަޅާފައިވާ ޕެޓިޝަނުގައި މައިގަނޑު 3 ކަމަކަށް ޑިމާންޑް ކޮށްފައިވެއެވެ. އެގޮތުން ފްލެޓްގެ ކުލި 5،600 އަށް ކުޑަކުރުމާއި، ފްލެޓްގެ ފިނިޝިންއަށް ދީފައިވާ މުއްދަތު 12 މަސްދުވަހަށް އިތުރުކޮށް ދިނުމާއި، ފްލެޓްގެ ޖުމްލަ ކުލިން އެއްލައްކަ ރުފިޔާ ކުޑަކުރުމަށް ވަނީ ޕެޓިޝަނުގައި ޑިމާންޑްކޮށްފައެވެ.
މި ޕެޓިޝަނާ ގުޅޭ ގޮތުން ކަމާ ގުޅުންހުރި އިދާރާ ތަކާއެކު ބޭއްވި ބައްދަލުވުމުގައި ސަރުކާރުން ސަބްސިޑައިޒް ކޮށްގެންވެސް 5000 ރުފިޔާއަށް ހިޔާ ފްލެޓްގެ ކުލި ކުޑަ ކޮށްދިނުމަށް ހޯރަފުށި ދާއިރާގެ މެމްބަރު އަހުމަދު ސަލީމް ގޮވާލައްވާފައިވެއެވެ.
މެމްބަރު ސަލީމް ވިދާޅުވީ، މިކަހަލަ ކުޑަ ކޮށްޓަކަށް ވަންނައިރު 5000 ރުފިޔާ އެއީ ބޮޑު އަދަދެއް ކަމަށެވެ. އަތުން އެތައް ޚަރަދެއް ކޮށްފައި 5000 ރުފިޔާ ކުއްޔަށް ދައްކަން ބޮޑު ކަމަށާއި، މިފަދަ ބޮޑު ދެރައެއް ރައްޔިތުންނަށް ދޭއިރު ސަރުކާރުން ކޮންމެވެސް ކަމެއް ކުރަން ޖެހޭ ކަމަށެވެ.
ކަން ހިގާފައި އޮތް ގޮތް ތަހުގީގު ކުރުމަށް ތަހުގީގު އިދާރާތަކަށް ދޫކޮށްލުމަށްފަހު، އިތުރު ފައިސާ ސަރުކާރުން ލާފައި ނަަމަވެސް 5000ށް އެތަނުގެ ކުލި ކުޑަ ކުރުމަށް އޮތީ ކޮން ހުރަހެއްތޯ މެމްބަރު ސަލީމް ވަނީ ސުވާލު އުފައްދަވާފައެވެ. މެމްބަރު ސަލީމް ވިދާޅުވީ، ތަހުގީގު އިދާރާތައް މިއަދު އޮތީ ފެއިލް ވެފައި ކަމަށާއި، ބޭނުން ގޮތަކަށް ލޯނު ނަގާ ޚަރަދު ކޮށްފައިވާކަން ފެންނަން އެބައޮތް ކަމަށެވެ. ކޮންމެ އެޕާރޓްމެންޓެއް ނިންމިިއިރު އަގަށްވުރެ އެތައް ގުނައެއް ކޮންމެ ޔުނިޓަކުން އިތުރުވެފައިވާ ކަމަށާއި، މި މަޝްރޫއުގައި ޚިޔާނާތް އެބައޮތްކަމަށް މެމްބަރު ސަލީމް ވިދާޅުވިއެވެ. އަދި ތަހުގީގު އިދާރާތައް ފެއިލްވެފައިވާތީ، އެކަމުގެ ފައިދާ ނަގަނީ ކަމަށް ވިދާޅުވިއެވެ.
އާއްމު ރައްޔިތުން ކުލި ކުޑަކުރުމަށް ޑިމާންޑް ކުރި ނަމަވެސް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވީ، މިހާރުވެސް ޑިސްކައުޓެއް ދެވިފައިވާ ކަމަށާއި، ފިނިޝިންއަށް ދީފައި އޮތް އެއް އަހަރަށް ދިގު ދަންމާލައިފި ނަމަ އެތަނުގައި ދިރުއުޅޭ ރައްޔިތުން އުޅޭނީ ވަރަށް ދަތި ހާލުގައި ކަމަށެވެ. މަޝްރޫއަށް ނަގާފައިވާ ލޯނު ދެއްކޭނީ އެންމެ ކުޑަކޮށްވެސް 8500 ރުފިޔާ ކުއްޔަށް ނަގައިގެން ކަމަށް ސުހައިލް ވިދާޅުވިއެވެ.
