ސިވިލް ސަރވިސް މުވައްޒަފުންގެ ކަންބޮޑުވުންތަކާއެކު މަޖިލީހަށް ކުއްލި މައްސަލައެއް
20 ސެޕްޓެމްބަރު 2021 | ހޯމަ 05:00މައްސަލަ ބަލައިގަތުމަށް ވޯޓު ދެއްވީ 30 މެމްބަރުން
ވެލާނާގެއަކީ ސަރުކާރުގެ ގިނަ އޮފީސްތަކެއް ހިންގާ އިމާރާތެއް
ސިވިލް ސަރވިސް މުވައްޒަފުންގެ ކަންބޮޑުވުންތަކަށް ހައްލު ހޯދައިދިނުމަށް އެދި މަޖިލީހަށް ކުއްލި މައްސަލައެއް ވައްދައިފިއެވެ.
ކުއްލި މައްސަލަ ހުށަހެޅުއްވީ، ބިލެތްދޫ ދާއިރާގެ މެމްބަރު އަހުމަދު ހަލީމެވެ. ހަލީމް ހުށަހެޅުއްވި ކުއްލި މައްސަލައިގައި ބުނެފައިވަނީ، ސަރުކާރު ހިންގުމުގެ އެންމެ ބޮޑު ޒިންމާއެއް އަދާކުރާ ބަޔަކީ ދިވެހި ސިވިލް ސަރވެންޓުން ކަމަށާއި، އެމީހުންނަށް އެކަށީގެންވާ އުޖޫރައެއް ދޭން ޖެހޭ ކަމަށެވެ. އަދި މުސާރައިގެ އޮނިގަނޑު ލަސްނުކުރުމަށް ސަރުކާރަށް ގޮވާލާ ކަމަށެވެ.
މައްސަލަ ބަލައިގަތުމަށް ވޯޓު ދެއްވީ 30 މެމްބަރުންނެވެ.
މައްސަލަ ހުށަހެޅުއްވި މެމްބަރު ވިދާޅުވީ، މިނިމަމް ވޭޖްގެ ވާހަކަ ދައްކަނީ އެއް ހަމައެއްގައި އެކަށީގެންވާ މުސާރައެއް ދިނުމުގެ މަޤްޞަދުގައި ކަމަށެވެ. އޮފީސްތަކުގައި މަސައްކަތްކުރާ ވަގުތުވެސް މަދުވަނީ މުސާރަ ކުޑަވުމުން ކަމަށެވެ. ހުރިހާ ވުޒާރާއެއްގައި ވެސް އެއް ހަަމައެއްގެ ވަޒީފާތަކުގައި އެއް މުސާރައެއް ކަނޑައަޅަން ޖެހޭ ކަމަށެވެ.
ހައްގު މިންވަރު ހޯދުމުގެ ނަމުގައި ރާއްޖޭގެ އެކި ކަންކޮޅުތަކުގައި ސިވިލް ސަރވެންޓުން ވަނީ އާދީއްތަ ދުވަހު ހިމޭން އިހުތިޖާޖެއް ކުރިއަށް ގެންގޮސްފައެވެ. ސިވިލް ސާވަންޓުންގެ މުސާރަ ބޮޑު ކުރުމަކީ މިސަރުކާރުގެ ވައުދެކެވެ. ނަމަވެސް އެކަން ކުރެވިފައި ނުވާތީ ސިވިލްސާވަންޓުންވަނީ ކަޅު ހެދުމުގައި ހިމޭން އިހުތިޖާޖެއް ކޮށްފައެވެ.
އިހުތިޖާޖާ ގުޅޭ ގޮތުން ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު ވިދާޅުވީ، އިހުތިޖާޖާ ގުޅޭ މައުލޫމާތު ލިބިލެއްވީ މީޑިއާއިން ކަމަށެވެ. ސިވިލް ސަރވިސް މުވައްޒަފުންގެ ކަންބޮޑުވުންތައް ކޮމިޝަންގެ ރައީސްއާ ހިއްސާ ކޮށްފައިނުވާކަމަށް ވިދާޅުވިއެވެ.
