ލޯފަން ކުދިންނަށް ޚާއްޞަކޮށްގެން އައިޔޫއެމުން ޤުރްއާން ހިތުދަސްކޮށްދިނުމުގެ ކިލާސްތަކެއް

ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އިން ލޯފަން ކުދިންނަށް ޚާއްޞަކޮށްގެން ޤުރްއާން ހިތުދަސްކޮށްދިނުމުގެ ކިލާސްތަކެއް ކުރިއަށް ގެންދަން ނިންމައިފިއެވެ.

އައިޔޫއެމުން ބުނީ އެއްވެސް ކުއްޖެއް ބާކީކޮށްނުލުމަށް ސަރުކާރުން ކަޑައަޅާފައިވާ ސިޔާސަތުގެ ދަށުން އެ ޔުނިވަރސިޓީން ލޯފަން ކުދިންނަށް ޚާއްޞަކޮށްގެން ޤުރްއާން ހިތުދަސްކޮށްދޭ ކިލާސްތަކެއް ހިންގުމަށް ރޭވިފައިވާ ކަމަށެވެ. އަދި މި ކުދިންނަކީ މުޖުތަމަޢުއިން ބާކީކޮށްފައިވާ ބައެއްގެ އިހުސާސް އެ ކުދިންނަށް ވިޔަނުދީ، އެ ކުދިންނަކީވެސް މުޖުތަމަޢުގައި މުހިންމު ކުދިންތަކެއްކަމުގެ އިހުސާސް އެ ކުދިންނަށް ފަހިކޮށްދީ، އަދި އަމިއްލައަށް މަސައްކަތްކުރެވޭނެ ފެންވަރަށް އެކުދިން ތަމްރީނުކޮށްދިނުމަކީ މި ކިލާސްތަކުގެ އެންމެ ބޮޑު މަގުސަދު ކަމަށްވެސް އައިޔޫއެމުން ބުނެއެވެ.

އައިޔޫއެމުން ބުނީ މި ކިލާސްތަކުން ތަމްރީނުވާ ދަރިވަރުން މުސްތަޤުބަލުގައި ޤުރްއާން ކިޔަވައިދިނުމާއި، މިސްކިތްތަކުގައި އިމާމުވެ ނަމާދުކުރާ ފެންވަރަށް ތަމްރީނުކުރާނެ ކަމަށެވެ. އަދި މި ކިލާސްތަކުގައި ބައިވެރިވާ ދަރިވަރުންނަށް ދެ އަހަރު ދުވަހުގެ މުއްދަތުގައި ޤުރްއާން ހިތުދަސްކޮށްދެވިގެންދާނެ ކަމަށް އައިޔޫއެމުން ބުނެއެވެ.

މީގެ އިތުރުން އައިޔޫއެމުން ބުނީ މި ކިލާސްތަކުގެ ކިޔެވުން 1442 ވަނަ އަހަރުގެ ރަމަޟާން މަހުގެ ފުރަތަމަ ހަފުތާގައި ފެށިގެންދާނެ ކަމަށާއި، މި ކިލާސްތަކުގައި ކިޔެވުމުގެ ފުރުޞަތު ރާއްޖެ އާއި ރާއްޖޭން ބޭރުގެ އެކިއެކި ކަންކޮޅުތަކުގައި ތިބި ދަރިވަރުންނަށް ހުޅުވިފައިވާ ކަމަށެވެ. އަދި މި ކިލާސްތައް ކުރިއަށްދާނީ ދެ މޯޑަކަށް ކަމަށާއި، އެގޮތުން އޮންލައިންކޮށް އަދި ކެމްޕަހަށް ހާޒިރުވެގެންވެސް ކިޔަވަން ބޭނުންވާ ދަރިވަރުންނަށް އެ ފުރުޞަތު ފަހިކޮށްދޭނެ ކަމަށްވެސް އައިޔޫއެމުން ބުނެއެވެ.

މުޅިން ހިލޭ ކިޔަވައިދޭ ކިލާހެއްކަން ފާހަގަކޮށް އައިޔޫއެމުން ބުނީ އޮންލައިންކޮށް މި ކިލާހުގައި ބައިވެރިވާ ދަރިވަރުންނަށް، އިންޓަނެޓުގެ ވަސީލަތްތައް އެ ޔުނިވަރސިޓީގެ ފަރާތުން ފޯރުކޮށްދެވޭނެ ކަމަށެވެ.

މި ކިލާހުގައި ބައިވެރިވުމަށް އެދޭ ފޯމު ހުށަހެޅުމުގެ ސުންގަޑިއަކީ މި ހިނގާ އޭޕްރީލް މަހުގެ އަށްވަނަ ދުވަހުގެ މެންދުރުފަހު 1:00 އެވެ. މި ކިލާސްތަކުގައި 16 އަހަރުން ދަށުގެ ކުދިން ބައިވެރިވާން އެދޭނަމަ، ބެލެނިވެރިޔާގެ ސިޓީއެއް ހުށަހަޅަން ޖެހެއެވެ. އަދި މި ކިލާސްތަކުގައި ބައިވެރިވާން ބޭނުންވާ ކުދިން، ކިލާހަށް ވަނުމަށް އެދޭ ފޯމު ފުރިހަމަކުރުމަށްފަހު apply@ium.edu.mv ހުށަހެޅި ދާނެ ކަމަށާއި، ނުވަތަ އޮންލައިންކޮށް ބައިވެރިވާން ބޭނުންވާ ދަރިވަރުން admissions.ium.edu.mv އިން ނުވަތަ ium.to/hifzapply އިން ފޯމު ހުށަހެޅުމުގެ ފުރުޞަތުވެސް ހުޅުވާލެވިފައިވާ ކަމަށް އައިޔޫއެމުން ބުނެއެވެ.