އައްޑޫ ފްލެޓް ސަރަހައްދުގައި ހިންގި މާރާމާރީގައި ޒަޚަމްވި ޒުވާނާ އިތުރު ފަރުވާއަށް މާލެ ގެންނަނީ
މާރާމާރީގައި ޒަޚަމްވީ 29 އަހަރުގެ ފިރިހެނެއް
އައްޑޫ ސިޓިީ
އައްޑޫ ސިޓީ ފްލެޓް ސަރަހައްދުގައި ހިންގި މާރާމާރީގައި ޒަޚަމްވި 29 އަހަރުގެ ޒުވާނާ އިތުރު ފަރުވާއަށް ހޮނިހިރުދުވަހު ހަވީރު މާލެ ގެންނަކަމަށް އައްޑޫ އިކުއެޓޯރިއަލް ހޮސްޕިޓަލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އައްޑޫ އިކުއެޓޯރިއަލް ހޮސްޕިޓްލްގެ މީޑިއާ އޮފިސަރ ޝާފީ މުހައްމަދު ވިދާޅުވީ ހިތަދޫ ފްލެޓް ސަރަހައްދުގައި ތޫނު އެއްޗަކުން ހަމަލާ ދީ ޒަޚަމްކޮށްލާފައިވާ ޒުވާނާގެ އެތެރެހައްޓަށް ލޭފައިބާފައި ހުރިކަމަށެވެ. އެހެންނަމަވެސް އޭނާގެ ހާލު މިވަގުތު ރަގަނޅު ކަމަށް ޝާފީ ވިދާޅުވިއެވެ.
މި މައްސަލައާއި ގުޅިގެން އަދި މީހަކު ހައްޔަރު ކޮއްފައިނުވާކަމަށް ފުލުހުން ބުނެއެވެ. އަދި މި މައްސަލައާއި ގުޅިގެން އިތުރު ތަހުގީގުތައް ކުރިއަށްދާ ކަމަށްވެސް ބުނެއެވެ.
މި ހާދިސާގެ މައުލޫމާތު ފުލުހުންނަށް ލިބިފައިވަނީ ހުކުރު ދުވަހުގެ މެންދުރު 12:08 ހާއިރު ކަމަށް ފުލުހުން ބުނެއެވެ.
ރާއްޖެއެމްވީއަށް މައުލޫމާތު ލިބޭ ގޮތުގައި މާރާމާރީގައި ދެ ޒުވާނަކަށް ވަނީ ވަރަށް ބޮޑަށް އަނިޔާވެފައެވެ. އަދި މާރާމާރީ ހިންގާފައިވަނީ ދެ ގުރޫޕެއްގެ ދެމެދުގައި ކަމަށް ވެސް މައުލޫމާތު ލިބެއެވެ.
މީގެ އިތުރުން ހުކުރު ދުވަހުގެ ރޭ 20:05 ހާއިރު އައްޑޫ ސިޓީގައި އިތުރު މާރާމާރީއެއް ހިނގައިފައިވާކަމަށް ފުލުހުން ބުނެއެވެ. މި މާރާމާރީގައި 27 އަހަރުގެ ފިރިހެނަކަށާއި 23 އަހަރުގެ އަންހެނަކަށް ވަނީ އަނިޔާވެފައެވެ.
