ޑިސްކަވަރީ ޗެނަލްގެ ރިއަލިޓީ ޝޯވް ''އިން ޓު ދަ ވައިލްޑް ވިތް ބެއާރ ގްރީލްސް'' ސީޒަން 2 ގެ އެޕިސޯޑެއްގެ ޝޫޓިން، ވ.އަތޮޅު ޝިޕްރެކް ސަރަހައްދުގައި ކުރިއަށް ގެންދިއުމުގެ ހުއްދަ ފެލިދެއަތޮޅު ކައުންސިލްގެ އިދާރާއިން ދީފިއެވެ.
ފެލިދެއަތޮޅު ކައުންސިލުން ބުނީ ޑިސްކަވަރީ ޗެނަލްގެ ރިއަލިޓީ ޝޯވް ''އިން ޓު ދަ ވައިލްޑް ވިތް ބެއާރ ގްރީލްސް'' ސީޒަން 2 ގެ އެޕިސޯޑެއްގެ ޝޫޓިން، ވ.އަތޮޅު ޝިޕްރެކް ސަރަހައްދުގައި 17 ސެޕްޓެންބަރ 2021 ވާ ހުކުރު ދުވަހު ކުރިއަށް ގެންދިއުމަށް ހުއްދަ ދީފައިވާ ކަމަށެވެ.
އެހެންކަމުން އެދުވަހު ވ.އަތޮޅު ޝިޕްރެކް ސަރަހައްދު އެހެން މީހުން ބޭނުން ކުރުން މަނާވާނެ ކަމަށް ކައުންސިލުން ބުނެއެވެ. އަދި އެސަރަހައްދުގެ ސެކިއުރިޓީ ބެލެހެއްޓުމަށް ވ.އަތޮޅު ޕޮލިހުން ހަރަކަތްތެރިވާނެ ކަމަށް ބުނެފައިވެއެވެ.
މީގެ އިތުރުން ކައުންސިލުން ބުނީ މިފަދަ މަގުބޫލް ރިއަލިޓީ ޝޯވް ތައް ރާއްޖޭގައި ކުރިއަށް ގެންދިއުމުން ފަތުރުވެރިންނަށް އިތުރަށް ރާއްޖެ އިޝްތިހާރުވެ، ރާއްޖެއަށް އެކަމުގެ މަންފާތައް އެތައް ގުނައަކުން ކުރާނެ ކަމަށެވެ.
ރިޕޯޓުތައް ބުނާ ގޮތުން ރާއްޖޭގައި ކުރިއަށް ގެންދާ މި އެޕިސޯޑުން ބޮލީވުޑްގެ ފިލްމީތަރި އަޖޭ ދޭވްގަން ފެނިގެން ދާނެއެވެ.
މަޝްހޫރު ގިނަ ފަންނާނުންތަކެއް ބައިވެރިވަމުން އަންނަ މި ރިއަލިޓީ ޝޯއަކީ ގިނަ ބައެއްގެ ތަރުހީބު ލިބިފައިވާ މަގުބޫލް ޝޯވް އެކެވެ.
