މާލޭގައި ކެފޭ އުސޫލުން މަސްތުވާތަކެތީގެ ވިޔަފާރުކުރާ ހުރިހާތަނެއް ބަންދު ކޮށްފިން - ސީޕީ ހަމީދު
ޝަރުއީ މަރުހަލާގައި ގޮންޖެހުން ތަކެއް އެބަހުރި
ކޮމިޝަނަރ އޮފް ޕޮލިސް - މުހައްމަދު ހަމީދު
މާލޭގައި ކެފޭ އުސޫލުން މަސްތުވާތަކެތީގެ ވިޔަފާރުކުރާ ހުރިހާތަނެއް އަންގާރަ ދުވަހުގެ ރެއާ ހަމައަށް ބަންދު ކޮށްފައިވާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
"ޗޭންޖް އެންޑީއޭ 2020 ޕެޓިޝަން"އާ ގުޅޭގޮތުން ރައްޔިތުންގެ މަޖިލީހުގެ ޕެޓިޝަން ކޮމިޓީގައި ވާހަކަ ދައްކަވަމުން ސީޕީ ވިދާޅުވީ، މަސްތުވާތަކެތީގެ މައްސަލަ ހައްލު ކުރުމަށް މަސައްކަތްތަކެއް ކުރަމުން އަންނަ ކަމަށެވެ. ސީޕީ ވިދަޅުވީ، ގާނޫނުން ލިބިފައިވާ ބާރު ބޭނުން ކުރުމަށް އިރުޝާދު ދެވިފައިވާނެ ކަމަށާއި، މަސްތުވާތަކެތީގެ މައްސަލަ ހައްލު ކުރުމަށް ކުރަމުން އަންނަ މަސައްކަތުގެ ތެރެއިން، މަސްތުވާތަކެތީގެ ވިޔަފާރިކޮށް މަސްތުވާތަކެތި ބޭނުންކުރާ 44 ތަނެއް މާލެއިން ފާހަގަކުރެވި، އެތަންތަން އަންގާރަ ދުވަހުގެ ރެއާ ހަމައަށް ބަންދު ކޮށްފައިވާނެ ކަމަށެވެ.
ސީޕީ ވިދާޅުވީ، މަސްތުވާތަކެތީގެ ވިޔަފާރި ކެފޭ އުސޫލުން ކުރަމުން އަންނަ ތަންތަނުގެ ވެރިންވެސް ގާނޫނުގެ ކުރިމައްޗަށް ގެނައުމަށް މަސައްކަތް ކުރަމުން އަންނަ ކަމަށާއި، މިހާރުވެސް އެކަކުގެ މައްޗަށް ދައުވާ އުފުލާފައިވާއިރު، އިތުރު 4 މީހެއްގެ މައްޗަށް ދައުވާ ކުރުމަށް ފޮނުވާފައިވާ ކަމަށެވެ. މަސްތުވާތަކެތީގެ ވިޔަފާރި ކުރަމުން އަންނަ ނެޓްވާރކްތައް ދެނެގަތުމަށް ކުރި މަސައްކަތުން 12 ނެޓްވާރކެއް ފާހަގަވެ ފިޔަވަޅު އެޅުމަށް ޝަރީއަތަށް ފޮނުވިފައިވާނެ ކަންވެސް ސީޕީ ފާހަގަ ކުރެއްވިއެވެ. މި ވިޔަފާރި ކުރަމުން އަންނަ މީހުންގެ މާލީ ތަހުގީގުތައް މިހާތަނަށް ކުރެވިފައި ނެތް އިރު، މިހާރު އެ ތަހުގީގުތައްވެސް ފަށައިގެން ކުރިއަށްދާ ކަމުގައި ވިދާޅުވިއެވެ.
ފުލުހުން އަތުލައިގެންފައިވާ މަސްތުވާތަކެތީގެ އެކި ބާވަތްތައް މިދިޔަ ޑިސެމްބަރުގެ ނިޔަލަށް ނައްތާލާފައިވާނެ ކަމަށް ވިދާޅުވިއެވެ.
މަސްތުވާތަކެތި ރާއްޖެއަށް އެތެރެވުމަށް ހުރި ދޮރުތައް މޮނިޓަރ ކުރުމަށްޓަކައި، ބޮޑީ ސްކޭނިން މެޝިނެއް ނެތުމުގެ ދަތިކަން ފާހަގަކުރައްވަމުން ހަމީދު ވިދާޅުވީ، ރާއްޖެއަށް އެތެރެވާން ނުޖެހޭ ވަރަށް ގިނަ އެއްޗެހި އެތެރެވެފައި އެބަހުރި ކަމަށެވެ. ހަމީދު ވިދާޅުވީ، 5 އަހަރުގެ ތެރޭގައި 8،937 މީހުން މަސްތުވާތަކެތީގެ މައްސަލަ ތަކުގައި ފުލުހުންގެ ހައްޔަރުކޮށްފައިވާ ކަމަށެވެ.
މަސްތުވާތަކެތި ރައްޖެ އެތެރެކޮށް ވިޔަފާރިކުރުން ހުއްޓުވުމަށް އެޅިފައިވާ ފިޔަވަޅުތައް މަދު ކަމަށާއި، މިދިޔަ އަހަރު ޓަނަކާ ގާތްކުރާ އަދަދަކަށް މަސްތުވާ ތަކެތި އަތުލައިގެންފައިވާކަމަަށް ވިދާޅުވިއެވެ. ހަމީދު ވިދާޅުވީ، މިހާރުވެސް މަސްތުވާތަކެއްޗާ ގުޅުންހުރި 20 މައްސަލައެއްގައި 89 މީހުންގެ މައްޗަށް އުފުލާފައިވާ ދައުވާތަކުގެ ޝަރީއަތް ކުރިއަށްދާ ކަމަށާއި އެއީ، 413 ކިލޯގެ މަސްތުވާތަކެތީގެ މައްސަލަ ކަމަށެވެ. ޝަރުއީ މަރުހަލާގައި ގޮންޖެހުން ތަކެއް އެބަހުރިކަން ފާހަގަ ކުރައްވަމުން ހަމީދު ވިދާޅުވީ، ޝަރީއަތްތައް ދިގުލައިގެންދާ ކަމަށެވެ.
މަސްތުވާތަކެތީގެ ވިޔަފާރިކުރާ މީހުންގެ ލިސްޓެއް އެކުލަވަން ކުރި މަސައްކަތުން އެފަދަ 3،348 މީހުން ދެނެގަނެވިފައިވާ ކަމަށްވެސް ވިދާޅުވިއެވެ.
