ސްކޮޑުން ބާކީކުރީ އިންސާފުން ކަމަށް ގަބޫލެއް ނުކުރަން: ބަކާ

އަންނަ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތަށް ތައްޔާރުވުމުގެ ގޮތުން ގައުމީ ފުޓްބޯޅަ ޓީމުން ގަތަރުގައި ކޭމްޕުކުރާއިރު، އެ ކޭމްޕަށް އެކުލަވާލި ސްކޮޑުން ބާކީކޮށްފައި ވަނީ އިންސާފުން ކަމަށް ގަބޫލުނުކުރާ ކަމަށް ތަޖުރިބާކާރު މިޑްފީލްޑަރު މުޙައްމަދު އާރިފް (ބަކާ) ބުނެފިއެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވުމުގެ ގޮތުން މިދިޔަ އޯގަސްޓް މަހުގެ 26 ވަނަ ދުވަހު 34 ކުޅުންތެރިންގެ ޕްރިލިމިނަރީ ސްކޮޑަކާއެކު ގައުމީ ޓީމުން ފަރިތަކުރުންތައް ފެށިއިރު، އެ ސްކޮޑުގައި ބަކާ ހިމެނުނެވެ. އެކަމަކު ގަތަރު ކޭމްޕަށް އެކުލަވާލި ސްކޮޑުން ފަސް ކުޅުންތެރިއަކު ބާކީކުރިއިރު، ބަކާއަށްވެސް ފުރުސަތު ދީފައެއް ނުވެއެވެ.

"ރާއްޖެ.އެމްވީ" އަށް ދިން އިންޓަވިއުއެއްގައި ބަކާ ބުނީ ސްކޮޑުގައި ހިމެނޭ 30 ކުޅުންތެރިންގެ ތެރޭގައި އޭނާ ހިމެނިފައި ނުވަނީ ކޮންމެވެސް ނުފޫޒެއްގެ ސަބަބުން ކަމަށެވެ. އެހެން ނަމަވެސް އެ ނުފޫޒު އައިސްފައިވަނީ ކޮން ހިސާބުންކަން ބުނަން ބޭނުން ނުވާ ކަމަށާއި، 30 ކުޅުންތެރިންގެ ސްކޮޑުގައި ގަވާއިދުން ފަރިތަކުރުންތަކަށް ނާންނަ، އަދި މަދު މެޗުތަކެއް ކުޅުނު ކުޅުންތެރިން ހިމެނިފައިވުމުންވެސް އެކަން އެނގޭ ކަމަށް ބަކާ ބުންޏެވެ.

ގައުމީ ސްކޮޑުން ބަކާއަށް ފުރުސަތު ގެއްލުނުއިރު، އޭނާއަކީ ރާއްޖޭން މިހާތަނަށް ސާފް ޗެމްޕިއަންޝިޕް ކާމިޔާބުކުރި ދެ ފަހަރުވެސް ސްކޮޑުގައި ހިމެނުނު ކުޅުންތެރިއެކެވެ. ބަކާއަށް 2018 ވަނަ އަަހަރު ގައުމީ ޓީމުން ފުރުސަތު ދިނީ ދެ އަހަރުގެ މެދުކެނޑުމަކަށްފަހުއެވެ. އެއީ ގައުމީ ޓީމުގެ ކޯޗުކަމާ ޕީޓަ ސެގާޓް ހަވާލުވުމަށްފަހުއެވެ. އެކަމަކު ސެގާޓް ވަނީ 2019 ވަނަ އަހަރުގެ އޯގަސްޓް މަހު ފީފާ ވޯލްޑް ކަޕް ކޮލިފައިންގައި ގުއާމާ ދެކޮޅަށް ނެގި ސްކޮޑުން ބަކާ ބާކީކޮށްފައެވެ. ބަކާއަށް އަލުން ގައުމީ ޓީމުން ފުރުސަތު ދިނީ އެންމެ ފަހުން ޓީމާ ހަވާލުވެހުރި ނެދަލެންޑްސްގެ މާޓިން ކޫޕްމަންއެވެ.

އައިލެންޑް އެފްސީން 2004 ވަނަ އަހަރު ވިދާލި ބަކާ އަކީ ރާއްޖޭގައި އުފެދުނު އެންމެ މޮޅު މިޑްފީލްޑަރުންގެ ތެރޭގައި ހިމެނޭ އެކަކެވެ. އޭނާ ވަނީ ކުލަބު ކެރިއަރުގައި ޔުނައިޓެޑް ވިކްޓަރީ (ޔޫވީ) އާއި ކުލަބު އީގަލްސްގެ އިތުރުން ކުލަބު ވެލެންސިއާ އާއި، ވީބީ އައްޑޫ އެފްސީ އާއި، ނިއުރޭޑިއަންޓް ސްޕޯޓްސް ކުލަބާއި، ވިކްޓަރީ ސްޕޯޓްސް ކުލަބާއި، މާޒިޔާ ސްޕޯޓްސް އެންޑް ރެކްރިއޭޝަން އަދި ކުލަބު ގްރީން ސްޓްރީޓްސްއަށްވެސް ކުޅެފައެވެ. މީގެ އިތުރުން ބަކާ ވަނީ މިޔަންމާ ލީގުގައި ވާދަކުރި ކޭބީޒެޑަށްވެސް އެއް އަހަރު ކުޅެފައެވެ.

މި އަހަރުގެ ސާފް ޗެމްޕިއަންޝިޕް އަންނަ އޮކްޓޯބަރު މަހު ރާއްޖޭގައި ބާއްވާއިރު، އެ މުބާރާތަށް ތައްޔާރުވުމުގެ ގޮތުން އަންނަ ހުކުރު ދުވަހު ގައުމީ ޓީމުން ގަތަރަށް ފުރާނެއެވެ. އެ ގައުމުގައި ކޭމްޕުކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހުއެވެ.