އޭދަފުށީ މަގުތަކާއި ބެހޭގޮތުން މިނިސްޓްރީން ފާހަގަކޮށްފައިހުރި ކަންކަން ރަނގަޅުކުރަން ވަރަށް އަވަހަށް ފަށާނަން: އެމްޓީސީސީ

ބ. އޭދަފުށި މަގުތަކާއި ގުޅޭގޮތުން ޕްލޭނިން މިނިސްޓްރީން ފާހަގަކޮށްފައިހުރި ކަންކަން ރަނގަޅުކުރުމުގެ މަސައްކަތް ވަރަށް އަވަހަށް ފަށާނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އޭދަފުށީގެ 17 މަގެއް ޒަމާނީ ފެންވަރަށް ތަރައްގީކުރުމުގެ މަސައްކަތް އެމްޓީސީސީން ވަނީ މިއަހަރުގެ ޖުލައި 3 ވަނަ ދުވަހު ނިންމާލާފައެވެ. އެމްޓީސީސީގެ ސީއީއޯ ވަނީ އެކުންފުނިން ތަރައްގީކޮށްފައިވާ މަގުތައް ބައްލަވާލެއްވުމަށް އެރަށަށް ޒިޔާރަތްކުރައްވާފައެވެ. މަގުތައް ބައްލަވައިލެއްވުމަށްފަހު މީޑިއާތަކަށް މައުލޫމާތު ދެއްވަމުން އާދަމް އާޒިމް ވިދާޅުވީ މި މަސައްކަތަކީ ކޮވިޑް-19ގެ އެންމެ އުނދަގޫ ދަނޑިވަޅުގައި ކުރިއަށްގެންގޮސްފައިވާ މަޝްރޫއެއް ކަމަށެވެ. ދަތިތަކާއެކުވެސް ހިތްހަމަޖެހޭ މިންވަރަށް މި މަސައްކަތް ކުރެވިފައިވާކަމަށް އާޒިމް ވިދާޅުވިއެވެ.

އާޒިމް ވިދާޅުވީ މަސައްކަތް ނިމުމުން މީގެ ހަފުތާއެއް ކުރިން ޕްލޭނިން މިނިސްޓްރީން އޭދަފުއްޓަށް ގޮސް މަސައްކަތް ނިމުނުގޮތުގެ އިންސްޕެކްޝަނެއް ހަދާފައިވާކަމަށެވެ. މިކަމާއި ގުޅިގެން ތައްޔާރުކޮށްފައިވާ ރިޕޯޓުގައި ހިމެނޭ ކަންކަން ބަލައި، ރިޕޯޓުގައި ފާހަގަކޮށްފައިހުރި ކަންކަން ރަނގަޅުކުރުމުގެ މަސައްކަތް ފަށާނެ ކަމަށް އާޒިމް ވިދާޅުވިއެވެ. މިކަންކަން ރަނގަޅުކުރަން އެއް އަހަރުދުވަސް ލިބޭނެ ކަމަށް އާޒިމް ވަނީ ވިދާޅުވެފައެވެ.

އޭދަފުށީ މަގުތަކުގެ މަސައްކަތާއި ގުޅޭގޮތުން އޭދަފުށީ ކައުންސިލްގެ ރައީސް މުހައްމަދު ފާތިހު ވިދާޅުވީ މަގުތައް ހެދުމުގެ ކުރިން އެރަށުގެ މަގުތަކުގައި ވަޅުގަނޑުތައް ހެދިފައި ހުރުމާއި، ފެން ބޮޑުވުން ފަދަ ކަންކަން ފާހަގަކުރެވުނު ކަމަށެވެ. އެހެންނަމަވެސް މިހާރު މިވަނީ މިކަންކަމަށްވެސް ހައްލު ގެނެވި، ޒަމާނީ ފެންވަރަކަށް ތަރައްގީކުރެވިފައި ކަމަށް ފާތިހު ވިދާޅުވިއެވެ. މިހާރު ނުހެދި ހުރި މަގުތައްވެސް ކުރިއަށް އޮތް ތަނުގައި ތަރައްގީކު ރެވިގެންދާނެ ކަމަށް އުންމީދު ކުރައްވާކަމަށް ފާތިހު ވަނީ ވިދާޅުވެފައެވެ.

މިއީ 29.68 މިލިއަން ރުފިޔާގެ މަޝްރޫއެކެވެ.