މަސްތުވާތަކެތި ބޭނުންކުރާ މީހުންނަށް ފަރުވާދީ އަނބުރާ މުޖުތަމަޢަށް ނެރުމުގައި މުޅި ނިޒާމު ފެއިލްވެފައި - ޕެޓިޝަން ކޮމިޓީ
ޑްރަގް ކޯޓާއި އެކި މުއައްސަސާތައް ހުރިއިރު އެއްވެސް ކަމެއް ހައްލެއްނުވޭ
ޕެޓިޝަން ކޮމިޓީގެ ބައްދަލުވުމުގެ ތެރެއިން
މަސްތުވާތަކެތި ބޭނުންކުރާ މީހުންނަށް ފަރުވާދީ, އަނބުރާ މުޖުތަމައަށް ނެރުމުގައި މުޅި ނިޒާމު ފެއިލްވެފައިވާ ކަމަށް ޕެޓިޝަން ކޮމިޓީގެ މެމްބަރުން ބުނެފިއެވެ.
ކޮމިޓީގައި ހިމެނިވަޑައިގަންނަވާ އިހަވަންދޫ ދާއިރާގެ މެމްބަރު މުޙައްމަދު ޝިފާއު ވިދާޅުވީ، ރާއްޖޭގައި އޮތް އެންމެ ބޮޑު އިމަރޖެންސީއަކީ މިއީ ކަމަށް ކަނޑައަޅަން ޖެހޭ ކަމަށެވެ. ކަންކަން ހައްލު ނުކުރެވެނީ ގާނޫނެއް ނެތިގެން ކަމަށްވާނަމަ މިކަމާ ގުޅިގެން ގެންނަން ޖެހޭ އިސްލާހެއް އޮތްނަމަ މަޖިލީހަށް ހުށަހެޅުމުން ލަސްތަކެއްނުކޮށް އެ މަަސައްކަތް ކޮށްދެއްވާނެ ކަމުގެ ޔަގީންކަން ދެއްވާ ކަމަށެވެ. ޝިފާއު ވިދާޅުވީ، މެޑިކަލް އިމަރޖެންސީއެއް އިއުލާނުކޮށްގެން ނަމަވެސް މަސްތުވާތަކެތީގެ މައްސަލަ ހައްލު ކުރަންޖެހޭ ކަމަށެވެ.
ހޯރަފުށި ދާއިރާގެ މެމްބަރު އަޙުމަދު ސަލީމް ވިދާޅުވީ، ޑްރަގް ކޯޓާއި އެކި މުއައްސަސާތައް ހުރި އިރު އެއްވެސް ކަމެއް ހައްލު ނުވާ ކަމަށާއި، މިހާރު މިކަމަށް ހުށަހެޅެނީ ޒުވާނުން ކަމަށާއި، ޒުވާން ޖީލެއް ހަލާކުވެގެންދާއިރު، އެއް މުއައްސަސާ އަނެއް މުއައްސަސާގައި ހުރި މައްސަލަތައް ދެއްކުން ނޫން ކަމެއް ކުރާތަން ނުފެންނަ ކަމަށެވެ. ސަލީމް ވިދާޅުވީ، ނެތިގެން މި އުޅެނީ އިޚުލާސްތެރިކަން ކަމަށެވެ.
"ޗޭންޖް އެންޑީއޭ"ގެ ނަމުގައި ހުށަހަޅާފައިވާ ޕެޓިޝަންގައި އޮތީ އަސާސީ ހައްގުތައް ނުލިބޭތީ އެ ހައްގުތައް ކަށަވަރު ކުރެވޭނެ ގޮތެއް ހޯދައިދިނުމަށެވެ.
މި ބައްދަލުވުމުގައި ފުލުހުންގެ ފަރާތުން ބައިވެރިވެވަޑައިގެންނެވި ޑްރަގް އެންފޯރސްމެންޓް ޑިޕާޓްމެންޓްގެ ހެޑް އަޙުމަދު ޝާކިރު ވިދާޅުވީ މައްސަލައަކީ ހަމައެކަނި އެންޑީއޭގެ މައްސަލައެއް ނޫން ކަމަށެވެ. އަދި އެންޑީއޭގައި ބޭނުންވާ ވަސީލަތްތައް ހުރިނަމަވެސް ނެތީ ކެޕޭސިޓީ ކަމަށް ވިދާޅުވިއެވެ.
އެގޮތުން ޝާކިރު ވިދާޅުވީ މަސްތުވާތަކެއްޗާ ބެހޭ ގާނޫނުގެ 103 ވަނަ މާއްދާގެ ދަށުން، ފުރަތަމަ މަރުހަލާގައި މަސްތުވާތަކެތި ބޭނުންކުރާ މީހަކު މަގުމަތިން ދެނެގަނެވި، އެމީހަކަށް ފަރުވާ ދޭން ޖެހޭ ކަމަށް ފުލުހުންނަށް ފެނިއްޖެ ނަމަ، އެމީހަކު ކޯޓުން އަމުރެއްގެ ދަށުން ރިމާންޑު ޖަލެއްގައި ބަންދުކުރެވޭ ކަމަށެވެ. އެގޮތުން ގުޅީފަޅުގައި ރިމާންޑު ސެންޓަރު ހުޅުވިގެން ދިއުމާއެކު، ބަންދުގެ މުއްދަތު ޖަހަމުން އައީ ކްރިމިނަލް ކޯޓުން ކަމަށާއި، 12 އޮގަސްޓު 2021އާ ހަމައަށް 238 މީހަކަށް ކްރިމިނަލް ކޯޓުން މުއްދަތު ޖަހާފައިވާނެ ކަމަށެވެ. އަދި 12 އޮގަސްޓުގައި ކްރިމިނަލް ކޯޓުން، ރިމާންޑަށް މީހުން ބަންދުކުރުމަކީ އެ ކޯޓުގެ އިޚްތިޞާޞްގެ ތެރެއިންވާ ކަމެއް ނޫން ކަމަށް ނިންމާފައިވާ ކަމަށެވެ. އަދި ކްރިމިނަލް ކޯޓުން ބަންދު ޖެހުން ހުއްޓާލުމުން ދެން ދާންވީ ކޮންތަނަކަށްކަން ފުލުހުންނަށް މިއަދާ ހަމައަށްވެސް ސާފުނުވާ ކަމަށެވެ.
އަދި ގާނޫނުގެ ތެރެއިން ބައެއް ގޮންޖެހުންތައް ހުރިނަމަވެސް ގާނޫނުގައި މައްސަލައެއް ނެތް ކަމަށެވެ. އަދި މައްސަލައަކީ ގާނޫނު ތަރުތީބު ކުރެވިފައި އޮތް ގޮތަށް މަސައްކަތް ނުކުރެވުން ކަމަށް ވެސް އޭނާ ވިދާޅުވިއެވެ. ރިމާންޑް ސެންޓަރުގެ މަސައްކަތް އެކަށީގެންވާ ގޮތެއްގައި ނުކުރެވެނީ، މުޅި ނިޒާމުގައި މައްސަލަ ހުރުމުން ކަމަށެވެ.
ބިދޭސީންވެސް މަސްތުވާތަކެތީގެ މައްސަލަތަކުގައި ޝާމިލުވާ މިންވަރު އިތުރުކަން ފުލުހުން ފާހަގަކުރިއެވެ. ފުލުހުން ބުނީ، 2019 ވަނަ އަހަރު 2،366 މީހުން, އަދި 2020 ވަނަ އަހަރު 1،690 މީހުން މަސްތުވާތަކެތީގެ މައްސަލަަތަކުގައި ފުލުހުންގެ ބެލުުގެ ދަށަށް ގެންދެވިފައިވާ ކަަމަށެވެ.
މީޑިއާތަކަށް ހުޅުވާލައިގެން ކުރިއަށްގެންދިޔަ ޕެޓިޝަން ކޮމިޓީ ވަކި ހިސާބަކުންވަނީ ސިއްރު ކޮށްފައެވެ. ޕެޓިޝަނާ ގުޅިގެން ކަމާ ގުޅުންހުރި މުއައްސަސާތަކުގެ އިސް ބޭފުޅުން ކޮމިޓީއަށް ހާޒިރުކޮށްފައިވެއެވެ.
