އައްޑޫ ސިޓީގައި އުމުރުން 16 އަހަރުގެ އަންހެން ކުއްޖަކަށް ޖިންސީ ގޯނާކުރިކަމުގެ ތުހުމަތުކުރެވޭ ފުލުސް މީހާ ވަޒީފާއިން ސަސްޕެންޑްކޮށްފިއެވެ.

އޭނާ ސަސްޕެންޑްކޮށްފައިވަނީ ސެޕްޓެމްބަރ މަހުގެ 16 ވަނަ ދުވަހުން ފެށިގެންނެވެ. ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ފުލުސް މީހާ ހައްޔަރުކޮށްފައިވަނީ ސެޕްޓެމްބަރ މަހުގެ 16 ވަނަ ދުވަހުގެ ރޭ 23:09 ގައެވެ. މިމައްސަލާގައި ތުހުމަތުކުރެވޭ ފުލުސް މީހާގެ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ. އޭނާ ޝަރީއަތް ނިމެންދެން ބަންދުކުރަން އަމުރުކުރީ ބަންދާއިމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޒިރުކުރުމުންނެވެ. 

އުމުރުން 34 އަހަރުގެ މިމީހާ ހައްޔަރުނުކޮށް ލަސްވަމުންދާތީ އެކަމާއި ހިތްހަމަނުޖެހިގެން އައްޑޫ ސިޓީގައި އެމީހާ ދިރިއުޅޭ ގެ ކައިރީގައި ވަނީ މުޒާހަރާކޮށްފައެވެ. ފުލުހުން ބުނެފައިވަނީ ކުޑަކުއްޖަކަށް ޖިންސީ ގޯނާކުރިކަމުގެ މައްސަލައެއް ފުލުހުންނަށް ސެޕްޓެމްބަރ މަހުގެ 15 ވަނަ ދުވަހު ހުށަހެޅިފައިވާކަމަށެވެ.

އަދި މިމައްސަލަ އައްޑޫ ސިޓީގެ ފުލުހުންނާއި ފުލުހުންގެ ފެމެލީ އެންޑް ޗައިލްޑް ޕްރޮޓެކްޝަން (އެފްސީޕީ) ގުޅިގެން އަންނަނީ ތަހުގީގުކުރަމުން ކަމަށް ފުލުހުން ބުނެއެވެ.