"ޝުމްބާ" ހައްޔަރު ކުރީ ރަނގަޅަށް ނޫން ކަމަށް ނިންމާ އޭނާގެ ކިބައިން ދައުލަތުން މަޢާފަށް އެދެން ޖެހޭ ކަމަށް ނިންމައިފި

އަހުމަދު އަޝްރަފް، ނުވަތަ"ޝުމްބާ ގޮންގ"، 2015 ވަނަ އަހަރު ލަންކާގައި ހުއްޓާ ހައްޔަރުކޮށް ރާއްޖެ ގެނައި މައްސަލަ ބަލައިދިނުމަށް އެދި އިންތިގާލީ އިންސާފުގެ އޮފީހަށް ހުށަހެޅި މައްސަލަ އޭނާ އާއި އެއްކޮޅަށް ނިމިއްޖެއެވެ.

ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި އެ މައްސަލަ ޝުމްބާ އާއި އެއްކޮޅަށް ނިމުނުކަން އަންގާރަ ދުވަހު އޭނާ އަށް ވަނީ އަންގާފައެވެ. އިންތިގާލީ އޮފީހަށް މި މައްސަލަ ހުށަހަޅާފައިވަނީ ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިން އެވެ. އެނގިފައިވާ ގޮތުން މި މައްސަލައިގައި އިންތިގާލީ އިންސާފުގެ އޮފީހުން ނިންމާފައި ވަނީ ޝުމްބާ ހައްޔަރުކޮށްފައި ވަނީ ރަނގަޅަށް ކަމަށް ނުވާތީ އޭނާގެ ކިބައިން ދައުލަތުން މަޢާފަށް އެދެން ޖެހޭ ކަަމަށެވެ. އަދި އޭނާ އަށް މާލީ ބަދަލެއް ދޭން ޖެހޭ ކަމަށް ވެސް ވަނީ ނިންމާފައެވެ.

ނަމަވެސް މާލީ ގޮތުން ދޭން ނިންމި ބަދަލުގެ ތަފްސީލް ވަނީ އަދި ލިބޭ ގޮތް ނުވެފައެވެ. އެ މައުލޫމާތާއި މައްސަލައިގެ އިތުރު ތަފްސީލްތައް އެނގޭނީ މައްސަލަ ނިމުނު ގޮތުގެ ތަފްސީލް ރިޕޯޓް ހާމަކުރުމުންނެވެ.

އެ މައްސަލަ ހުށަހަޅާފައި ވަނީ 2021 ވަނަ އަހަރު ސެޕްޓެމްބަރ މަހުގެ ތެރޭގައެވެ. ޝުމްބާ ރާއްޖެއިން ބޭރުގައި ހުއްޓާ ގާނޫނާއި ހިލާފަށް ހައްޔަރުކޮށް، ރާއްޖެ ގެނެސް ބަންދުގައި ބަހައްޓައިގެން ޖިސްމާނީ އަދި ނަފްސާނީ އަނިޔާދިން މައްސަލަ ބަލައިދިނުމަށް އޭނާގެ ފަރާތުން އިންތިގާލީ އިންސާފުގެ އޮފީހަށް ވަނީ ހުށަހަޅާފައެވެ. މި މައްސަލައިގައި ޝުމްބާ އެދިފައިވަނީ އޭނާގެ އިންސާނީ ހައްގުތަކާއި ކަރާމަތަށް އަރައިގަނެފައިވާތީ ޖިސްމާނީ ގޮތުންނާއި ނަފްސާނީ ގޮތުން އޭނާއަށް އަނިޔާ ކުރި މީހުންނާއި އެކަމުގައި ބައިވެރިވެފައިވާ ކަަމަށް ފާހަގަވެފައިވާ މީހުންގެ މައްޗަށް ޖިނާއީ ތަހުގީގެއް ހިންގާ ދައުވާކޮށްދިނުމަށެވެ.