ދިރާގަކީ ހަމައެކަނި މުވާސަލާތީ އަދި ޑިޖިޓަލް ޚިދުމަތް ފޯރުކޮށްދޭ ކުންފުންޏެއް ނޫން!

ޒަމާނީ މުއާސަލާތުގެ ފަސޭހަކަން ދިވެހިރާއްޖެއަށް އިހްސާސްކުރެވެން ފެށީ މީގެ ތިރީހަކަށް އަހަރު ކުރިންނެވެ. އޭގެ ކުރިން ދިވެހިރާއްޖޭގެ މުއާސަލާތީ ޚިދުމަތް ހުރީ ވަރަށް އާދައިގެ ގޮތެއްގަ އެވެ. ވަރަށް ވެސް ޅަފަތުގަ އެވެ. މާލޭގެ ވަރަށް މަދުގެއެއްގައި ނޫނީ ފޯނެއް ނުހުރެއެވެ. އަމުދުން ރަށްރަށުގައި މުއާސަލާތީ ޚިދުމަތެއް ނުހުރެއެވެ. އެންމެ ބޮޑުވަރަކަށް ވެސް އޮންނަނީ ވޯކީ ޓޯކީއެކެވެ.

މިހާރު ދޯނިފަހަރުގެ ކެޔޮޅު އަތުގައި ވެސް ޓެބްލެޓެއް ނުވަތަ ސްމާޓް ފޯނެއް އޮންނައިރު، މާކަނޑުގެ މެދުގައި އާއިލާއާއި ރަހުމަތްތެރިންނާއެކު މުއާސަލާތު ކުރަމުން ދިއުމުގެ ފަސޭހަކަން ލިބުނުލެއް ބޮޑުކަމުން، މީގެ ކުރީގެ ހަދަންތައް ފިލައިދިޔަ ފަދައެވެ.

މިހާރު އަތުގައި އޮންނަނީ ސްމާޓް ފޯނެވެ. އާންމު ދިރިއުޅުމާއި ވިޔަފާރި އަދި ތައުލީމުގެ ވެސް އެންމެ މުހިންމު ބައިވެރިއަކީ މިހާރު މޯބައިލް ފޯނެވެ. މިހިސާބަށް ދިވެހިން ތަރައްގީކޮށް ދިނުމުގެ ހަގީގީ ބައިވެރިއަކީ، އެ ކުންފުންޏަކަށް 33 އަހަރު ފުރޭ ދިވެހިރާއްޖޭގެ ގުޅުން (ދިރާގު) އެވެ. ދިރާގަކީ ޓެލެކޮމިއުނިކޭޝަނާއި ޑިޖިޓަލް ސާވިސް ދިވެހިރާއްޖޭގައި ދެމުންދާ އެންމެ ވަރުގަދަ ކުންފުންޏެވެ. ދިރާގު އުފެދިގެން އައީ މީގެ 33 އަހަރު ކުރިން، ދިވެހި ސަރުކާރާއި އިނގިރޭސި ވިލާތުގެ ކޭބަލް އެންޑް ވަޔަލެސްއާ ދެމެދު ގާއިމުކުރެވުނު ޖޮއިންޓް ވެންޗަރ ކުންފުންޏެއްގެ ގޮތުގައެވެ. 1988 ވަނަ އަހަރު އުފެއްދި ދިރާގުގައި އޮތް ކޭބަލް އެންޑް ވަޔަލެސްގެ ހިއްސާ 2013 ވަނަ އަހަރު ބަހުރެއިން ޓެލެކޮމިއުނިކޭޝަން ކޮމްޕެނީ (ބެޓެލްކޯ) އަށް ވިއްކައިލިއެވެ.

މި ޖަޒީރާ ރާއްޖޭގައި ޓެލެކޮމިއުނިކޭޝަން ޚިދުމަތް ދިނުމަކީ ވަރަށް ބޮޑެތި ގޮންޖެހުންތަކެއް ކުރިމަތިވި ކަމެކެވެ. ނަމަވެސް، ދިރާގު އުފެދިގެން ގާތްގަނޑަކަށް 10 ވަރަކަށް އަހަރު ދުވަހުގެ ތެރޭގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ޓެލެފޯނުގެ ޚިދުމަތް ފޯރުކޮށް ދެވުނެވެ. މިކަމުގައި ކުރިމަތިވި ގޮންޖެހުންތައް މިހާރުގެ ޖީލުގެ ކުދިންނަށް އިހްސާސްކުރުމަކީ ފަސޭހަ ކަމަކަށް ނުވާނެ އެވެ. ސަރުކާރުގެ ސިޔާސަތާއި ދިރާގުގެ ބޯޑުގެ ތަސައްވުރާ އެއްގޮތަށް މި މަޝްރޫއު ކާމިޔާބު ކުރެވުނީ ދިރާގުގެ ހީވާގި މުވައްޒަފުންގެ މަސައްކަތުންނެވެ.

ދިރާގަށް 33 އަހަރު ފުރުން ފާހަގަކުރަމުންދާއިރު ދިރާގަކީ ހަމައެކަނި މުވާސަލާތީ އަދި ޑިޖިޓަލް ޚިދުމަތް ފޯރުކޮށްދޭ ކުންފުންޏެއް ނޫނެވެ. ދިރާގަކީ ރާއްޖޭގައި ހަރަކާތްތެރިވާ ވިޔަފާރި ކުންފުނިތަކުގެ ތެރެއިން އިޖުތިމާއީ ކަންކަމަށް އެންމެ ބޮޑު އިސްކަމެއްދޭ އެއް ކުންފުންޏެވެ. އެގޮތުން، ދިރާގުގެ އިޖުތިމާއީ ޒިންމާ ނުވަތަ ސީއެސްއާރްގެ ދަށުން ކުޑަކުދިންނާއި ޒުވާނުން ބާރުވެރިކުރުމަށް ގިނަ ގުނަ މަސައްކަތްތަކެއް ދަނީ ކުރަމުންނެވެ. މީގެ އިތުރުން ތިމާވެށި ހިމާޔަތް ކުރުމާއި އެއްފަހަރު ބޭނުން ކުރާ ޕްލާސްޓިކާ ދެކޮޅަށް އަމަލީ ގޮތުން ފިޔަވަޅު އަޅައި، މުވައްޒަފުންނާއި އާންމުންނަށް އަމާޒުކޮށް ހޭލުންތެރި ކުރުމުގެ ޕްރޮގުރާމެއް އެންމެ ފުރަތަމަ ފެށި ކުންފުންޏަކީވެސް ދިރާގެވެ. އެގޮތުން މިހާރުވެސް ދިރާގުން ޕްލާސްޓިކާ ދެކޮޅަށް ދަނީ ކެމްޕެއިނެއް ކުރިއަށް ގެންދެއެވެ.

ދިރާގަށް 33 އަހަރު ފުރުމުގެ މުނާސަބަތާއި ގުޅިގެން ދިރާގުގެ ސީއީއޯ އަދި މެނޭޖިން ޑިރެކްޓަރ އިސްމާއިލް ރަޝީދު ވިދާޅުވީ ކުންފުންޏަށް ލިބުނު ކާމިޔާބީގެ އަސްލަކީ ކަސްޓަމަރުން ދެއްވާ ތަރުހީބު ކަމަށެވެ. އަދި ކުންފުނީގެ މުވައްޒަފުންގެ އަގު ވަޒަންކުރައްވާ ވަނީ ޝުކުރު އަދާކުރައްވާފައެވެ.

ދިރާގަކީ ރާއްޖޭގެ ތަރައްގީގެ އެންމެ މުހިންމު އެއް ބައިވެރިއާއެވެ. ދިރާގުގެ ކުރިއެރުމާއި ކާމިޔާބީ ފެނިގެން ދަނީ އެ ކުންފުނީގެ ބެލެންސް ޝީޓާއި ހިއްސާދާރުންނަށް ބަހާ ޑިވިޑެންގެ މިންވަރުން އެކަންޏެއް ނޫނެވެ. އެ ކުންފުނީގެ އިޖުތިމާއީ ޒިންމާގެ ތެރެއިން، މުޖުތަމައުގެ ތަފާތު ދާއިރާތަކަށް ދިރާގުން އެހީތެރިކަން ފޯރުކޮށްދެ އެވެ. ދިރާގުގެ ނަން ނުފެންނަ ތަނެއް ނެތެވެ.