"ފުޅަދޫ ބަނދަރާއެކު ރަށަށް އިގްތިސާދީ ކުރިއެރުން އަންނާނެ"

ބ. ފުޅަދޫ ބަނދަރު ތަރައްގީކޮށް ނިމުމުން އެ ރަށަށް އިގްތިސާދީ ގޮތުން ގިނަ ކުރިއެރުންތަކެއް އަންނާނެ ކަމަށް ރަށު ކައުންސިލްގެ ރައީސް އަލީ އަޒުހަރު ވިދާޅުވެއްޖެއެވެ.

ފުޅަދޫ ބަނދަރުގެ މަސައްކަތްތައް ކުރިއަށްގޮސްފައިވާ ހިސާބު ބައްލަވައިލެއްވުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވަނީ ފުޅަދޫއަށް ވަޑައިގެންފައެވެ.

މި ދަތުރުފުޅުގައި އެރަށުގެ ކައުންސިލާވެސް ބައްދަލުކުރައްވާފައިވެއެވެ. މި ބައްދަލުކުރެއްވުމަށްފަހު މީޑިއާތަކަށް މައުލޫމާތު ދެއްވަމުން ފުޅަދޫ ކައުންސިލްގެ ރައީސް އަލީ އަޒުހަރު ވިދާޅުވީ ލަފާފުރުމުގެ ދަތިކަމަކީ އެރަށަށް ދިމާވެފައިވާ އެންމެ ބޮޑު އެއް ގޮންޖެހުން ކަމަށެވެ. މިކަމުގެ ސަބަބުން އިގްތިސާދީ ގޮތުން ގިނަ ކުރިއެރުންތަކެއް އެރަށަށް އަންނާނެ ކަަމަށެވެ.

ފުޅަދޫއަކީ ގެސްޓްހައުސް ވިޔަފާރިވެސް ކުރިއަރަމުން އަންނަ ރަށަކަށް ވެފައި، ބަނދަރުގެ ސަބަބުން ގެސްޓްހައުސް ވިޔަފާރިވެސް އިތުރަށް ކުރިއަރައިގެންދާނެ ކަމަށް އަޒުހަރު ވިދާޅުވިއެވެ. ގެސްޓުން ގެނައުމަށް ދިމާވާ ގޮންޖެހުންތަކަށް ހައްލު ލިބިގެންދާނެ ކަމަށް އޭނާ ވިދާޅުވިއެވެ. މީގެ އިތުރުން ރަށަށް ބޭނުންވާ މުދާ ގެންދިއުމަށް އިތުރަށް ފަސޭހަވެ، ރަށުގެ ރައްޔިތުންނަށްވެސް އެެއް ތަނުން އަނެއް ތަނަށް ދިއުމަށް ފަސޭހަވާނެ ކަމަށް ކައުންސިލްގެ ރައީސް ވިދާޅުވިއެވެ.

ފުޅަދޫ ބަނދަރު ހެދުމުގެ މަސައްކަތާއި ގުޅޭގޮތުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މި މަސައްކަތުގެ 90 އިންސައްތަ މަސައްކަތް މިހާރު ނިމިފައިވާ ކަމަށެވެ. މި ބަނދަރަކީ ކުރިން ނެރު އޮތް ނޫން އެހެން ތަނަކުން ނެރު ކަނޑައިގެން ހަދާ ބަނދަރެއް ކަމުން މި މަސައްކަތަށް ގޮންޖެހުންތަކެއް ދިމާވި ކަމަށް އާޒިމް ވިދާޅުވިއެވެ. މީގެ އިތުރުން މަސައްކަތް ނިންމަން ބޭނުންވާ ބައެއް ތަކެތި އަދިވެސް ނުގެންދެވި ވާކަން އާޒިމް ފާހަގަކުރެއްވިއެވެ.

މި މަޝްރޫއުގެ ދަށުން 51,861.5 ކިއުބިކް މީޓަރުގެ ސަރަހައްދެއްގެ ބަނދަރު ކޮނުމާއި، 223 މީޓަރުގެ ސަރަހައްދެެއްގައި އެއްގަމު ތޮށި ލުމާއި، 108 މީޓަރުގެ ސަރަހައްދެއްގައި ބޭރުތޮށި ލުމާއި، 302 މީޓަރުގެ ސަރަހައްދެއްގައި ރިވެޓްމެންޓް ޖެހުން ހިމެނެއެވެ. އަދި 558 އަކަ މީޓަރުގެ ސަރަހައްދެއްގައި ޕޭވްމެންޓް ހެދުމާއި، ބަނދަރުގައި ރޭމްޕަކާއި ވޯކްވޭ ބްރިޖެއް އެޅުމުގެ އިތުރުން ބަނދަރުގައި ބައްތި ހަރުކުރުން ހިމެނެއެވެ. މި މަޝްރޫއަކީ 49.4 މިލިއަން ރުފިޔާގެ މަޝްރޫއެކެވެ.