ޖުމްހޫރީ ޕާޓީގެ ލީޑަރު ޤާސިމް އިބްރާހިމަށް ވަރަށް ބޮޑަށް އިޙުތިރާމު ކުރައްވާ ކަމަށާއި، ޖަޒުބާތުގައި ޖެހިވަޑައިގެން ހުންނަވައި ޤާސިމް ދައްކަވާ ވާހަކަތަކަށް ކޮމެންޓް ކުރައްވަން ބޭނުންވެވަޑައިނުގަންނަވާ ކަމަށް ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމް ވިދާޅުވެއްޖެއެވެ.
ނާޒިމްގެ އިތުރުން، ތިމަރަފުށީ ދާއިރާގެ މެމްބަރު އަބްދުﷲ ރިޔާޒު އައު ސިޔާސީ ޕާޓީއެއް އުފެއްދެވުމަށް ދާދި ފަހުން ޖޭޕީއާ ވަކިވެވަޑައިގެންފައިވާއިރު، ހޯމަ ދުވަހުގެރޭ ޖޭޕީން ބޭއްވި ނޫސްވެރިންގެ ބައްދަލުވުމެއްގައި ޤާސިމް ވަނީ އެ ދެބޭފުޅުންނަށް ވަރަށް ބޮޑަށް ފާޑު ވިދާޅުވެފައެވެ. ޤާސިމް ވަނީ އެ ދެބޭފުޅުން މަޖިލީހުގެ މެމްބަރު ކަމަށް ހޮވިވަޑައިގެންފައި ވަނީ ކޮންމެ ބޭފުޅަކަށް ފަސް މިލިއަން ރުފިޔާ ޚަރަދުކޮށްގެންކަން ފާހަގަކުރައްވައި، ޖުމްހޫރީ ޕާޓީއަށް އެ ދެ ބޭފުޅުން އައީ ރިޔާސީ ޓިކެޓްގެ ބޭނުމުގައި ކަމަށް ވުން އެކަށީގެންވާކަމަށް ވިދާޅުވެފައެވެ.
އެކަމާ ގުޅޭގޮތުން ރާއްޖެއެމްވީން ސުވާލު ކޮށްލުމުން ނާޒިމް ވިދާޅުވީ، ޤާސިމަކީ އަބަދުވެސް ވަރަށް އިޙުތިރާމް ކުރައްވާ ބޭފުޅެއް ކަމަށާއި، ޖަޒުބާތުގައި ޖެހިވަޑައިގެން ދައްކަވާ ވާހަކަތަކާމެދު އެއްޗެއް ވިދާޅުވާން ބޭނުންފުޅުނުވާ ކަމަށެވެ. އަދި ނާޒިމަކީ ކާކުކަން ރައްޔިތުންނަށް ރަނގަޅަށް އެނގޭނެކަމަށް އޭނާ ވިދާޅުވިއެވެ.
ދަނގެތީ ދާއިރާގެ މެންބަރު ނާޒިމާއި ތިމަރަފުށީ ދާއިރާގެ މެންބަރު ރިޔާޒު ވަނީ ޖުމްހޫރީ ޕާޓީން ވަކިވެވަޑައިގެން "މޯލްޑިވްސް ނެޝަނަލް ޕާޓީ"ގެ ނަމުގައި އައު ޕާޓީއެއް އުފައްދަވާފައެވެ. މިހާރު ކުރިއަށްދަނީ ޕާޓީއަށް މެމްބަރުން އިތުރުކުރުމުގެ މަސައްކަތެވެ. އަދި ކުރިއަށް އޮތް ރިޔާސީ އިންތިޚާބުގައި އެ ޕާޓީން ކެންޑިޑޭޓަކު ވާދަ ކުރައްވާނެކަން ވެސް ވަނީ އިއުލާނުކޮށްފައެވެ.
