2022 ވަނަ އަހަރަށް ހުށަހެޅުމަށް ނިންމާފައިވަނީ 37 ބިލިއަން ރުފިޔާގެ ބަޖެޓެއް
މިނިސްޓަރ ވިދާޅުވީ ބަޖެޓް 40 ބިލިއަނަށްވުރެ ބޮޑުވާނަމަ ފައިނޭންސް ހޯދުމަށް ދަތިވާނެކަމަށް
ފިނޭންސް މިނިސްޓަރ އިބްރާހީމް އަމީރު
2022 ވަނަ އަހަރަށް ހުށަހެޅުމަށް ނިންމާފައިވަނީ 37 ބިލިއަން ރުފިޔާގެ ބަޖެޓެއްކަމަށާއި ފައިނޭންސިންގ ގެޕް ބޮޑުވުމާއެކު ބަޖެޓް އެއަށްވުރެ މާބޮޑު ނުކުރެއްވުމަށް ހުށަހަޅުއްވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ފިނޭންސް މިނިސްޓްރީން ވަނީ ރާއްޖޭގެ އިގްތިސާދީ އަދި މާލީ ހާލަތަށް އައިސްފައިވާ ބަދަލުތަކާއި ދައުލަތުގެ މެދު ރާސްތާގެ ދަރަނީގެ ސްޓްރެޓެޖީ 2022ން 2024ށް އަދި މިއަހަރުގެ ފިސްކަލް ރިސްކު އެސެސްމަންޓާ ގުޅޭގޮތުން މައުލޫމާތު އަރުވާފައެވެ. ކޮމިޓީން ބޭއްވި ބައްދަލުވުމުގައި މިނިސްޓަރ ވަނީ 2022ން 2024ށް މެދުރާސްތާގެ ފިސްކަލް އަދި ޑެޓް ސްޓްރެޓެޖީގެ ޕްރެޒެންޓޭޝަނެއް ހުށަހަޅުއްވާފައެވެ.
މި ޕްރެޒެންޓޭޝަން ހުށަހަޅުއްވަމުން މިނިސްޓަރ ވިދާޅުވީ ބަޖެޓް 40 ބިލިއަނަށްވުރެ ބޮޑުވާނަމަ ބަޖެޓް ފައިނޭންސް ކުރުމަށް ބޭނުންވާ ފައިސާ އިތުރުވެ ފައިނޭންސް ހޯދުމަށް ދަތިވާނެކަމަށެވެ. އަދި 34 ބިލިއަނަށް ބަޖެޓް ކުޑަކުރާނަމަ ދައުލަތުގެ ޚަރަދުތަކުގެ ތެރެއިން ކުޑަކުރެވޭނެ ޚަރަދުތައް ކަނޑައަޅާ ފިޔަވަޅު އަޅަންޖެހޭނެކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އަންނަ އަހަރުގެ ޖުމްލަ ބަޖެޓް ހުންނާނެކަމަށް ލަފާކުރެވެނީ 33.8 ބިލިއަން ރުފިޔާގައިކަމަށެވެ. ރިކަރަންޓް ޚަރަދުގެ ގޮތުގައި 23.9 ބިލިއަން ރުފިޔާ އާއި ކެޕިޓަލް ޚަރަދުގެ ގޮތުގައި 12.6 ބިލިއަން ރުފިޔާ އަންނަ އަހަރު ބޭނުންވާނެއެވެ. އަދި ނިއު ޕޮލިސީ އިނީޝިއޭޓިވްގެ ގޮތުގައި 500 މިލިއަން ރުފިޔާގެ މާކެއް މިނިސްޓްރީން ވަނީ ކަނޑައަޅާފައެވެ. މިނިސްޓަރ ވިދާޅުވީ އާމްދަނީ ހޯދާނެ ގޮތްތައް އިތުރުނުކޮށް މިއަހަރުގެ ބަޖެޓާއި މިދިޔަ އަހަރުގެ ބަޖެޓްގައި އާމްދަނީ ހޯދުމަށް ހުށަހަޅާފައިވާ ކަންކަން ތަންފީޒުކޮށްގެން އަންނަ އަހަރު އާމްދަނީ ހޯދުމަށް މަސައްކަތްކުރައްވާނެކަމަށެވެ.
އަންނަ އަހަރު ދައުލަތަށް އާމްދަނީ އާއި ހިލޭ އެހީގެ ގޮތުގައި ލިބޭނެކަމަށް ބަލާފައިވަނީ 23.6 ބިލިއަން ރުފިޔާއެވެ. އެހެންކަމުން ބަޖެޓް ފައިނޭންސިންގ އަށް 13.4 ބިލިއަން ރުފިޔާ ބޭނުންވެއެވެ. އަންނަ އަހަރުގެ ބަޖެޓް ފައިނޭންސިންގ 5 ބިލިއަން ރުފިޔާ ހުރީ ހަމަޖެހިފައިކަމަށް މިނިސްޓަރ ވިދާޅުވިއެވެ.
ކޮވިޑް-19ގެ ސަބަބުން ރާއްޖޭގެ އިގްތިސާދަށް އައި ލޮޅުމާއެކު ދަރަނި ވަނީ ކުރިން އަންދާޒާކުރި ވަރަށްވުރެ މަތީގައެވެ. އެހެންކަމުން މިނިސްޓަރ ވިދާޅުވީ ކުރިޔަށް އޮތްތަނުގައި މަސައްކަތްކުރައްވާނީ އިތުރުވާ ދަރަނި އަދާކުރުމަށް މެދުރާސްތާގެ ޚަރަދު ކޮންޓްރޯލްކުރާ ނިޒާމަކުން ބަޖެޓް ބައްޓަން ކުރައްވަންކަމަށެވެ. އަދި 2022 ވަނަ އަހަރުން ފެށިގެން 2024 ވަނަ އަހަރުގެ ބަޖެޓްތަކުގައި ކޮވިޑްގެ ބަދަލުވެފައިވާ ހާލަތަށް ރިއާޔަތްކޮށް ބަޖެޓްގެ މިސްރާބު ބަދަލުކުރުމަށް މަސައްކަތް ކުރައްވާނެކަމަށް މިނިސްޓަރ ވިދާޅުވިއެވެ. މިއަމާޒަށް ވާސިލްވުމަށްޓަކައި ފިސްކަލް އެންކަރ ތަކެއް ގެންގުޅުއްވާކަމަށް މިނިސްޓަރ ވިދާޅުވިއެވެ.
އޭގެ ފުރަތަމަ ބަޔަކީ 2023 ވަނަ އަހަރު ނިމެންވާއިރު ދައުލަތުގެ ސީދާ ދަރަނި ޖީޑީޕީގެ ނިސްތަބުން 105 އިންސައްތައަށް ތިރިކުރުން ކަމަށް މިނިސްޓަރ ވިދާޅުވިއެވެ. މިހާރު ދައުލަތުގެ ސީދާ ދަރަނި ހުރީ ގާތްގަނޑަކަށް 115 އިންސަތަ އާއި 120 އިންސައްތައިގެކަމަށް މިނިސްޓަރ ވިދާޅުވިއެވެ. ދެވަނަ އެންކަރ އަކީ 2023 ވަނަ އަހަރުގެ ޕްރައިމަރީ ބަޖެޓް ޑެފެސިޓް ޖީޑީޕީގެ ނިސްބަތުން 5 އިންސައްތައަށް ތިރިކުރުން ކަމަށާއި ތިން ވަނަ އެންކައަކީ ބަޖެޓް ޑެފެސިޓް އަދި ދައުލަތުގެ ދަރަނި އަހަރަކަށްފަހު އަހަރެއް ކުޑަވަމުން ދާ މިސްރާބެއްގައި މެދުރާސްތާގައި ބެހެއްޓުން ކަމަށް މިނިސްޓަރ ވިދާޅުވިއެވެ. 2022 ވަނަ އަހަރުގެ ބަޖެޓް ބައްޓަންކުރައްވާނީ މި ފިސްކަލް އެންކަރތަކަށް ބަލައިގެން ކަމަށް މިނިސްޓަރ ވިދާޅުވިއެވެ.
