ވަޒީފާ އަދާކުރާ މީހުންގެ ހައްގު ހިމާޔަތްކުރުމަށް އެމީހުންގެ ފަރާތުން ވަކާލާތު ކުރާނެ ނިޒާމެއް ގާއިމްކުރެވިފައިނުވޭ
ޖޮބް ސެންޓަރު ހުޅުވުމުގެ ރަސްމިއްޔާތުގެ ތެރެއިން،
މި އަހަރުގެ ތެރޭގައި ރައްޔިތުން މަޖިލީހަށް މަސައްކަތުގެ ދާއިރާގެ ރައްކާތެރިކަމާ ބެހޭ ބިލު ފޮނުވާނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ރ. އަލިފުށީގައި ޖޮބް ސެންޓަރުގެ ޚިދުމަތް އިފްތިތާހްކުރުމުގެ ރަސްމިއްޔާތުގައި މިނިސްޓަރު ފައްޔާޒު ވިދާޅުވީ މަސައްކަތުގެ ދާއިރާގެ ރައްކާތެރިކަމާބެހޭ ބިލަކީ ޒަމާންތަކެއް ވަންދެން މަޝްވަރާކުރެވިފައިވާ އަމަލީ މަސައްކަތް ކުރެވިފައިނުވާ ބިލެއް ކަމަށެވެ. މި އަހަރުގެ ތެރޭގައި ރައްޔިތުން މަޖިލީހަށް މަސައްކަތުގެ ދާއިރާގެ ރައްކާތެރިކަމާ ބެހޭ ބިލު ފޮނުވާނެކަން ފާހަގަކުރައްވައި މިނިސްޓަރު ފައްޔާޒު ވިދާޅުވީ ކުރިއަށް އޮތް ދެމަހުގެ ތެރޭގައި އެ މަސައްކަތް ކުރެވޭނެ ކަމަށެވެ.
ވަޒީފާ އަދާކުރާ މީހުންގެ ހައްގުތަކަށް އިޝާރާތްކުރައްވައި މިނިސްޓަރު ވިދާޅުވީ ވަޒީފާ އަދާކުރާ މީހުންގެ ހައްގު ހިމާޔަތްކުރުމަށް އެމީހުންގެ ފަރާތުން ވަކާލާތު ކުރާނެ ނިޒާމެއް ގާއިމްކުރެވިފައިވާ ކަމަށެވެ. އެގޮތުން ޓްރޭޑް ޔޫނިއަންތަކާ ބެހޭ ބިލެއް ފަރުމާ ކުރަމުންދާ ކަމަށާއި، ކުރިއަށް އޮތް ދެމަހެއްހާ ދުވަހުގެ ތެރޭގައި އާއްމުންގެ ޚިޔާލަށް ހުޅުވާލައި، މި އަހަރުގެ ތެރޭގައި މަޖިލީހަށް ފޮނުވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ރާއްޖޭގެ ވަޒީފާގެ ބާޒާރަށް ބޮޑެތި ބަދަލުތަކެއް ގެނެވޭ ކަމަށެވެ. އެއީ ވަރަށް ބޮޑެތި އިންގިލާބީ ބަދަލުތަކެއް ކަމަށާއި، އެބަދަލުތަކާއެކު ބައެއް ދަތި ކަންކަމާއި ކުރިމަތިވާނެ ކަމަށް މިނިސްޓަރު ވިދާޅުވިއެވެ. ނަމަވެސް ބައެއް ފައިދާތަކާއި މަންފާތައް ލިބޭނެ ކަމަށް މިނިސްޓަރު ވިދާޅުވިއެވެ. އަދި ރާއްޖޭގެ ވިޔަފާރީގެ މާހައުލަށް ބަދަލުތައް ގެންނަން ޖެހޭކަން މިނިސްޓަރު ފާހަގަކުރެއްވިއެވެ.
