ގަދަ ހަތަރެއްގެ ރޭހުގައި ކްލަބް އީގަލްސް އޮންނަން ބޭނުންވާނަމަ ޔުނައިޓެޑް ވިކްޓްރީއާ ދެކޮޅަށް ކުޅޭ މެޗު މުހިންމު ކަމަށް އީގަލްސްގެ ކޯޗު އިހުސާން އަބްދުލް ޣަނީ (ސާންތި) ބުނެފި އެވެ.

މާލޭ ލީގުގައި މި ދެޓީމު ބައްދަލުކުރާ މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސާންތި ބުނީ ރަމަޟާން މަހުގެ ކުރިން ޔޫވީއާ ދެކޮޅަށް ކުޅޭ މެޗަކީ އީގަލްސްއަށް ވަރަށް މުހިންމު މެޗެއް ކަމަށާއި، ދެވަނަ ބުރުގެ ފެށުންވެސް ރަނގަޅު ކުރެވޭނީ އެ މެޗު ކާމިޔާބުކޮށްގެން ކަމަށެވެ. އެގޮތުން ސާންތި ބުނީ މިފަދަ މުހިންމު މެޗުތަކުގައި އަބަދުވެސް އީގަލްސް އިން ގޯސްތަކެއް ހަދާ ކަމަށާއި، އެހެންނަމަވެސް އޭނާ ބުނީ މި ޔޫވީ މެޗަށް ޓީމުގެ ކުޅުންތެރިން ބޭނުންވާވަރަށް ފިޓްކަމަށެވެ. މީގެއިތުރުން އެ މެޗުގައި އީގަލްސްއިން ތަފާތު ދައްކާނެކަމަށްވެސް އޭނާ ވަނީ ބުނެފައެވެ.

 ޔޫވީއާ ބެހޭ ގޮތުން ވާހަކަދައްކަމުން ސާންތި ބުނީ އީގަލްސް އަކީ އެއްވެސް އިރެއްގައި އިދިކޮޅަށް ނިކުންނަ ޓީމް އަންޑައެސްޓިމޭޓްކުރާނެ ޓީމެއް ނޫން ކަމަށާއި، އެގޮތުން މާލޭ ލީގުގައި ކުޅޭ 8 ޓީމަކީވެސް ބަލި ޓީމު ނޫންކަން އޭނާ ފާހަގަކުރި އެވެ.

ސާންތި ބުނީ ޔޫވީގެ ކޯޗުކަމާ ނަޒީހް ހަވާލުވިފަހުން އެޓީމު ރަނގަޅުވަމުން އަންނަ ކަމަށާއި، އެގޮތުން އެޓީމުވެސް މަސައްކަތްކުރާނީ އީގަލްސް މެޗު ކާމިޔާބުކޮށް ގަދަ ހަތަރަކަށް ވަނުމަށްކަމަށެވެ.

މީގެއިތުރުން ސާންތި ބުނީ ފުރަތަމަ ބުރެކޭ އެއްގޮތަށް ދެވަނަ ބުރުގައިވެސް އީގަލްސް އިން މަސައްކަތްކުރާނީ ގަދަ ހަތަރެއްގައި ހިމެނިގެން ނިންމާލުން ކަމަށެވެ. އެހެންނަމަވެސް އޭނާ ބުނީ ދެވަނަ ބުރު ފުރަތަމަ ބުރަށްވުރެ ވާދަވެރިވާނެ ކަމަށެވެ.

މަލޭ ލީގުގައި އީގަލްސް ހަތް މެޗު ކުޅެފައިވާއިރު، އެޓީމު ވަނީ މިހާތަނަށް 10 ޕޮއިންޓް ހޯދާފައެވެ. އީގަލްސް އޮތީ ޕޮއިންޓް ތާވަލުގެ ފަސްވަނައިގަ އެވެ. މާލޭ ލީގުގައި ޔޫވީ ހަތް މެޗު ކުޅެފައިވާއިރު، އެޓީމު މޮޅުވެފައިވަނީ އެންމެ މެޗަކުންނެވެ. ޔޫވީ އޮތީ ތިން ޕޮއިންޓާއެކު ޕޮއިންޓް ތާވަލުގެ ހަތްވަނައިގަ އެވެ.