"ވަގުތު" ނޫހުން ލިޔުނު އާޓިކަލްއަކާ ގުޅިގެން މައާފަށް އެދެން އީސަ އެދިއްޖެ
26 ސެޕްޓެމްބަރު 2021 | އާދީއްތަ 07:56އެ ލިޔުމުގައި އީސަގެ މައްޗަށް ގިނަ ތުހުމަތުތަކެއް ކޮށްފައިވޭ
ކެނދިކުޅުދޫ ދާއިރާގެ މެމްބަރު އަހުމަދު އީސަ
ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސައަށް ތުހުމަތުތަކެއް ކޮށް، "ވަގުތު" ނޫހުން ޝާއިއުކޮށްފައިވާ އާޓިކަލްއެއްގައި ލިޔެއްފައި އޮތް އެއްޗަކާ ގުޅިގެން އޭނާގެ ކިބައިން މައާފަށް އެދުމަށް އެ ނޫހަށް އަންގައިފިއެވެ.
"މޫކޭގެ އެމްޑީ ކަމުގައި އާރްޑީސީ މަސައްކަތްތައް ނުނިމި ދަރަނި ބޮޑުވަނީ" މި ސުރުޚީގެ ދަށުން "ވަގުތު" ނޫހުގައި ޝާއިއުކޮށްފައިވާ އާޓިކަލްގައި ވަނީ އީސަ ހިއްސާވާ ކުންފުންޏަކުން ޕްރޮޖެކްޓުތަކުގައި ބޮޑު އަގުގައި ހޮޅިތަކެއް ގަންނަކަމުގެ ތުހުމަތު ކޮށްފައެވެ.
މިކަމާ ގުޅިގެން އީސަ ވަނީ ވަގުތު ނޫހުގެ އެޑިޓަރަށް ސިޓީއެއް ފޮނުއްވާފައެވެ. މި ސިޓީގައި އީސަ ވަނީ އޭނާގެ އަމިއްލަ ނަމުގައި ވެސް، އަދި އެބޭފުޅާ ހިއްސާވާ ކުންފުންޏެއްގެ ނަމުގައި ވެސް މިހާތަނަށް އާރްޑީސީ އާއެކު އެއްވެސް ވިޔަފާރީގެ މުއާމަލާތެއް ހިންގާފައި ނުވާނެ ކަމަށް ވިދާޅުވެފައެވެ. މިގޮތުން ޕްރޮޕޯސަލެއް، ކޯޓޭޝަނެއް އަދި އެހެން ގޮތަކުން ވެސް އާރްޑީސީގެ އެއްވެސް ޕްރޮޖެކްޓެއް، މަސައްކަތެއް ނުވަތަ އޯޑަރެއް ހޯދުމަށް އެދިފައި ނުވާނެ ކަމަށް އީސަ ވިދާޅުވިއެވެ. އަދި އާރްޑީސީގެ ޕްރޮޖެކްޓެއް، މަސައްކަތެއް ނުވަތަ އޯޑަރެއް ޚުދު އެބޭފުޅާއަށް ވެސް އަދި އެ ބޭފުޅާގެ ހިއްސާ އޮންނަ ކުންފުންޏަކަށް ވެސް މިހާތަނަށް ލިބިފައި ނުވާކަމަށް އީސަ ވިދާޅުވެފައިވެއެވެ.
މިފަދަ މައުލޫމާތެއް ހިމަނައިގެން އާޓިކަލްއެއް ލިޔުމުގެ ކުރިން މައުލޫމާތު ވެސް ސާފުކޮށްފައިނުވާކަމަށް އީސަ ވިދާޅުވިއެވެ. އެހެންކަމުން މި އާޓިކަލްއަކީ ސިޔާސީ ގޮތުން އަދި ޒާތީ ގޮތުން އީސަގެ އަގު ވައްޓާލައި، ސިޔާސީ މަޤްޞަދެއް ހާސިލްކުރުމަށް ލިޔެފައިވާ ލިޔުމެއް ކަމަށް އީސަ ވަނީ ތުހުމަތުކުރައްވާފައެވެ.
މިއީ ދިވެހިރާއްޖޭގެ ޤާނޫނުން މަނާކުރާ ކަމެއްކަން ފާހަގަކުރައްވައި އީސަ ވަނީ އެ ލިޔުމުގައިވާ މައުލޫމާތުތަކަކީ ދޮގު މައުލޫމާތެއްކަން ނޫސްބަޔާނެއް މެދުވެރިކޮށް އާންމުކުރުމަށް އެންގުމަށް އެދިވަޑައިގެންފައެވެ. އަދި އާޓިކަލްއާ ގުޅިގެން ވަގުތު ނޫހުގެ ފަރާތުން އީސަގެ ކިބައިން ލިޔުމުން މާފަށް އެދުމަށް ވެސް ވަނީ އެދިވަޑައިގެންފައެވެ.
