އުލިގަމު ކަސްޓަމްސް އިމާރާތް ރަސްމީކޮށް ހުޅުވައިފި
16 ސެޕްޓެމްބަރު 2021 | ބުރާސްފަތި 21:02އުލިގަމު ކަސްޓަމްސް އިމާރާތް ގާއިމުކުރުމަށް 5.6 މިލިއަން ރުފިޔާ ޚަރަދުކޮށްފައިވޭ
އުލިގަމު ކަސްޓަމްސް އޮފީސް ޑިފެންސް މިނިސްޓަރ ހުޅުއްވައިދެއްވަނީ
ހއ. އުލިގަމު ކަސްޓަމްސް އިމާރާތް ރަސްމީކޮށް ހުޅުވައިފިއެވެ.
މި އިމާރާތް ހުޅުވައިދެއްވީ އެކަމަށްޓަކައި ބޭއްވި ޚާއްސަ ރަސްމިއްޔާތެއްގައި މިނިސްޓަރ އޮފް ޑިފެންސް މާރިޔާ އަހުމަދުދީދީ އެވެ. މާރިޔާގެ އިތުރުން ކޮމިޝަނަރ ޖެނެރަލް އޮފް ކަސްޓަމްސް އަބްދު ﷲ ޝަރީފާއި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަބްދު ﷲ ޝަމާލާއި، އުލިގަމު ކައުންސިލްގެ ރައީސްގެ އިތުރުން ކައުންސިލްގެ މެމްބަރުން، އަދި އެމްއެންޑީއެފްގެ އިސް އޮފިސަރުންނާއި ކަސްޓަމްސްގެ އިސް ވެރިންނާއި އޮފިސަރުން ބައިވެރިވެ ވަޑައިގެންނެވިއެވެ.
އުލިގަމުގެ ކަސްޓްމަސް އިމާރާތް ހުޅުއްވައިދެއްވުމަށްފަހު މިނިސްޓަރ އޮފް ޑިފެންސް މާރިޔާ އަހުމަދުދީދީ ވަނީ އުލިގަމުގައި ބަނދަރުކުރާ ޔޮޓްފަހަރުން ނެގޭ ފީ ކުޑަކުރުމުގެ ނަތީޖާއެއްގެ ގޮތުން އުލިގަމަށް އަންނަ ޔޮޓް އިތުރުވެ ރަށަށް އެކިގޮތްގޮތުން ފައިދާ އާއި މަންފާ ކުރާކަން ފާހަގަކުރައްވާފައެވެ.
އުލިގަމު ބަނދަރު ފުޅާކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އިސްކަން ދެއްވާކަން ފާހަގަކުރައްވައި، މި ސަރުކާރުގެ ތަސައްވުރަކީ އެއްވެސް ތަފާތު ކުރުމެއްނެތި ރާއްޖޭގެ ހުރިހާ ރަށަކަށް ޕްރޮފެޝަނަލް ކަމާއެކު ރައްޔިތުންނާ ވީހާވެސް ގާތުން އަވަސް ޚިދުމަތެއް ފޯރުކޮށްދެއްވުން ކަމަށް ވިދާޅުވިއެވެ.
ރާއްޖެއަށް މަސްތުވާތަކެތި އެތެރެވުން ހުއްޓުވުމަށް ތެދުވެރިކަމާ އިޚްލާސްތެރިކަމާއެކީ ކަސްޓަމްސްގެ ހީވާގި އޮފިސަރުން ކުރައްވަމުން ގެންދަވާ މަސައްކަތްތައް ފާހަގަކުރައްވައި މިނިސްޓަރު ވަނީ އޮފިސަރުންނަށް ޝުކުރު އަދާކުރައްވާފައެވެ.
މި ރަސްމިއްޔާތުގައި ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ދެއްކެވި ވާހަކަފުޅުގައި، އަލަށް ގާއިމުކުރެވުނު މި އިމާރާތުގެ މަސައްކަތް މައިގަނޑުގޮތެއްގައި އަމާޒުކުރައްވާނީ އުލިގަމުގައި ބަނދަރުކުރާ ޔޮޓްފަހަރަށް ލުއިފަސޭހަކަމާއެކު އެކިއެކި ޚިދުމަތްތައް ފޯރުކޮށްދިނުމުގެ އިތުރުން، މުސްތަގުބަލްގައި މިސަރަހައްދުގައި ބޮންޑެޑް ވެއަރހައުސްގެ ޚިދުމަތް ގާއިމުކޮށް ސަރަހައްދުގެ ރިސޯޓްތަކަށް މި ވެއަރހައުސްތަކުގެ ޚިދުމަތް ފުޅާކުރުމަށް ކަމަށްވެސް ވިދާޅުވިއެވެ.
އުލިގަމު ކަސްޓަމްސް އިމާރާތް ހުޅުވުމާއެކު، އުލިގަމުގައި ސަރުކާރުން ތަރައްގީ ކުރުމަށް ހަމަޖެހިފައިވާ ޔޮޓް މެރީނާ ގާއިމް ކުރުމަށް ކުރެވެމުންދާ މަސައްކަތް ކާމިޔާބުވުމަށް މަގުފަހިވެގެންދާނެކަމަށް ވެސް ވިދާޅުވިއެވެ.
ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމް ދެއްކެވި ވާހަކަފުޅުގައި، މިފަދަ ޚިދުމަތެއް އުލިގަމުގައި ފުޅާވެގެން ދިޔުމަކީ ރަށުގެ އިތުރުން މި ސަރަހައްދަށާއި ސަރަހައްދުން ބޭރަށް ސީދާގޮތުންނާއި ނުސީދާގޮތުން އެތައް ފައިދާއެއް ކުރާނެ މުހިއްމު ކަމެއް ކަމަށް ފާހަގަކުރެއްވިއެވެ.
އުލިގަމު ކަސްޓަމްސް އިމާރާތް ގާއިމުކުރުމަށް 5.6 މިލިއަން ރުފިޔާ ދައުލަތުގެ ބަޖެޓުން ޚަރަދުކޮށްފައިވާއިރު މި އިމާރާތުގެ މަސައްކަތް ނިންމައި ދީފައިވަނީ އެސްއޭ ކޮންސްޓްރަކްޝަނުންނެވެ.
