މޫސުން އޮތް ގޮތުން ސަރވޭ ނިންމާލެވޭނެ ތާރީޚެއް ބުނަން ދަތި: އީޕީއޭ

މި ދުވަސްވަރު މޫސުން އޮތް ގޮތުން ސަރވޭގެ މަސައްކަތް ނިންމާލެވޭނެ ތާރިޚެއް ކަނޑައަޅަން ދަތިކަމަށް އެންވަޔަރަންމެޓަލް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.

ކ. ރަސްފަރި ފަރަށް އުރުނު ބޯޓުގެ ސަރވޭގެ މަސައްކަތާގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބުދެއްވަމުން އެންވަޔަރަންމެޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވީ, ބޯޓު ފުން ކުރެވުނު ދުވަހުން ފެށިގެން ހަދަންޖެހޭ ސަރވޭތަކުގެ މަސައްކަތް ކުރިއަށްދާކަމަށެވެ.

Advertisement

އެހެންނަމަވެސް މި މަސައްކަތް ކުރުމުގައި ގޮންޖެހުންތަކެއް ހުރިކަން ނަޢީމް ފާހަގަކުރެއްވިއެވެ. ވަކިން ޚާއްސަކޮށް މި ދުވަސްވަރު މޫސުން ހުރި ގޮތުން ސަރވޭކުރުމަށް ދަތިވާކަމަށް އޭނާ ވިދާޅުވިއެވެ. އެހެންކަމުން ސަރވޭ އެއްކޮށް ނިންމާލެވޭނެ ތާރީޚެއް ބުނަން ދަތިކަމަށްވެސް ނަޢީމް ވަނީ ވިދާޅުވެފައެވެ.

ޕެނަމާއަށް ނިސްބަތްވާ އެމްވީ ނޭވިއަސް އަމަރިލިސް ނަމަކަށް ކިޔާ އާގުބޯޓު ފަރަށް އަރާފައިވަނީ އޮގަސްޓު މަހުގެ 19 ވަނަ ދުވަހުއެވެ. އެ ދުވަހުން ފެށިގެން ބޯޓު ފުންކުރުމުގެ މަސައްކަތް ވަނީ ކުރިއަށްގެންގޮސްފައެވެ. ބޯޓު ފަރަށް އެރިތާ 10 ވަނަ ދުވަހު، މިދިޔަ މަހުގެ 29 ވަނަ ދުވަހު ވަނީ މި ބޯޓު ފުންކޮށްފައެވެ.

ކ. ރަސްފަރި ފަރަކީ ހިމާޔަތްކޮށްފައިވާ ފަރަކަށްވާތީ ބޯޓު ފުންކުރެވުނުހާ އަވަހަކަށް ފަރަށް ލިބުނު ގެއްލުން ބަލަން ސަރވޭތައް ފަށާނެ ކަމަށް އީޕީއޭ އިން ބުނެފައިވެއެވެ. ބޯޓު ފުންކުރެވުމުގެ ކުރިންވެސް, މަތިން ފަރަށް ލިބުނު ގެއްލުން ބަލާފައިވާކަމަށް އީޕީއޭއިން ބުނެފައިވެއެވެ. އަދި ފަރަށް ލިބުނު ގެއްލުން ބަލައި، ބޮޑު އަދަދަކުން ބޯޓުގެ ވެރިފަރާތް ޖޫރިމަނާ ކުރާނެ ކަމަށް އީޕީއޭއިން ބުނެފައިވެއެވެ. ސަރވޭގެ ކުރިން ބޯޓު ފުރަން އެދޭނަމަ ޑިޕޮޒިޓެއްގެ ގޮތުގައި 100 މިލިއަން ރުފިޔާ ނަގާނެ ކަމަށް އީޕީއޭއިން މީގެ ކުރިން ބުނެފައިވެއެވެ. ބޯޓު ފުރަން އެދިފައިވާކަމުގެ މައުލޫމާތެއް އަދި ލިބިފައެއް ނުވެއެވެ.

މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓީމުން ބުނެފައިވެއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. މި ބޯޓު ފަރަށް އެރީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ. އުޅަނދު ފަރަށް އެރުމުން ސަލާމަތްކުރުމަށް އުޅަނދުގެ ކެޕްޓަން ކުރަންޖެހޭ ކަންކަން ކޮށްފައިނުވާކަމަށާއި، މިފަދަ މައްސަލައެއް ދިމާވިކަން އަންގާފައިނުވާކަމާއި، އަދި ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން މިހާތަނަށް ހޯދުނު ހޯދުންތަކުން ދައްކާފައިވެއެވެ.

ބޯޓު އުރުނު ގޮތުން އެ ފަރަށް ވަރަށް ބޮޑު ގެއްލުމެއް ލިބިފައިވާނެ ކަމަށް އީޕީއޭއިން ވަނީ ލަފާކޮށްފައެވެ. އެހެންކަމުން ބޯޓު ފުރުވާލާނީ ފަރަށް ލިބުނީ ކިހާ ބޮޑު ގެއްލުމެއްތޯ ބަލައި، ބޯޓުގެ ވެރިފަރާތް ޖޫރިމަނާ ކުރުމަށްފަހުގައި ކަމަށް އީޕީއޭއިން ވަނީ ބުނެފައެވެ.