މާފުށީ ޖަލުގައި ތިބި ގައިދީންގެ ތެރެއިން ހަރުކަށި ފިކުުރުގެ ގައިދީން ދެނެގަންނަނީ
އަންނަ އޮގަސްޓު މަހުގެ ތެރޭގައި ގައިދީން އެ ޔުނިޓަށް ބަދަލު ކުރުމުގެ މަސައްކަތް ފަށާނެ
މާފުށީ ޖަލުގައި އަލަށް އިމާރަތް ކޮށްފައިވާ ޔުނިޓްތަކަކަށް އެ ޖަލުގައި ތިބި ހަރުކަށި ފިކުރުގެ ގައިދީން ބަދަލު ކުރުމަށް ދަނީ މަސައްކަތް ކުރަމުން
ކ. މާފުށީ ޖަލުގައި ތިބި ގައިދީންގެ ތެރެއިން ހަރުކަށި ފިކުުރުގެ ގައިދީން ދެނެގަތުމުގެ މަސައްކަތް މޯލްޑިވްސް ކަރެކްޝަނަލް ސަރވިސްއިން ކުރަމުންދާކަމަށް ކަރެކްޝަނުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ކަރެކްޝަންގެ މީޑިއާ އޮފިސަރު ވިދާޅުވީ މާފުށީ ޖަލުގައި އަލަށް އިމާރަތް ކޮށްފައިވާ ޔުނިޓްތަކަކަށް އެ ޖަލުގައި ތިބި ހަރުކަށި ފިކުރުގެ ގައިދީން ބަދަލު ކުރުމަށްޓަކައި، އެފަދަ ގައިދީން ދެނެގަތުމުގެ މަސައްކަތް ކުރަމުންދާ ކަމަށެވެ.
އަދި އެފަދަ ގައިދީން ހޯދައި، އަންނަ އޮގަސްޓު މަހުގެ ތެރޭގައި ގައިދީން އެ ޔުނިޓަށް ބަދަލު ކުރުމުގެ މަސައްކަތް ފަށާނެ ކަމަށާއި، އެ ޔުނިޓް ވެގެންދާނީ އެފަދަ ގައިދީންނަށް އަމާޒުކޮށް ތަފާތު ޕްރޮގްރާމްތައް ހިންގާ، ރިހެބިލިޓޭޓް ކުރުމުގެ ޕްރޮގްރާމްތައް ވެސް ހިންގާނެ ޔުނިޓެއްކަމަށް ކަރެކްޝަނުން ބުނެއެވެ.
ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދަށް ހަމަލާދިނުމުގައި ހަރުކަށި ފިކުރުގެ ބައެއް ޝާމިލުވާކަމަށް ފުލުހުން ބުނެފައިވާއިރު މިކަމާ ގުޅިގެން ޖަލުތަކުގެ ހާލަތު އިތުރަށް ރަނގަޅުކޮށް ގައިދީން ރިހެބިލިޓޭޓް ކުރުމުގެ ޕްރޮގްރާމްތައް ހިންގުމަށް ކަރެކްޝަނުން ދަނީ މަސައްކަތް ކުރަމުންނެވެ.
މީގެ އިތުރުން ރާއްޖޭގެ ޖަލުތަކުގެ ހާލަތު ރަނގަޅުކުރުމަށްޓަކައި ސަރުކާރުން، ޚާއްސަކޮށް ހޯމް މިނިސްޓަރުގެ އިސްނެންގެވުމަށް، ދަނީ މަސައްކަތްތަކެއް ކުރަމުންނެވެ. ޖަލުގެ ހާލަތު ރަނގަޅު ކުރުމަށްޓަކައި ޖަލުތަކުގެ ޚާއްސަ އޮޑިޓެއް ހަދައި، ފާހަގަކުރެވުނު ކަންކަން އިސްލާހުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. މި މަސައްކަތްތަކުގެ ދަށުން މާލެއާއި ހުޅުމާލެ ޖަލު އެއްކޮށްލުމުގެ މަސައްކަތް މިއަހަރު ކުރުމަށް ވަނީ ނިންމާފައެވެ.
މާލެއާއި ހުޅުމާލޭ ޖަލު އެއްކޮށްލުމަށްފަހު އަޅާ ޖަލު ވެގެންދާނީ ރާއްޖޭގައި ހަދާ ސަރަހައްދީ އެންމެ ބޮޑު ޖަލަށްކަމަށާއި، މިތަނުގައި ރިމާންޑް މީހުންނާއި އަންހެން ގައިދީންގެ އިތުރުން ކުޑަކުދިންވެސް ބޭއްތިބުމަށް ނިންމާފައިވާކަމަށް ކޮމިޝަނަރ އޮފް ޕްރިޒަންސް އަޙުމަދު މުޙައްމަދުފުޅު ވަނީ ވިދާޅުވެފައެވެ.
މި ތަނަކީ ޑިޓެއިނީސްއަށް ޚާއްސަ ޖަލަކަށް ވާނެކަމަށްވެސް ކޮމިޝަނަރ ވިދާޅުވިއެވެ. ކުށްވެރިން އެއްތަނުން އަނެއްތަނަށް އުފުލުމަކީ މިހާރު ދިމާވާ އެންމެ ބޮޑު ގޮންޖެހުންކަން ފާހަގަކުރައްވަމުން ކޮމިޝަނަރ ވިދާޅުވީ އައު ޖަލާއެކު މިކަމަށް ވެސް ހައްލެއް ލިބިގެންދާނެކަމަށެވެ.
އަދި މިމަސައްކަތް ނިމޭއިރު، މުވައްޒަފުން ތިބޭނެ އިތުރު އެކޮމަޑޭޝަން ބްލޮކްތައްވެސް ހެދިގެންދާނެކަމަށެވެ. އަދި މާލެއާއި ހުޅުމާލޭ ޖަލު އެއްކޮށްލުމުގެ މަސައްކަތް ނިންމައި، 2022 ވަނަ އަހަރު އެތަން ބޭނުންކުރަން ފެށޭވަރުވާނެކަމަށެވެ.
