ބްރެޒިލާއި އާޖެންޓީނާގެ މެޗު ހުއްޓާލަން ޖެހުނު ކަންތައްތަކާ ދޭތެރޭ ފީފާއިން ކަންބޮޑުވޭ
7 ސެޕްޓެމްބަރު 2021 | އަންގާރަ 13:32މެޗު އަލުން ކުޅޭނެ ތާރީޚެއް ފީފާއިން މިހާތަނަށް އިއުލާންކޮށްފައެއް ނުވޭ
ބްރެޒިލާއި އާޖެންޓީނާ ބައްދަލުކުރި މެޗުގެ ތެރެއިން ސިއްހީ އޮފިޝަލުން ދަނޑުމަތީގައި
ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ބްރެޒިލާއި އާޖެންޓީނާ ބައްދަލުކުރި މެޗު ހުއްޓާލަން ޖެހުނު ކަންތައްތަކާ ދޭތެރޭ ކަންބޮޑުވާ ކަމަށް ދުނިޔޭގެ ފުޓްބޯޅައިގެ މައި އިދާރާ، ފީފާއިން ބުނެފިއެވެ.
މިދިޔަ އާދީއްތަ ދުވަހުގެރޭ ބްރެޒިލުގައި ކުޅުނު މި މެޗު ފެށިތާ ފަސް މިނެޓު ތެރޭ ފުލުހުންނާއެކު ސިއްހީ އޮފިޝަލުން ވަނީ ދަނޑަށް އަރައި މެޗު ހުއްޓުވާފައެވެ. އެ އޮފިޝަލުން ދަނޑަށް އެރީ މެޗަށް ނުކުތް އާޖެންޓީނާ ޓީމުގައި ބްރެޒިލުގެ ކަރަންޓީން އުސޫލާ ޚިލާފުވެފައިވާ ހަތަރު ކުޅުންތެރިއަކު ހިމެނުމުންނެވެ.
އެ ކުޅުންތެރިންނަކީ އިނގިރޭސި ޕްރިމިއާ ލީގުގެ ޓޮޓެންހަމް ހޮޓްސްޕާއަށް ކުޅެމުން އަންނަ ޖިއޮވާނީ ލޮ ސެލްސޯ އާއި، ކްރިސްޓިއަން ރޮމޭރޯ އަދި އެސްޓަން ވިލާގެ ގޯލްކީޕަރު އެމިލިއާނޯ މާޓީނޭޒް އަދި އެމީ ބުއެންޑީއާއެވެ. މީގެ ތެރެއިން ލޮ ސެލްސޯ އާއި، ރޮމޭރޯ އަދި މާޓީނޭޒް ވަނީ އާޖެންޓީނާގެ ފުރަތަމަ އެގާރައިގައި ހިމަނާފައެވެ.
ބްރެޒިލުން ކަނޑައަޅާފައިވާ ރެޑް ލިސްޓުގައި އިންގްލެންޑް ހިމެނޭއިރު، އިންގްލެންޑުން ދަތުރެއް ފަށައި 14 ދުވަސްނުވާ މީހަކު ބްރެޒިލަށް އައިސްފިނަމަ، އެ ގައުމުގައި ވަކި މުއްދަތެއްގެ ކަރަންޓީން ވާން ޖެހެއެވެ. އެހެންކަމުން ބްރެޒިލުގެ ސިއްހީ އޮފިޝަލުން ވަނީ އާޖެންޓީނާގެ ހަތަރު ކުޅުންތެރިން ބްރެޒިލުގެ ސިއްހީ ގަވާއިދުތަކާ ޚިލާފުވި ކަމަށް ނިންމާފައެވެ.
ސިއްހީ އޮފިޝަލުން ދަނޑަށް އަރައި މެޗު ހުއްޓުވިއިރު، ކަރަންޓީނާ އުސޫލާ ޚިލާފުވި ކުޅުންތެރިން ޓީމާ އެކަހެރިކޮށް، އާޖެންޓީނާ މުޅި ޓީމު ވަނީ ދަނޑުން ފާބާފައެވެ. އަދި އެއަށްފަހު މެޗު ކުރިއަށްގެންދެވޭތޯ ދެ ޓީމުގެ ކޯޗުންނާއި އޮފިޝަލުން މަޝްވަރާކުރި ނަމަވެސް، ފަހުން ވަނީ މެޗު ސަސްޕެންޑުކުރަން ނިންމާފައެވެ.
މެޗު ސަސްޕެންޑުކުރިކަން ނިންމައި ދެކުނު އެމެރިކާގެ މައި ފުޓްބޯޅަ އިދާރާ ކޮންމެބޯލްއިން ނެރުނު ބަޔާނެއްގައި ބުނެފައިވަނީ އެ މެޗުގައި މި ހިނގާދިޔަ ކަންތައްތަކާ ބެހޭގޮތުން ފީފާގެ ޑިސިޕްލިނަރީ ކޮމިޓީއަށް މެޗު ކޮމިޝަނަރާއި ރެފުރީ ރިޕޯޓެއް ހުށަހަޅާނެ ކަމަށާއި، ދެން ކުރިއަށްދާނެ ގޮތެއް ނިންމާނީ އެ އިދާރާއިން ކަމަށެވެ.
އެއާއެކު ހޯމަ ދުވަހު ނެރުނު ބަޔާނެއްގައި ފީފާއިން ބުނެފައިވަނީ އެތައް މިލިޔަން ބަޔަކު ބަލަމުންދިޔަ ބްރެޒިލާއި އާޖެންޓީނާ ބައްދަލުކުރި މެޗު ހުއްޓާލަން ޖެހުނު ކަންތައްތަކާ ދޭތެރޭގައި ކަންބޮޑުވާ ކަމަށެވެ. އަދި މެޗު ރިޕޯޓު ފީފާއާ މިހާރު ހިއްސާކޮށްފައިވާ ކަމަށާއި، މެޗާ މެޗު ދެން އަމަލުކުރާނެ ގޮތެއް ނިންމާނީ ޑިސިޕްލިނަރީ ކޮމިޓީން ރަނގަޅަށް ދިރާސާކުރުމަށްފަހު ކަމަށްވެސް ވަނީ ބުނެފައެވެ. އެކަމަކު މި މެޗު އަލުން ކުޅޭނެ ވަކި ތާރީޚެއް ފީފާއިން އަދި މިހާތަނަށް އިއުލާންކޮށްފައެއް ނުވެއެވެ.
އާޖެންޓީނާގެ ފުޓްބޯޅަ އެސޯސިއޭޝަނުން ހާމަކޮށްފައިވާ ގޮތުން ބްރެޒިލުގެ ކަރަންޓީން އުސޫލާ ޚިލާފުވި ހަތަރު ކުޅުންތެރިން މިހާރު ވަނީ އެނބުރި އިންގްލެންޑަށް ދިޔުމަށް ނިންމާފައެވެ. އޭގެ ތެރެއިން މާޓިނޭޒާއި ބުއެންޑީއާ ނިންމާފައިވަނީ އިންގްލެންޑަށް އައުމުގެ ކުރިން ކްރޮއޭޝިއާގައި ވަކި މުއްދަތެއް ވަންދެން ތިބުމަށް ކަމަށް ރިޕޯޓުތައް ބުނެއެވެ. އެކަމަކު އިންގްލެންޑުގެ ކަރަންޓީނު އުސޫލުތަކާ ގުޅިގެން އެ ހަތަރު ކުޅުންތެރިންނަށްވެސް މި ހަފުތާ ބަންދުގައި ކުޅޭ އިނގިރޭސި ޕްރިމިއާ ލީގުގެ މެޗުތައް ގެއްލޭނެއެވެ.
މީގެ އިތުރުން ބްރެޒިލުގެ ފުލުހުންވެސް މިހާރު އަންނަނީ ކަރަންޓީން އުސޫލާ ޚިލާފުވި ހަތަރު ކުޅުންތެރިންގެ މައްސަލަ ބަލަމުންނެވެ. ރިޕޯޓުތައް ބުނާ ގޮތުން ބްރެޒިލުގެ ފުލުހުން އާޖެންޓީނާގެ އެ ހަތަރު ކުުޅުންތެރިންގެ މައްޗަށް ކުރާ ތުހުމަތަކީ މައުލޫމާތު އޮޅުވާލިކަމުގެ ތުހުމަތެވެ.
ބްރެޒިލަށް ދިޔަ އާޖެންޓީނާ ޓީމުގައި އިންގްލެންޑުން އައި ހަތަރު ކުޅުންތެރިއަކު ތިބި ނަމަވެސް، އެ މެޗާ ކުރިމަތިލި ބްރެޒިލް ޓީމުގައި އިންގްލެންޑުގައި ކުޅޭ ނުވަ ކުޅުންތެރިއަކު ހިމަނާފައެއް ނުވެއެވެ. އެކަމަކު އެ މެޗު ކުޅުމަށް ދެ ދުވަހެއް ކުރިން ވެނެޒުއޭލާއިން އާޖެންޓީނާ ޓީމު ބްރެޒިލަށް އައިސް، ސިއްހީ އުސޫލުތަކާ އެއްގޮތަށް ހޮޓަލެއްގައި ތިބިއިރު، މެޗު ކުޅެން ފެށި ފަހުން ސިއްހީ އޮފިޝަލުން މެޗު ހުއްޓުވުމުން އާޖެންޓީނާއިން ވަނީ މީގެ ކުރިން ކަންބޮޑުވުން ފާޅުކޮށްފައެވެ.
