ނިއުޔޯރކަށް އެނބުރި ވަޑައިގެން މިނިސްޓަރ ޝާހިދުގެ މަސައްކަތްޕުޅު ކުރިއަށް
9 ސެޕްޓެމްބަރު 2021 | ބުރާސްފަތި 18:07އިންޑިއާގެ އެކްސްޓަރނަލް އެފެއަރޒް މިނިސްޓްރީގެ ސްޓޭޓް މިނިސްޓަރ މިނާކްޝީ ލޭކީއާ ބައްދަލުކުރެއްވި
އދ.ގެ އާންމު މަޖިލީހުގެ އިންތިޚާބީ ރައީސް، މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު
އައި.ޕީ.ޔޫ.އިން އިންތިޒާމުކޮށްގެން ބޭއްވި ސްޕީކަރސް ކޮންފަރެންސްގައި ބައިވެރިވެވަޑައިގަތުމަށް އޮސްޓްރިއާގެ ވެރިރަށް ވިއެނާއަށް ކުރެއްވި ދަތުރުފުޅު ނިންމަވާލެއްވުމަށްފަހު އދ.ގެ އާންމު މަޖިލީހުގެ އިންތިޚާބީ ރައީސް އަދި މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު އެނބުރި ނިއުޔޯރކަށް ވަޑައިގެންފިއެވެ.
ނިއުޔޯރކަށް ވަޑައިގަތުމަށްފަހު، މިވަގުތު ނިއުޔޯރކްގައި ހުންނެވި އިންޑިއާގެ އެކްސްޓަރނަލް އެފެއަރޒް މިނިސްޓްރީގެ ސްޓޭޓް މިނިސްޓަރ މިނާކްޝީ ލޭކީއާ ބައްދަލުކުރައްވައި މަޝްވަރާކުރައްވާފައިވެއެވެ.
މީގެ އިތުރުން އދ.ގެ އާއްމު މަޖިލީހުގެ ރިޔާސަތުގައި ހުންނަވާ ދައުރުގައި، މިނިސްޓަރ ޝާހިދުގެ ތަރުޖަމާނެއްގެ ގޮތުގައި މޮނިކާ ގްރޭލީ ވަނީ ހަމަޖައްސަވާފައެވެ. މޮނިކާއަކީ މިވަގުތު ޔޫ.އެން ނިއުސްގެ ޕޯޗްގީޒް އެޑިޓަރެވެ. އަދި އޭނާ ވަނީ އާންމު މަޖިލީހުގެ 73 ވަނަ ސެޝަންގެ ރައީސާ މަރިއާ ފެރްނާންދާ އެސްޕިނޯސާގެ ތަރުޖަމާނުކަން 2018/2019ގައި ކުރައްވާފައެވެ.
މިނިސްޓަރ ޝާހިދު ރަސްމީކޮށް އދ.ގެ އާންމު މަޖިލީހުގެ ރިޔާސަތާ ހަވާލުވެވަޑައިގަންނަވާނީ 14 ސެޕްޓެމްބަރު ވާ އަންގާރަ ދުވަހުއެވެ.
