މަތީ ތައުލީމަށް ލޯބިކުރާ މީހުންގެ އަދަދު މައްޗަށް، ރަނގަޅު އަހުލާގުގެ ބައި ދަށަށް: ފަނޑިޔާރު މަހާޒު

ރާއްޖޭގައި މަތީ ތައުލީމަށް ލޯބިކުރާ މީހުންގެ އަދަދު ދަނީ މައްޗަށް ކަމަށާއި، ނަމަވެސް އަހުލާގުގެ ލައިން ދަނީ ދަށަށް ކަމަށް ދިވެހިރާއްޖޭގެ ސުޕްރީމްކޯޓްގެ ފަނޑިޔާރު އަލްއުސްތާޛު މަހާޒު އަލީ ޒާހިރު ވިދާޅުވެއްޖެއެވެ.

ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) ދަސްވެނިވުމުގެ ރަސްމިއްޔާތުގައި ވާހަކަދައްކަވަމުން މަހާޒު ވިދާޅުވީ ދިވެހިރާއްޖޭގެ އިސްލާމީ ޔުނިވަސިޓީއޭ ބުނުމަށް ޖެހެލުންވެގެން ނުވާނެ ކަމަށާއި، އެކަމާއި ފަހުރުވެރިވާން ޖެހޭ ކަމަށެވެ. އެއީ އިސްލާމިކް ޔުނިވާސިޓީ ތަފާތުވާނެ ކަމަށް މަހާޒު ވިދާޅުވިއެވެ.

ދަސްވެނިންނަށް އިޝާރާތް ކުރައްވައި މަހާޒު ވިދާޅުވީ އިސްލާމީ ވަންތަކަން ދަމަހައްޓާނީ އަހުލާގުން ކަމަށެވެ. ދީނާ ދެކޮޅު އެންމެހާ ކަންކަމަށް ނޫނެކޭ ބުނަންޖެހޭ ކަމަށާއި، އިޖްތިމާއީ ކަންކަމުގައި ވެސް ބަސްބުނާއިރު މިންގަނޑު ބަލަންޖެހޭ ކަމަށް މަހާޒު ވިދާޅުވިއެވެ.

މިރާއްޖެ ތައުލީމީ ނިޒާމަށް އަލިއަޅުއްވާލައްވާ މަހާޒު ވިދާޅުވީ ތައުލީމީ މީހުން ނިސްބަތުން ގިނަ ކަމަށާއި، މަތީތައުލީމަށް ދޭ އަހައްމިއްޔަތުކަން ބޮޑު ކަމަށެވެ. ކޮންމެ އަހަރަކު ވެސް ގިނަ ދަރިވަރުންތަކެއް މަތީތައުލީމު ހާސިލްކުރާ ކަމަށް ތަފާސްހިސާބުތަކުން ދައްކާ ކަމަށް މަހާޒު ވިދާޅުވިއެވެ. އެހެންކަމުން މި މުޖުތަމައު ހޭލުންތެރިވެ އަހުލާގީ ފޭރާން ރަނގަޅުވާން ޖެހޭ ކަމަށް މަހާޒު ވިދާޅުވިއެވެ.

ނަމަވެސް ގްރާފަކުން ލައިން ދަމާއިރު، އަހުލާގީ ލައިން ދަނީ ދަށަށް ކަމަށް މަހާޒު ވިދާޅުވިއެވެ.

އިންސާނުންނަކީ އަބަދުވެސް އެހެން މީހުންނާއެކު އުޅޭ ބައެއްކަން ފާހަގަކުރައްވައި މަހާޒު ވިދާޅުވީ އިޖްތިމާއީ ގުޅުންތަކަށް ރައްކާތެރިވާންޖެހޭ ކަމަށާއި، ޒިންމާ ނަގަންޖެހޭ ކަމަށެވެ. ބުނާބަހަކުން އަނެކާގެ ހިތަށް ކުރާނީ ކޮން އަސަރެއްތޯ ބަލަންޖެހޭ ކަމަށާއި، ބަސްބުނުމުގެ ކުރިން ވިސްނުމަށް މަހާޒު އިލްތިމާސްކުރެއްވިއެވެ.

މީގެ އިތުރުން މަހާޒު ވަނީ އަނެކާގެ އަނބުރަށް އަރައިގަނެވޭ ގޮތްތަކާއި އަހުލާގާ ގުޅުންހުރި ގިނަ މިސާލުތައް ޖައްސަވާފައެވެ. އަދި ދަސްވެނިންގެ ކިބައިން މި ކަންކަން ހައްލު ކުރުމަށް މަސައްކަތްކޮށް ދިނުމަށް އެދިވަޑައިގެންފައެވެ.

މަހާޒު ވިދާޅުވީ ދަސްވެނިން މުޖުތަމައުގެ ތެރޭގައި މިންގަނޑެއް ގެންގުޅެންޖެހޭ ކަމަށާއި، އަހުލާގެއްގެ ވެރިބަޔަކަށްވާންޖެހޭ ކަމަށެވެ. ތިމާއަށް ހައްގެއް ލިބޭ ކަމަށްވާނަމަ އެ ހައްގާއި ގުޅިގެން ވާޖިބެއްވާކަން ހަނދުމަ ކުރަންޖެހޭ ކަމަށް މަހާޒު ވިދާޅުވިއެވެ.

މަހާޒު ވިދާޅުވީ ގްރެޖުއޭޓްވި ނަމަވެސް ތައުލީމާ ދުރަށް ނުދިއުމަށާއި، ކޮންމެ ދުވަހަކު ވެސް އަމިއްލަ ނަފްސު ތަރައްގީ ކުރުމަށް މަސައްކަތް ކުރަންޖެހޭ ކަމަށެވެ. އިލްމަކީ މާތްﷲ ދެއްވާ ނޫރެއް ކަމަށާއި، ދެއްވާ ނިއުމަތެއް ކަމަށެވެ. އެއްވެސް ނިއުމަތެއް އެނިއުމަތެއް ދެމެހެއްޓުމަށްޓަކައި މަސައްކަތް ނުކުރާ ކަަމަށްވާނަމަ ނޭނގި ތިއްބާ އަތުން ބީވެގެން ހިނގާދާނެ ކަމަށް އޭނާ ވިދާޅުވިއެވެ.