ހެޔޮ ވެރިކަމެއް ނެތްނަމަ މިއަދު މިއޮތް ހާލަތުގައި ވެސް ރާއްޖެ ނޯންނާނެ - ސަލީމް
ކާބޯތަކެތީގެ ޔަގީންކަން ސަރުކާރުން ދެއްވި
އަހުމަދު ސަލީމް - ހޯރަފުށި ދާއިރާގެ ރައްޔިތުންގެ މަޖިލިސް މެމްބަރ
ހެޔޮ ވެރިކަމެއް ނެތްނަމަ މި ޕެންޑަމިކަށްފަހު ރާއްޖެ މިއޮތް ހާލަތުގައި ވެސް ނޯންނާނެ ކަމަށް ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ކާބޯތަކެތީގެ ރައްކާތެރިކަމުގެ ބިލަށް ބަހުސް ކުރައްވަމުން މެމްބަރު ސަލީމް ވިދާޅުވީ، ޕެންޑަމިކްގެ މިހާލަތުގައި ކާބޯތަކެއްޗަށް ދަތި ނުވެ މި ހިފަހައްޓާލެވުނީ ސަރުކާރުގެ ހަރުދަނާ ސިޔާސަތާއި، ބޭރު ދުނިޔެއިން ރާއްޖޭގެ އަދުގެ ސަރުކާރު ބަލައިގަންނާތީ ކަމަށެވެ. އޭގެ ނަތީޖާއަކަށްވެގެންދިޔައީ، ބަލިމަޑުކަމާއެކު ގައުމުތަކުގެ އެކްސްޕޯޓް މަޑުޖައްސާލާފައި އޮތް ދުވަސްވަރު ވެސް އެ ގައުމުތަކުން ރާއްޖެއަށް ބޭނުންވާ ތަކެތި ލިބިގެން ދިޔުން ކަމަށެވެ. ޕެންޑަމިކްގައި ވެސް ސަރުކާރުން ރައްޔިތުންނަށް ބޭނުންވާ ކާބޯތަކެތީގެ ޔަގީންކަން ފޯރުކޮށްދިން ކަމަށާއި، ކާޑުގެ ބާވަތްތަކުން ނަގަމުންދިޔަ ސަބްސިޑީ ކަނޑާނުލައި ކުރި މަސައްކަތަށް ސަރުކާރަށް އޭ ޕްލަސް ދޭން ޖެހޭ ކަމަށް ވިދާޅުވިއެވެ.
މެމްބަރު ވިދާޅުވީ، 2016 ވަނަ އަހަރު އިޤުތިޞާދު ވެސް ރަނގަަޅަށް އޮވެމެ ރައްޔިތުންގެ މަޖިލީހަށް ކުއްލި މައްސަލައެއް ވައްދައި، ކާޑަށް ދެމުންގެންދިޔަ ސަބްސިޑީ ކަނޑާލަން ނިންމި ކަމަށެވެ. އެ ނިންމުމާ އެއްކޮޅަށް ވަކާލާތު ކުރެއްވި، އޭރު އޮތް ސަރުކާރަށް ތާއީދުކުރާ މެމްބަރުން ވިދާޅުވަމުންގެންދެވީ އިޤުތިޞާދަށް ގެއްލުންވާ ގޮތަށް ސަރުކާރުން ކަންތައްތައް ނުކުރައްވާނެ ކަމަށެވެ. އެއާއެކު ތަކެތީގެ އަގު އުފުލި ކުލީގެ އަގު ބޮޑުވެގެން ދިޔަ ކަމަށެވެ. އެހެންނަމަވެސް ޕެންޑަމިކްގެ މި ހާލަތުގައި ވެސް ކާބޯތަކެތީގެ އަގު ހިފެހެއްޓި، ކާބޯތަކެތީގެ ޔަގީންކަން ސަރުކާރުން ދެއްވިކަން މެމްބަރު ސަލީމް ފާހަގަކުރެއްވިއެވެ. އެއާއެކު ފެންޑަމިކްގެ ސަބަބުން ރައްޔިތުންގެ ހިތުގައި އުފެދިފައި އޮތް ނުތަނަވަސް ކަމަށް ތަސައްލީއެއް ލިބިގެން ދިޔަކަމަށް ވިދާޅުވިއެވެ.
މިހާރު ރާއްޖޭގެ އެކި ކަންކޮޅުތަކުގައި 200ށްވުރެ ގިނަ ކާޑު އެޖެންޓުން އެބަތިބިކަން ވެސް މެމްބަރު ފާހަގަކުރެއްވިއެވެ.
ކާބޯތަކެތީގެ ރައްކާތެރިކަން ލިބުމަކީ އަސާސީ ހައްގަކަށްވާއިރު، ކާބޯތަކެތީގެ ރައްކާތެރިކަމުގެ ބިލަކީ ލާމަރުކަޒީ އުސޫލުން ގާނޫނު ތަންފީޒު ކުރެވޭ ގޮތަށް ވިސްނާފައި ތައްޔާރުކޮށްފައި އޮތް ބިލެއްކަމަށް މެމްބަރު ވިދާޅުވިއެވެ. މި ބިލު ގާނޫނަކަށް ވެގެން އަންނައިރު ހެދޭ ގަވާއިދު ތަކަކީ، އަމަލުކުރުން ފަސޭހަ ގަވާއިދުތަކަށް ވާންޖެހޭ ކަމަށް ވެސް މެމްބަރު ވިދާޅުވިއެވެ.
ސަރުކާރުން މިފަދަ ބިލެއް ހުށަހެޅުމުގެ ބޭނުމަކީ، ދިވެހިރާއްޖޭގައި އުފައްދާ އަދި ބޭނުންކުރާ ކާބޯތަކެއްޗާއި، ދިވެހިރާއްޖެއަށް އިމްޕޯޓުކުރާ އަދި ދިވެހިރާއްޖެއިން އެކްސްޕޯޓުކުރާ ކާބޯތަކެތީގެ ރައްކާތެރިކަމުގެ ފެންވަރުކަނޑައެޅުމާގުޅޭ އުސޫލުތައް ބަޔާންކުރުމާއި، ކާބޯތަކެތި އުފައްދައި، ގުދަންކޮށް، ތައްޔާރުކޮށް، ވިއްކާ ތަންތަނުގައި ކާބޯތަކެއްޗަކީ، އިންސާނުންނަށް ޞިއްޙީގޮތުން އެކަށީގެންވާ، ރައްކާތެރި ތަކެތި ކަމުގައި ހެދުމަށްޓަކައި ޢަމަލުކުރަންޖެހޭ އުސޫލުތަކާއި މިންގަނޑުތަކަށް ބޭނުންވާ ގާނޫނީ އޮނިގަނޑު ގާއިމުކުރުމެވެ.
