ޝުމްބާ ހައްޔަރުކުރި މައްސަލައިގައި އިންސާފު ހޯދުމަށް އިންތިޤާލީ އިންސާފުގެ އޮފީހަށް

ސޯޝަލް މީޑިއާ އެކްޓިވިސްޓު އަޙުމަދު އަޝްރަފް (ޝުމްބާ) ރާއްޖެއިން ބޭރުގައި ހުއްޓާ ގާނޫނާ ޚިލާފަށް ހައްޔަރުކޮށްގެން ރާއްޖެ ގެނައި މައްސަލައިގައި އިންސާފު ހޯދައިދިނުމަށް އެދި އިންތިޤާލީ އިންސާފުގެ އޮފީހަށް ހުށަހަޅައިފިއެވެ.

2015 ވަނަ އަހަރު ކުރީގެ ރައީސް ޔާމީން ޢަބްދުލްޤައްޔޫމްގެ ސަރުކާރުގައި އޭނާ ހައްޔަރުކޮށްގެން ރާއްޖެ ގެނެސް، ބަންދުގައި ބަހައްޓައިގެން ޖިސްމާނީ އަދި ނަފްސާނީ އަނިޔާދިން މައްސަލަ ބަލައިދިނުމަށް އެދި އިންތިޤާލީ އިންސާފުގެ އޮފީހަށް ހުށަހަޅާފައިވާއިރު، ޝުމްބާގެ ފަރާތުން މި މައްސަލަ ހުށަހަޅާފައިވަނީ ގާނޫނީ ވަކީލު މުހުތާޒް މުޙުސިނެވެ.

އިންތިޤާލީ އިންސާފުގެ އޮފީހަށް ހުށަހެޅި މައްސަލައިގައި ވަނީ އޭނާގެ އިންސާނީ ހައްގުތަކާއި ކަރާމާތައް އަރައިގެންފައިވާތީ ޖިސްމާނީ ގޮތުންނާއި، ނަފްސާނީ ގޮތުން އޭނާއަށް އަނިޔާކުރި ފަރާތްތަކާއި އެކަމުގައި ބައިވެރިވެފައިވާ ކަމަށް ފާހަގަވެފައިވާ ފަރާތްތަކުގެ މައްޗަށް ޖިނާއީ ތަހުގީގެއް ހިންގައިދިނުމަށެވެ.

އެގޮތުން މި މައްސަލަ ރައްދުވާ ޖުމްލަ 11 ފަރާތެއް ހިމެނޭއިރު، މީގެ ތެރޭގައި ކުރީގެ ރައީސް ޔާމީން ޢަބްދުލްޤައްޔޫމާއި، ކުރީގެ ހޯމް މިނިސްޓަރ ޢުމަރު ނަޞީރާއި، ކުރީގެ ފޮރިން މިނިސްޓަރ ދުންޔާ މައުމޫނާއި، ދިވެހިރާއްޖެއިން ސްރީލަންކާއަށް ކަނޑައަޅުއްވާފައިވާ ސަފީރު ޒާހިޔާ ޒަރީރާއި، އޭރުގެ އެކްޓިން ކޮމިޝަނަރ އޮފް ޕޮލިސް އަޙުމަދު ޢަރީފާއި، ޢަބްދުﷲ ނަވާޒާއި، އަޙުމަދު ޤިޔާސްއާއި، މުޙައްމަދު ޙުޝާމާއި، އަޙުމަދު ޝިހާނާއި, ސްރީލަންކާގައި ހުންނަ ރާއްޖޭގެ އެމްބަސީގެ ފަސްޓް ސެކެޓްރީ ޙަސަން އާދަމާއި، ތިލަކަށް މި މައްސަލަ ރައްދުވެއެވެ.

ޝުމްބާ ހައްޔަރުކޮށްފައިވަނީ ލަންކާގައި ހުއްޓައެވެ. އެއީ ރައީސް ޔާމީން ދަތުރުކުރައްވަމުންދިޔަ ފިނިފެންމާ ލޯންޗުކޮޅުގައި އެއްޗެއް ގޮއްވާލި މައްސަލައިގައި، މިހަމަލާ ދިނުމުގައި ބައިވެރިވިކަމުގެ ތުހުމަތުގައެވެ. ޝުމްބާ ހައްޔަރުކޮށްގެން ގެނައީ ލަންކާ ސަރުކާރުގެ ގާނޫނުތަކާ ޚިލާފަށް ކަމަށް ގިނަ ބަޔަކު ގެންދަނީ ބުނަމުންނެވެ.