މެލޭޝިއާގެ ޔުނިވަރސިޓީ އިސްލާމް އަންޓަރަބަންގްސާއާއެކު އައިޔޫއެމުން އެއްބަސްވުމެއްގައި ސޮއިކޮށްފި
ދެ ޔުނިވަރސިޓީގެ ދެމުގައި އެކި ދާއިރާތަކުން އެހީތެރިކަން ފޯރުކޮށްދިނުމަށް ވަނީ ނިންމާފައި
ެއެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް)އާއި މެލޭޝިއާގެ ޔުނިވަރސިޓީ އިސްލާމް އަންޓަރަބަންގްސާ ސެލަންގޯއާއެކު މެމޮރަންޑަމް އޮފް އަންޑަސްޓޭންޑިންއެއްގައި ސޮއިކޮށްފިއެވެ.
ބުދަ ދުވަހު ދިވެހިރާއްޖޭގެ އިސްލާމީ ޔުނިވަރސިޓީގައި ބޭއްވި ރަސްމިއްޔާތުގައި މި އެމްއޯޔޫގައި އައިޔޫއެމްގެ ފަރާތުން ސޮއިކުރެއްވީ ވައިސް ޗަންސެލަރ ޑރ. އިބްރާހީމް ޒަކަރިއްޔާ މޫސާ އެވެ. އަދި ޔުނިވަރސިޓީ އިސްލާމް އަންޓަރަބަންގްސާ ސެލަންގޯ ފަރާތުން ސޮއިކުރެއްވީ އެ ޔުނިވަރސިޓީގެ ރެކްޓަރ ޕްރޮފެސަރ ޑަޓޯ ޑރ. އަބް ހަލީމް ބިން ތަމުރީ އެވެ.
މި އެއްބަސްވުމުގެ ދަށުން ދެ ޔުނިވަރސިޓީގެ ދެމުގައި އެކި ދާއިރާތަކުން އެހީތެރިކަން ފޯރުކޮށްދިނުމަށް ވަނީ ނިންމާފައެވެ. ވަކިން ޚާއްސަކޮށް އިލްމީ ކަންކަމާއި، ތަމްރީނާއި ދިރާސާތައް ކުރުމުގެ ދާއިރާގައި އެހީތެރިކަން ފޯރުކޮށް ދިނުން ހިމެނެއެވެ. އަދި މި ފަހުމުނާމާގެ ބައިވެރިންގެ ދެ ފަރާތުގެ މަސްލަހަތަށް ރިއާޔަތް ކުރުމާއެކު، އެއްބާރުލުމާއި އެހީތެރިކަން ދޭނެ އާންމު ދާއިރާތައް ވެސް ހިމެނެއެވެ.
އޭގެ ތެރޭގައި އިސްލާމިކް ބޭންކިންގ އެންޑް ފައިނޭންސް އަދި ސޯޝަލް ފައިނޭންސްގެ ދާއިރާއިން އެކިއެކި ސެމިނަރ، ވެބިނަރ އަދި ކޮންފަރެންސް ބައްދަލުވުންތައް ބޭއްވުމާއި، އިސްލާމިކް ބޭންކިންގ އެންޑް ފައިނޭންސް އަދި ސޯޝަލް ފައިނޭންސްގެ ދާއިރާއިން އެކިއެކި ރިސަރޗް ހަރަކާތްތައް ހިންގުމާއި، އިސްލާމިކް ބޭންކިންގ އެންޑް ފައިނޭންސް އަދި ސޯޝަލް ފައިނޭންސްގެ ދާއިރާ އިތުރަށް ފުޅާވެ ކުރިއެރުމަށް މަގުފަހިވެގެންދިއުމާއި، ކުރު މުއްދަތުގެ ކޯސްތައް ހިންގުމާއި، މޯބައިލިޓީ ޕްރޮގްރާމްސްތައް ދެފަރާތުގެ ދެމެދުގައި ހިންގުމާއި، އެކިއެކި ދިރާސާތަކާއި ރިޕޯޓްސް އަދި މައުލޫމާތު ފޯރުކޮށް ދިނުމާއި އަދި އެކެޑެމިކް ބޭފުޅުންނަށް ވަޒީފާއާ ގުޅުން ހުރި ތަމްރީނުތައް ދިނުން ހިމެނެއެވެ.
އެމްއޯޔޫގައި ސޮއިކުރުމަށް ބޭއްވި މި ރަސްމިއްޔާތުގައި އައިޔޫއެމްގެ ޑެޕިއުޓީ ވައިސް ޗާންސެލަރުންނާއި އަދި އިސްފަރާތްތައް ބައިވެރިވެ ވަޑައިގެންނެވިއެވެ.
