އަމީންގެ ޝަރީއަތް: ވަކީލަކު ނެތުމުން ކުރިއަށް ނުގެންދެވުނު

ޓެރަރިސްޓެއް ކަމަށް ބުނާ މުޙައްމަދު އަމީނުގެ މައްސަލައިގައި ހައިކޯޓުން ނިންމާފައިވާގޮތާމެދު ޕްރޮސެކިއުޓަރ ޖެނެރަލްގެ އޮފީހުން ހިތްހަމަ ނުޖެހޭތީ އެ ޤަޟިއްޔާ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްފައިވާއިރު، އެ މައްސަލައިގެ އަޑުއެހުމެއް ބުދަ ދުވަހު ސުޕްރީމް ކޯޓުގައި ކުރިއަށް ގެންގޮސްފިއެވެ.

އަމީންގެ މައްސަލަ ކްރިމިނަލް ކޯޓުގައި ކުރިއަށްދިޔައިރު، އޭނާގެ ފަރާތުން ހުށައެޅި ހުށައެޅުންތައް ކްރިމިނަލް ކޯޓުން ބަލައިނުގަތުމުން އޭނާ ވަނީ އެކަން ހައިކޯޓުގައި އިސްތިއުނާފު ކޮށްފައެވެ. ހައިކޯޓުން އެ މައްސަލަތައް ބެލުމަށްފަހު ނިންމާފައިވަނީ އަމީންގެ މައްޗަށް ކޮށްފައިވާ ދައުވާތައް ބާތިލު ކަމަށެވެ. އެއާއެކު ދައުލަތުން އެ ނިންމުން ސުޕްރީމް ކޯޓުގައި އިލްތިމާސް ކުރުމުން، ބުދަ ދުވަހު ކުރިއަށް ގެންގޮސްފައިވަނީ އެކަމާ ގުޅޭ ފުރަތަމަ އަޑުއެހުމެވެ.

Advertisement

ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ އުއްތަމަ ފަނޑިޔާރު އަޙުމަދު މުއުތަސިމް އަދުނާން، ފަނޑިޔާރު އާއިޝާ ޝުޖޫން މުހައްމަދު، އަދި ފަނޑިޔާރު ހުސްނުއްސުއޫދެވެ.

އަޑުއެހުން ފައްޓަވަމުން އުއްތަމަފަނޑިޔާރު މުޢުތަސިމް އަދުނާން ވިދާޅުވީ، އަމީންގެ ފަރާތުން ވަކީލެއްގެ ގޮތުން އަހުމަދު ޔާމީން އައްޔަނު ކޮށްފައިވާ ކަމަށެވެ. ނަމަވެސް ޔާމީނަށް ބައިވެރިނުވެވޭތީ އައު ވަކީލެއްގެ ގޮތުން އިސްމާއިލް ވިޝާމް އޭނާގެ ފަރާތުން ވަކީލެއްގެ ގޮތުގައި ހަމަޖައްސާފައިވާކަމަށް މުޢުތަސިމު ވިދާޅުވިއެވެ. މުޢުތަސިމް ވިދާޅުވީ، ވިޝާމް ހަމަޖެއްސުމަށްފަހު ކޯޓަށް ހުށައަޅާފައިވާ ފޯމުގައި ވިޝާމްގެ ސޮޔާއި އިނގިލީގެ ނިޝާން ނެތް ކަމަށެވެ. ވުމާއެކު ވަކީލަކު ނެތި މި މައްސަލަ ކުރިއަށް ގެންދިއުމަށް ޤަސްދު ނުކުރައްވާކަމަށް މުޢުތަސިމް ވިދާޅުވިއެވެ.

މުޢުތަސިމް ވިދާޅުވީ، ބުރާސްފަތި ދުވަހު މި މައްސަލައިގެ އިތުރު އަޑުއެހުމެއް އޮންނާނެ ކަމަށެވެ. އެމަނިކުފާނު ވަނީ އަޑުއެހުމަށް އަންނައިރު ވަކީލާއެކު އައުމަށާއި، ލިއެކިއުމުގައި ފުރިހަމަ ކުރަންޖެހޭ ކަންކަންވެސް ފުރިހަމަ ކުރުމަށް ދަންނަވާފައެވެ. ހަމައެއާއެކު މިއީ ވަކި މުއްދަތެއްގެ ތެރޭގައި ނިންމަންޖެހޭ މައްސަލައެއްކަން ފާހަގަކުރައްވައި މުޢުތަސިމް ވިދާޅުވީ، ލިއެކިއުންތައް ބަލައިގަންނަތާ 7 ދުވަހުގެ ތެރޭގައި މައްސަލަ ނިންމަން ޖެހޭ ކަމަށެވެ. ވީމާ އެގޮތަށް ކަންކަން ތަރުތީބު ކުރެއްވުމަށް މުއްތައްސިމް އެދިވަޑައިގެންނެވިއެވެ.

އަޑުއެހުމުގައި ވާހަކަ ދައްކަމުން އަމީން ބުނީ، ސިއްޙީ މައްސަލައެއް އުޅެނީ އޭނާގެ ކަމަށާއި، މެޑިކަލް ސެޓްފިކެޓުވެސް ޙަވާލު ކޮށްފައިވާނެ ކަމަށެވެ.

"މިކޮޅަށް އީމެއިލް ނުލިބޭކަމަށް އަންގަނީ، އެހެންވީމާ އަޅުގަނޑު ވަގުތުން އެހެން ލޯޔަރެއް އައްޔަނު ކޮށްފައި ވަގުތުން މިހާރު ވާނީ މެއިލްވެސް ކޮށްފައި، އަދި މިކޮޅާ ޙަވާލުކޮށްފައި އަޅުގަނޑުގެ އެމްސީ ވެސް، ރޭގެ ދަންވަރުގެ ވަގުތެއްގައި އަޅުގަނޑު ތްރޯޓް އިންފެކްޝަނަކާއިގެން އައިޖީއެމްއެޗްގެ އީއާރް ޑިޕާޓްމަންޓުގެ ފްލޫ ކްލިނިކަށް ގޮސް ގާތްގަނޑަކަށް އަޅުގަނޑު 4 ޖަހަންދެން އެކޮޅުގައި އުޅުނީ، ދެން ޕޮލިހުންނަށް ވެސް އެނގޭނެ އެކަން، އެއަށްފަހު އަޅުގަނޑު ވާނީ ސިޓީ ލިއެފައި ޙަވާލުކޮށްފައި އަޅުގަނޑު ވެސް އީމެއިލް ކުރުމަށް އެދިފައި އަޅުގަނޑު ގޮސް ނިދީ"

މުޢުތަސިމް ވިދާޅުވީ، ސިއްޙީ މައްސަލައެއް އުޅޭނަމަ މަޤްބޫލު އުޒުރެއްތޯ ބެލުމަށްޓަކައި އެކަމާ ގުޅޭ ލިއެކިއުންތައް ވެސް ހުށައަޅަންޖެހޭނެ ކަމަށެވެ.