މޫސުމީ ބަދަލުތަކާ ގުޅިގެން، ތަރައްޤީވަމުން އަންނަ ގައުމުތަކަށް ދޭ އެހީ ދެގުނަ ބޮޑުކުރުމަށް މަސައްކަތްކުރާނަން: ބައިޑަން

މޫސުމަށް އަންނަ ބަދަލުތަކާ ގުޅިގެން ތަރައްޤީވަމުން އަންނަ ގައުމުތަކަށް އެމެރިކާއިން މިހާރު ދެމުން ގެންދާ އެހީތެރިކަން ދެގުނަ އިތުރުކުރެއްވުމަށް މަސައްކަތްކުރައްވާނެކަމަށް އދ.ގެ އާންމު މަޖިލީހުގައި ތަގުރީރުކުރައްވަމުން އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

ބައިޑަން ވިދާޅުވީ ކޮންގްރެސްއާ ގުޅިގެން މިހާރު ދެމުންދާ އެހީ 2024 ވަނަ އަހަރު އަންނަންވާއިރު އަހަރަކު 11.4 ބިލިއަން ޑޮލަރަށް އިތުކުރުމަށް މަސައްކަތްކުރައްވާނެ ކަމަށެވެ. މިއާއެކު, މޫސުމަށް އަންނަ ބަދަލުތަކާ ގުޅިގެން އެންމެ ބޮޑަށް ނުރައްކާވެފައިވާ ގައުމުތަކަށް އަހަރަކު 100 ބިލިއަން ޑޮލަރު ހޭދަކުރުމަށް, މީގެ 10 އަހަރު ކުރިން ކަނޑައެޅި އަމާޒަށް ވާސިލްވުމަށް އެހީތެރިކަން ލިބިގެންދާނެއެވެ.

ދުނިޔޭގެ ގައުމުތަކުގެ އިސް ލީޑަރުން ބައިވެރިވެވަޑައިގެންނެވި މި އާންމު މަޖިލީހުގައި ވާހަކަފުޅު ދައްކަވަމުން ބައިޑަން އިތުރަށް ވިދާޅުވީ މިފަދަ އިންވެސްޓްމެންޓްތަކެއް ކުރުމުގެ އެންމެ މުހިންމު ކަމަކީ ހަމައެކަނި މޫސުމީ ރަނގަޅު ސިޔާސަތުތަކަށް އިންވެސްޓް ކުރުން އެކަނި ނޫންކަމަށެވެ. ނަމަވެސް އެއީ ކޮންމެ ގައުމަކަށްވެސް އެބަޔެއްގެ އަމިއްލަ ކުރިމަގަށާއި ދުނިޔޭގެ ކުރިމަގަށް އިންވެސްޓްކުރުމަށް ލިބިގެންދާ ފުރުސަތެއްކަމަށެވެ.

ބައިޑެން މިމޭރުމުން މޫސުމީ ބަދަލުތަކާއި ގުޅޭގޮތުން ވާހަކަފުޅު ދައްކަވާފައިމިވަނީ, އަންނަ އޮކްޓޯބަރ މަހުގެ 31ން ނޮވެމްބަރ 12ށް ކޮޕް 26 ސަމިޓް ބޭއްވުމަށް ހަމަޖެހިފައިވަނިކޮށެވެ. ބައިޑެންގެ މޫސުމީ ބަދަލުތަކާއި ގުޅޭ ގިނަ ސިޔާސަތުތައް އަދިވެސް އޮތީ ކޮންގްރެސްއިން ނިންމާ ނިންމުންތަކެއްގެ މައްޗަށެވެ.

ސްކޮޓްލެންޑްގައި ކޮޕް 26 ސަމިޓް ކުރިޔަށް ގެންދިޔުމަށް ހަމަޖެހިފައިވާއިރު އިނގިރޭސި ބޮޑުވަޒީރު ބޮރިސް ޖޯންސަން ވިދާޅުވެފައިވަނީ މޫސުމީ ބަދަލުތަކާ ގުޅިގެން ހާސިލްކުރަން ކަނޑައަޅާފައިވާ ފައިސާއާބެހޭ ލަނޑުދަނޑިތަކަށް ވާސިލްވުމުގައި ތަރައްޤީ ވަމުން އަންނަ ގައުމުތަކާއި ތަރައްޤީވެފައިވާ ގައުމުތަކާ ދެމެދު އިތުބާރު ގާއިމުކުރުމަކީ މުހިންމު ކަމެއްކަމަށެވެ. 100 ބިލިއަން އެމެރިކާ ޑޮލަރު އަހަރަކު ހޭދަކުރުމަށް ތަރައްގީވެފައިވާ ގައުމުތަކުން ވެފައިވާ އެއްބަސްވުމުގެ މުއްދަތު 2020 ވަނަ އަހަރު ވަނީ ހަމަވެފައެވެ. ނަމަވެސް އެލަނޑުދަނޑިއަށް ވާސިލްވެފައެއްނުވެއެވެ.