އެމްޕީއެލްގެ މުވައްޒަފުންނަށް އަންނަ އަހަރުގެ ކުރީކޮޅު ފްލެޓް ލިބޭނެ: އެމްޕީއެލްގެ އެމްޑީ
ކޮވިޑާއި ގުޅިގެން ފްލެޓުގެ މަސައްކަތް ލަސްވި
އެމްޕީއެލްގެ މެނޭޖިންގ ޑިރެކްޓަރ ޝާހިދު އަލީ
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މުވައްޒަފުންނަށް އަންނަ އަހަރުގެ ކުރީކޮޅު ފްލެޓް ލިބޭނެ ކަމަށް އެކުންފުނީގެ މެނޭޖިން ޑިރެކްޓަރު ޝާހިދު އަލީ ވިދާޅުވެއްޖެއެވެ.
އެމްޕީއެލްގެ 35 ވަނަ އަހަރީދުވަސް ފާހަގަ ކުރުމަށް ހުކުރު ދުވަހުގެރޭ ބޭއްވި ޚާއްސަ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ ކޮވިޑާއި ގުޅިގެން ފްލެޓުގެ މަސައްކަތް ލަސްވި ނަމަވެސް މިހާރު މަސައްކަތް ހަލުވި މިނެއްގައި ކުރިއަށްދާ ކަމަށެވެ.
ހިޔާ މަޝްރޫއުގެ ދަށުން ހުޅުމާލޭ ދެވަނަ ފިޔަވަހީގައި 15 ބުރީގެ 3 ޓަވަރު އިމާރާތް ކުރުމަށް ވަނީ ނިންމާފައެވެ. އެމްޕީއެލުން ދޫކުރާ ފްލެޓްތަކުގެ ޕްރޮޖެކްޓް އަގަކީ 566 މިލިއަން ރުފިޔާއެވެ. އެމްޕީއެލުން ބުނީ އެ ކުންފުނީގެ ފްލެޓްތައް ލިބޭ ދާއިމީ ލިސްޓުގައި ހިމެނޭ މުވައްޒަފުންނަށް ފްލެޓް ގަތުމަށް 3 ގޮތެއް އިޚުތިޔާރު ކުރެވޭނެ ކަމަށެވެ. ފުރަތަމަ ގޮތަކީ އެއްފަހަރާ ފްލެޓަށް ފައިސާ ދެއްކުމެވެ. އެގޮތް އިޚުތިޔާރު ކުރާ މުވައްޒަފުން، އެއްބަސްވުމުގައި ސޮއި ކުރާތާ 3 މަސް ދުވަހުގެ ތެރޭގައި ފައިސާ ދައްކަން ޖެހެއެވެ. މި މުވައްޒަފުންނަށް ފްލެޓުގެ ޖުމްލަ އަގުން 7 ޕަސަންޓުގެ ޑިސްކައުންޓެއް ލިބޭނެއެވެ.
ދެވަނަ ގޮތަކީ އެއްއަހަރަށް ބަހާލައިގެން ފައިސާ ދެއްކުމެވެ. މި ގޮތް އިޚުތިޔާރު ކުރާ މުވައްޒަފުން، ކަނޑައަޅާފައިވާ މުއްދަތުގައި 20 ޕަސަންޓް ފައިސާ ދައްކަން ޖެހެއެވެ. އެއަށްފަހު ބާކީވާ އަދަދު އެއް އަހަރުގެ މުއްދަތަކަށް ބަހާލައިގެން ދެއްކޭނެއެވެ.
ތިންވަނަ ގޮތަކީ ބޭންކު ނުވަތަ ފައިނޭންޝަލް އިންސްޓިޓިއުޓަކުން ލޯނު ހަމަޖެއްސުމެވެ. މިގޮތް އިޚުތިޔާރު ކުރާ މުވައްޒަފުންނަށް ބޭނުންވާ ލިޔެކިއުން ފުރިހަމަ ކުރުމަށް ކުންފުނީގެ ފަރާތުން އެހީތެރިކަން ދޭނެ ކަމަށް އެމްޕީއެލުން ބުނެއެވެ.
އެ ކުންފުނިން ވިއްކުމަށް ކަނޑައަޅާފައި ވަނީ 4 ކެޓަގަރީއަކުން 534 ފްލެޓެވެ. އެއީ 1 ކޮޓަރީގެ 204 ފްލެޓާއި 1+2 ކޮޓަރީގެ 330 ފްލެޓެވެ. 1 ކޮޓަރީގެ ޓައިޕް-އޭ ފްލެޓުތަކުގެ ބޮޑުމިނުގައި 454 އަކަފޫޓު ހުންނައިރު، އޭގެ އަގަކީ 800،000 ރުފިޔާއެވެ. 1 ކޮޓަރީގެ ޓައިޕް-ބީ ފްލެޓްތަކުގެ ބޮޑުމިނުގައި 471 އަކަފޫޓު ހުންނައިރު، 828،132 ރުފިޔާއެވެ.
1+2 ކޮޓަރީގެ ޓައިޕް-އޭ ފްލެޓްތަކުގެ ބޮޑުމިނުގައި 670 އަކަފޫޓު ހުންނައިރު، އޭގެ އަގަކީ 1،500،000 ރުފިޔާއެވެ. 1+2 ކޮޓަރީގެ ޓައިޕް-ބީ ފްލެޓްތަކުގެ ބޮޑުމިނުގައި 686 އަކަފޫޜު ހުންނައިރު، އޭގެ އަގަކީ 1،535،821 ރުފިޔާއެވެ.
