"ގާސިމް ވިދާޅުވި ތިމަންނަ އައިސީޔޫގަ އޮއްވައޭ ހުކުމް ތަޅާލީ"
އިންސާފުގެ ވާހަކަ ދައްކަން ޔާމީނުގެ މިނިސްޓަރުން ލަދުގަންނަންޖެހޭ
ހަސަން ޒަރީރު
ރައީސް ޔާމީނުގެ ސަރުކާރުގެ މިނިސްޓަރުކަން ކުރި މީހުން މިއަދު ދިވެހި ރައްޔިތުންނަށް އިންސާފު ހޯދައިދޭ ވާހަކަ ދައްކާއިރު ޖުމްހޫރީޕާޓީގެ ލީޑަރު ގާސިމް އިބުރާހިމް ބަލިވެގެން އައިސީޔޫގައި ފަރުވާ ހޯއްދެވި ދުވަސްތަކެއްގައި އޭނާގެ މައްޗަށް ކޯޓުން ހުކުމް ކުރި މައްސަލަ ހަނދާނަށް ގެންނަން ޖެހޭ ކަމަށް ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު ވިދާޅުވެއްޖެއެވެ. ޒަރީރު މިގޮތަށް ވިދާޅުވީ ހުޅުމާލެ ޖަލުގައި ގައިދީއަކު ކުއްލި ގޮތަކަށް ނިޔާވުމާ ގުޅިގެން މަޖިލީހަށް ކުއްލި މައްސަލައެއް މަޑުއްވަރީ ދާއިރާގެ މެމްބަރު އާދަމް ޝަރީފް ހުށަހެޅުއްވުމުން އެމައްސަލައަށް ބަހުސް ކުރައްވަމުންނެވެ.
ޒަރީރު ވިދާޅުވީ މިއަދު މަޖިލީހުގެ މެމްބަރެއްގެ ގޮތުގައި ހުންނެވި އޭރުގެ ރައީސް ޔާމީނުގެ ޑިފެންސް މިނިސްޓަރު އާދަމް ޝަރީފް ދިވެހި ރައްޔިތުންގެ މަރުގެ މައްސަލަތަކާ، އިންސާފު ބޭނުންވާ މައްސަލަތައް މަޖިލީހުގެ ތަޅުމުގައި ސިޔާސީ ކޮށްފިކަމަށެވެ.
ޒަރީރު ވިދާޅުވީ މަޑުއްވަރީ ދާއިރާގެ މެމްބަރު އާދަމް ޝަރީފަކީ އޭނާގެ މިނިސްޓަރުކަމުގައި ބާރާއެކީ ސިފައިން ބޭނުން ކުރައްވައިގެން މަޖިލީހުން މަޖިލީހުގެ މެމްބަރުން ނެރެ "އުކާލެއްވި" މިނިސްޓަރު ކަމަށެވެ. އެ ހަނދާން އެބަހުރި ކަމަށް ޒަރީރު ވިދާޅުވިއެވެ. އޭނާ ވިދާޅުވީ އޭރު ހިއުމަންރައިޓް ކޮމިޝަން ފަދަ މިނިވަން މުސްތަގިއްލު ކޮމިޝަންތަކަށް އެއްޗެއް ބުނުމުގެ ބާރު ވެސް ނެތް ކަމަށާ، ކޮމިޝަނުގައި ތިއްބަވައިގެން އެއްޗެއް ބުނެފި މެމްބަރެއްގެ މަގާމު ގެއްލުވާލާ ކަމަށެވެ.
ރާއްޖެއަށް ގަވައިދާ ހިލާފަށް ބިދޭސީން އެތެރެކޮށް، އެމީހުން އެތެރެކޮށްގެން ލިބުނު ފައިސާއިން ރައީސް ޔާމީނުގެ ސަރުކާރުގައި މާލެއިން ބިންގަނެގެން ވިޔަފާރިކުރި މީހުން ތިބި ކަމުގެ ތުހުމަތު ޒަރީރު ކުރެއްވިއެވެ. އަދި ވިސާނެތް އެތައް ބަންގްލަދޭސް ރައްޔިތުން މާލޭގެ މަގުތަކަށް ރައީސް ޔާމީނުގެ ސަރުކާރުން ދޫކޮށްލައިފައިވާ ކަމަށް ޒަރީރު ވިދާޅުވިއެވެ.
