ގޮހޮރުގައި އުފެދުނު ޓިއުމަރެއް ނެގުމަށް ކުރި އޮޕަރޭޝަނަށްފަހު ބްރެޒިލުގެ ލެޖެންޑް ޕެލޭ ހޮސްޕިޓަލުން ދޫކޮށްލައިފިއެވެ.

އުމުރުން މިހާރު 80 އަހަރުގެ ޕެލޭގެ ގޮހޮރުގައި ޓިއުމަރެއް އުފެދުމާއެކު މިދިޔަ ސެޕްޓެމްބަރު މަހުގެ ހަތަރުވަނަ ދުވަހު ވަނީ ސައު ޕައުލޯގެ އަލްބަޓް އެއިންސްޓައިން ހޮސްޕިޓަލުގައި ޚާއްސަ އޮޕަރޭޝަނެއް ކޮށްފައެވެ. އެ އޮޕަރޭޝަނަށްފަހު 10 ދުވަސް ވަންދެން ޕެލޭ ކެއާ ޔުނިޓުގައި ބޭއްވިއިރު، އޭނާ ހޮސްޕިޓަލުން ދޫކޮށްލާފައިވަނީ ހުކުރު ދުވަހުގެ ވަގުތެއްގައެވެ.

ހޮސްޕިޓަލުން ދޫކޮށްލުމުން ފޭސްބުކްގައި ހިއްސާކުރި ޕޯސްޓެއްގައި ޕެލޭ ބުނީ އެނބުރި ގެއަށް އާދެވުމުން އުފާވާ ކަމަށެވެ. އަދި އޭނާއަށް ފަރުވާދިން އަލްބަޓް އެއިންސްޓައިން ހޮސްޕިޓަލުގެ ޓީމަށް ވަރަށް ޚާއްސަ ޝުކުރެއް އަދާކުރަން ބޭނުންވާ ކަމަށާއި، އަދި އޭނާއަށް ހިތްވަރުދީ މެސެޖުކުރި އެންމެނަށްވެސް ޚާއްސަ ޝުކުރެއް އަދާކުރަން ބޭނުންވާ ކަމަށްވެސް ޕެލޭ ބުންޏެވެ.

ގޮހޮރުގައި އުފެދުނު ޓިއުމަރެއް ނަގަން ދާދި ފަހުން ޕެލޭ އޮޕަރޭޝަނެއް ކުރިއިރު، އޭނާ ވަނީ މީގެ ކުރިން 2015 ވަނަ އަހަރުވެސް ބޮޑު އޮޕަރޭޝަނެއް ކޮށްފައެވެ. އަދި އެއަށްފަހު އޭނާގެ ހާލަތު ގޯސްވާތީ އެކި ފަހަރު މަތިން ވަނީ ހޮސްޕިޓަލުގައި އެޑްމިޓުކޮށްގެންވެސް ފަރުވާ ދީފައެވެ. އޭގެ ތެރޭގައި ގޮހޮރުގެ އެކި ބަލިތަކަށްވެސް ވަނީ ތަކުރާރުކޮށް ފަރުވާ ހޯދާފައެވެ.

ދުނިޔޭގައި އުފެދުނު އެންމެ މޮޅު ކުޅުންތެރިޔާގެ ގޮތުގައި ފާހަގަކޮށްލެވޭ ޕެލޭގެ ކެރިއަރުގެ އެންމެ ބޮޑު އުސްއައްޔަކީ ބްރެޒިލާއެކު ފީފާ ވޯލްޑް ކަޕް ތިން ފަހަރު ކާމިޔާބުކުރުމެވެ. އެއާއެކު ޕެލޭ ވެފައިވަނީ ވޯލްޑް ކަޕް ތިން ފަހަރަށް ކާމިޔާބުކުރި ހަމައެކަނި ކުޅުންތެރިޔާއަށެވެ. މީގެ އިތުރުން ޕެލޭ ވަނީ ތަފާތު ހަތަރު ވޯލްޑް ކަޕެއްގައި ލަނޑު ޖަހާފައެވެ.

ބްރެޒިލަށް އެންމެ ގިނަ ލަނޑު ޖެހުމުގެ ރިކޯޑުވެސް އޮންނަ ޕެލޭ ވަނީ ބްރެޒިލް ޓީމަށް ކުޅެދިން 92 މެޗުން 77 ލަނޑު ޖަހާފައެވެ. އަދި ތަފާސް ހިސާބުތައް ދައްކާގޮތުން ކެރިއަރުގައި ކުޅުނު 1،363 މެޗުގައި ޕެލޭ ވަނީ 1،279 ލަނޑު ޖަހާފައެވެ.