ކުށްވެރިން ބެލެހެއްޓުމުގެ ނިޒާމަށް ޒަމާނީ ބަދަލުތަކެއް ގެނެވިއްޖެ: މިނިސްޓަރ އިމްރާން

ދިވެހިރާއްޖޭގައި ކުށްވެރިން ބެލެހެއްޓުމުގައި ޒަމާނުއްސުރެ ގެންގުޅުނު ނިޒާމަށް ބޮޑެތި ބަދަލު އައިސް، މިއަދު ކަރެކްޝަނަލް ސާވިސް ވަނީ ޒަމާނީ ޚިދުމަތަކަށް ބަދަލުވެފައި ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ މޯލްޑިވްސް ކަރެކްޝަނަލް ސަރވިސްގެ 50 ވަނަ އަހަރީ ދުވަހުގެ ތަހުނިޔާ ދަންނަވައި ފޮނުއްވި ވީޑިއޯ މެސެޖެއްގައެވެ.

މިނިސްޓަރ އިމްރާން ވިދާޅުވީ ކުށްވެރިން ބެލެހެއްޓުމުގެ ނިޒާމަށް މިއަދު ވަނީ ވަރަށް ހެޔޮ ބަދަލުތަކެއް ގެނެވިފައި ކަމަށެވެ. ހެޔޮގޮތުގައި އެމީހުން އަނބުރާ މުޖުތަމައަށް ނެރުމަށް ގިނަ މަސައްކަތްތަކެއް ކުރާކަން ފާހަގަކުރައްވައި މިނިސްޓަރު ވިދާޅުވީ މިއަދު ކަރެކްޝަނަލް ސާވިސްއިން ހަމައެކަނި ކުރަނީ ކުށްވެރިން ރިހެބިލިޓޭޓް ކުރުމުގެ މަސައްކަތެއް ނޫން ކަމަށެވެ. އެމީހުންނަށް އިތުރު ހުނަރުތައް ދަސްކޮށްދީ މުޖުތަމައަށް ފައިދާތަކެއް ކުރާނެ ފަދަ ބަޔަކަށް ހެދުމަށް މަސައްކަތްކުރާ ކަމަށް މިނިސްޓަރު ވިދާޅުވިއެވެ.

ކުށްވެރިން އަނބުރާ މުޖުތަމައަށް ނެރުމަށް ސަރުކާރުންނާއި، ކަރެކްޝަނަލް ސާވިސްއިން ކުރަމުންދާ ބުރަ މަސައްކަތްތައް މިނިސްޓަރު ވަނީ ފާހަގަކުރައްވާފައެވެ.

މީގެ އިތުރުން މުޖުތަމަޢުއެއް ކުށާއި ނުރައްކަލުން ސަލާމަތްކުރުމަށްޓަކައި އަބަދުވެސް މުހިންމު ޒިންމާތަކެއް އަދާކުރަންޖެހޭ ފަރާތްތަކެއް ވާކަމަށް މިނިސްޓަރު ިއމްރާން ވިދާޅުވިއެވެ. މިގޮތުން ކަރެކްޝަނަލް ސާވިސްއިން ރައްޔިތުންނަށް ފޯރުކޮށްދެމުން އަންނަ ޚިދުމަތަކީ ރައްޔިތުންގެ ސަލާމަތާއި ރައްކާތެރިކަމަށް ވަރަށް މުހިންމު ޚިދުމަތެއް ކަމަށް އިމްރާން ވިދާޅުވިއެވެ. އަދި މި މުޖުތަމައަކީ އަމާން ތަނަކަށް ހެދުމަށް މުޖުތަމައުގެ އެންމެން ވެސް އެކުވެގެން މަސައްކަތްކުރަންޖެހޭކަން މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.