ޕޫޓިން އަމިއްލަފުޅަށް ކަރަންޓީނަށް!
ޕޫޓިން ވަނީ ރަޝިއާއިން ކޮވިޑަށް އުފެއްދި ވެކްސިން ކަމަށްވާ ސްޕަޓްނިކް ވީ ވެކްސިންގެ ދެ ޑޯޒު ފުރިހަމަ ކުރައްވާފައި
ރަޝިއާގެ ރައީސް ލަޑިމިއާ ޕޫޓިން
އަރިހުގައި މަސައްކަތްކުރި ބައެއް ފަރާތްތަކުން ކޮވިޑަށް ޕޮޒިޓިވްވުމުން ރަޝިއާގެ ރައީސް ލަޑިމިއާ ޕޫޓިން އަމިއްލަފުޅަށް ކަރަންޓީން ވެވަޑައިގެންފިއެވެ.
އަންގާރަ ދުވަހު ޕޫޓިން ވިދާޅުވީ އެމަނިކުފާނާއެކު މަސައްކަތް ކުރައްވާ ބައެއް ފަރާތްތަކުން ކޮވިޑަށް ޕޮޒިޓިވްވުމާއެކު އަމިއްލަފުޅަށް އެކަހެރިވުމަށް ނިންމާ ސެލްފް އައިސޮލޭޓް ވެވަޑައިގެންނެވީ ކަމަށެވެ.
ޕޫޓިން ވަނީ ރަޝިއާއިން ކޮވިޑަށް އުފެއްދި ވެކްސިން ކަމަށްވާ ސްޕަޓްނިކް ވީ ވެކްސިންގެ ދެ ޑޯޒު ފުރިހަމަ ކުރައްވާފައެވެ.
ރަޝިއާގެ މީޑިއާތަކުން ރިޕޯޓްކޮށްފައިވާ ގޮތުން ޕޫޓިން އަމިއްލަފުޅަށް ކަރަންޓީނުވެވަޑައިގެންނެވި ނަމަވެސް ބައްޔަށް ޕޮޒިޓިވްވެފައެއް ނުވެއެވެ. އަދި ޕޫޓީންގެ ހާލުކޮޅު ރަނގަޅުކަމަށް ރިޕޯޓްތައް ބުނެއެވެ.
އުމުރުފުޅުން 68 އަހަރުފުޅުގެ ޕޫޓިން ކަރަންޓީނުވެވަޑައިގެންނެވިއިރު، މި ހަފުތާގައި ޕޫޓިން ވަނީ ތަޖިކިސްތާނަށް ރަސްމީ ދަތުރުފުޅެއްގައި ވަޑައިގަތުމަށް ނިންމަވާފައެވެ. އަދި މިއީ އަފްޣާންގެ ހާލަތާއި ގުޅިގެން އެމަނިކުފާނު ކުރައްވަން ނިންމެވި ދަތުރުފުޅެއްކަމަށް ރިޕޯޓްތައް ބުނެއެވެ.
