ކޮރަޕްޝަނާއި، ޚިޔާނާތުގެ އެއްވެސް ކަމެއް ނުކުރާނަން: އަކްރަމް
23 ސެޕްޓެމްބަރު 2021 | ބުރާސްފަތި 14:16އެމްއެމްޕީއާރްސީއާ އެއްވެސް ގޮތަކަށް ގުޅުމެއް ނޯންނާނެ
އަކްރަމް ކަމާލުއްދީން (ވ) އަދި ރައީސް (ކ)
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ގައުމީ މަޖިލީހުގެ ދާއިރާތަކުގެ އިންތިޚާބުގައި އެމްޑީޕީގެ މާލޭ ދާއިރާގެ ރައީސް ކަމަށް ވާދަކުރައްވާ އަކްރަމް ކަމާލުއްދީން ދުވަހަކުވެސް ކޮރަޕްޝަނެއް އަމަލެއް ނުވަތަ ޚިޔާނާތުގެ ފައިސާއެއްގައި ޖެހިވަޑައިގެންފައިނުވާނެ ކަމަށް ވިދާޅުވެއްޖެއެވެ.
ބުރާސްފަތި ދުވަހު ކުރިއަށް ގެންދިޔަ ރާއްޖެޓީވީގެ ފަށާއިރު ޕްރޮގްރާމްގައި އަކްރަމް ވިދާޅުވީ އެމްއެމްޕީއާރްސީގެ ޚިޔާނާތުގެ ތުހުމަތުތައް ވެސް ކުރި ކަމަށާއި، އެކަމަށް މިހާރު ވެސް ބައެއް މީހުން ސުވާލު އުފައްދާ ކަމަށެވެ. ނަމަވެސް އެމްއެމްޕީއާރްސީއާ އެއްވެސް ގޮތަކަށް ގުޅުމެއް ނޯންނާނެ ކަމަށެވެ.
އަކްރަމް ވިދާޅުވީ ވިޔަފާރިވެރިންނަކީ ޑޮލަރު ބޭނުންވާނެ ބައެއް ކަމަށާއި، ޑޮލަރު ބޭނުން ވެގެން ރައްޓެއްސެއްގާތު ޑޮލަރު ހޯދައިދިނުމަށް އެދުނު ކަމަށެވެ. އަދި ފައިސާ ހަވާލުކުރުމުން ޑޮލަރުގެ ޗެކެއް ދިން ކަމަށާއި، އެޗެކް އެއީ ކޮން ކުންފުންޏެއްގެ ޗެކެއްތޯ ނުވަތަ ޑޮލަރު އައީ ކޮންތާކުންތޯ ނުބައްލަވާ ކަމަށެވެ. އަދި އެދުވަސްވަރަކީ ޑޮލަރު ލިބުން ދަތި ދުވަސްވަރެއްގެ ގޮތުގައި އަކްރަމް ފާހަގަކުރެއްވިއެވެ.
ޕްލޭނިންގ މިނިސްޓްރީގެ ސްޓޭޓް މިނިސްޓަރުކަން ވެސް ކުރައްވަމުން ގެންދަވާ އަކްރަމް ވިދާޅުވީ ޚިޔާނާތުގެ ކަމެއްގައި ތުހުމަތުކޮށް, ހަގީގަތާ ޚިލާފު ވާހަކަތައް ދެއްކުން ގޯސް ކަމަށެވެ. މީހެއްގެ ބޮލުގައި ތުހުމަތެއް އަޅުވާއިރު، ދެކޮޅު ބަަލަން ޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ އެފަދަ ކަންތައްތަކަކީ ބަލައި ގަނެވޭނެ ކަމެއް ނޫން ކަަމަށެވެ.
އަކްރަމް ވިދާޅުވީ ދުވަހަކު ވެސް ޚިޔާނާތުގެ އަމަލެއް ހިންގަވާފައިނުވާނެ ކަމަށާއި، ކުރިއަށް އޮތް ދުވަސްތަކުގައި ވެސް އެފަދަ ކަމެއް ނުކުރައްވާނެ ކަމަށެވެ. އަދި އަބަދުވެސް ވާކާލާތު ކުރައްވަނީ ކޮރަޕްޝަނާއި ޚިޔާނާތާ ދެކޮޅަށް ކަމަށް އޭނާ ވިދާޅުވިއެވެ.
