ޤާނޫނުގެ އަތުން އަންހެނުންގެ އަތުގައި ހިފައިގެން، މަޤާމުތަކަށް ގެންގޮސްދެވިއްޖެ - ރައީސް
އަންހެނުން ބާރުވެރިކުރުމުގަޔާއި، ކަންކަމުގައި އަންހެނުން ބައިވެރިވުމުގައި، އަދިވެސް ދަތިތަކަކާއި ހުރަސްތަކެއް އެބަހުރި
2020-2021 ވަނަ އަހަރުގެ ރެހެންދި އެވޯޑު ޙަވާލުކުރުމުގެ ގޮތުން ބޭއްވެވި ޚާއްޞަ ރަސްމިއްޔާތުގައި ރައީސް ވާހަކަފުޅުދައްކަވަނީ
ސިޔާސީ މައިދާނުން އަންހެނުންނަށް ފުރުޞަތު ހޯދައިދިނުމަށް އަޅުގަނޑުމެންނަށް ކުރެވުނު އެންމެ މުހިންމު އެއް ކަމަކީ، ޤާނޫނުގެ އަތުން އަންހެނުންގެ އަތުގައި ހިފައިގެން، މަޤާމުތަކަށް ގެންގޮސްދެއްވުން ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ 2020 އަދި 2021 ވަނަ އަހަރުގެ ރެހެންދި އެވޯޑު ދެއްވުމަށް ބޭއްވެވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ރާއްޖޭގެ ތާރީޚަށް ބަލާއިރު، ފާހަގަކޮށްލެވޭ އެތައް އަންހެނުންނެއްގެ އިޚްލާޞްތެރި ޚިދުމަތްތަކެއް ޤައުމަށް ލިބިފައި އެބަހުރި ކަމަށެވެ. ކެރޭ، ކުޅަދާނަ، ހީވާގި، މުރާލި، ހުނަރުވެރި ކިތަންމެ އަންހެނުންނެއް ފާހަގަވެ ފެންނަން އެބަތިއްބެވި ކަމަށާއި، މިއަދުގެ ޙާލަތަށް ބަލާއިރު، ވަޒީފާގެ މައިދާނުގަޔާއި، އާމްދަނީ ހޯދުމުގެ ދާއިރާގައި، ދެ ޖިންސުގެ ދެމެދުގައި ތަފާތުކުރުމެއް ނެތޭ ވިދާޅުވެވިދާނެ ކަމަށެވެ.
އެހެންނަމަވެސް، އަންހެނުން ބާރުވެރިކުރުމުގަޔާއި، ކަންކަމުގައި އަންހެނުން ބައިވެރިވުމުގައި، އަދިވެސް ދަތިތަކަކާއި ހުރަސްތަކެއް އެބަހުރިކަން ޤަބޫލުކުރަންޖެހޭ ކަން ފާހަގަކުރައްވައި ރައީސް ވިދާޅުވީ އޭގެ ނަތީޖާއަކަށް ވެފައި އޮންނަނީ، ޤައުމީ ތަރައްޤީގެ މުހިންމު ކަންކަމުގައި، އަދިވެސް އެކަށީގެންވާ މިންވަރަށް، އަންހެނުންނަށް ފުރުޞަތު ނުލިބުން ކަމަށެވެ.
ލާމަރުކަޒީ ޤާނޫނަށް ގެނައި އިޞްލާޙުގެ ބަދަލުގެ ނަތީޖާއަކަށްވީ، އެއްވެސް ރަށެއް، އެއްވެސް ސިޓީއެއް އިސްތިސްނާ ނުވެ، ކޮންމެ ކައުންސިލެއްގައި ވެސް މެންބަރުންގެ 33 އިންސައްތައަކީ، އަންހެނުން ކަމުގައި ވެގެންދިޔުން ކަމަށް ރައީސް ވިދާޅުވިއެވެ. އަދި މި ބަދަލާއެކު، ލޯކަލް ކައުންސިލް އިންތިޚާބުގައި، ޖުމްލަ 39.5 އިންސައްތަ ގޮނޑި އަންހެނުން ކާމިޔާބު ކޮށްފައިވާކަން ރައީސް ވިދާޅުވިއެވެ.
މީގެ އިތުރުން، ޤާނޫނީ ހައިސިއްޔަތު ލިބިގެން، އަދި މެންބަރުންނަށް ދައުލަތުގެ ބަޖެޓުން އުޖޫރަ ކަނޑައަޅައިގެން، ރާއްޖޭގައި އިންތިޚާބުކުރި ފުރަތަމަ އަންހެނުންގެ ކޮމިޓީތައް ވެސް އުފެދިގެން ދިޔައީ މި އަހަރުގެ ތެރޭގައި ކަމަށް ރައީސް ވިދާޅުވިއެވެ. ރައީސް ވިދާޅުވީ މި ބަދަލުތަކުގެ ސަބަބުން، ތަރައްޤީގެ ސިޔާސަތުތައް ކަނޑައެޅުމުގަޔާއި، ކަންކަން ނިންމުމުގައި، އަންހެނުންގެ ބައިވެރިވުން ޢަމަލީގޮތުން މިހާރު އިތުރުވެއްޖެ ކަމަށެވެ.
ރައީސް ވިދާޅުވީ ޤައުމު ބިނާކުރުމުގައި، މިހާރުވެސް އެންމެ މުހިންމު ދައުރެއް އަދާކުރާ ބަޔަކީ ދިވެހި އަންހެނުން ކަމަށެވެ. ސަބަބަކީ، ޤައުމުގެ ތަރައްޤީ އެބައެއްގެ އަތްމަތިން ބައްޓަންވެގެން އަންނަ ޤައުމުގެ ޒުވާން ޖީލަށް، އެންމެ ޅަފަތުން ފެށިގެން ވެސް ޢިލްމު އުނގަންނައިދިނުމުގައި، އެންމެ ގިނައީ އަންހެނުން ކަމަށްވާތީ ކަމަށެވެ. އަދި ރާއްޖޭގެ ތަޢުލީމީ ދާއިރާގައި ޚިދުމަތް ކުރައްވާ ގާތްގަނޑަކަށް 78 އިންސައްތައަކީ އަންހެން ބޭފުޅުން ކަމަށެވެ.
ކަންކަން ނިންމާ ފެންވަރުގައާއި ގޮތް ކިޔައި ބަސްބުނުމުގައި، އަންހެނުންނަށް އަދިވެސް ގޮންޖެހުންތަކެއް އެބަހުރިކަން ރައީސް ފާހަގަކުރެއްވިއެވެ. އަދި އެއީ މުޅި ދުނިޔޭގައި ވެސް ހުރި ގޮންޖެހުންތަކެއް ކަމަށާއި، އެއީ މުޖުތަމަޢުގައި އަންހެނުންނާއި ފިރިހެނުން އަދާކުރަންޖެހޭ ޒިންމާތަކާމެދު، ޒަމާނުއްސުރެ މުޖުތަމަޢުގައި ހުރި ވިސްނުންތަކާއި ޤަބޫލުކުރުންތަކުގެ ސަބަބުން ހުރި ގޮންޖެހުންތަކެއް ކަމަށް ރައީސް ވިދާޅުވިއެވެ.
ކޯވިޑުގެ ތެރޭގައި އިޤްތިޞާދީ ޙަރަކާތްތައް ހުއްޓި، ވަޒީފާތައް ގެއްލި، އެތައް ބަޔަކު ދެއަތް އުރާލައިގެން ގޭގައި ތިބެންޖެހުނު ވަގުތު، ޢާއިލާތަކުގެ ފުދުންތެރިކަން ހިފަހައްޓައިދިނުމުގައި، އަންހެނުން އަދާކުރީ ވަރަށް މުހިންމު ދައުރެއްކަން ރައީސް ފާހަގަކުރެއްވިއެވެ. އަދި ގޭގައި ތިބި އަންހެނުންނާއި އަންހެންކުދިން ކުރި މަސައްކަތުން، ދުވަހުގެ ޚަރަދުތައް ދެކޮޅުޖެއްސި ޢާއިލާތައް މަދެއް ނޫން ކަމަށް ވެސް ރައީސް ވިދާޅުވިއެވެ.
ކޮވިޑުގެ ބަލިމީހުންނަށް ފަރުވާކުރުމުގައި، ޢާއިލާތަކާ ވަކިން، ރެޔާއި ދުވާލުގެ ހުރިހާ ވަގުތެއް ހޭދަކުރެއްވި އަންހެން ބޭފުޅުން އަޅުގަނޑުމެންގެ ތެރޭގައި ވަރަށް ގިނަ ކަމަށާއި، އެބޭފުޅުން ޤައުމަށްޓަކައި އެ ވެވަޑައިގަތީ ވަރަށް މަތިވެރި ޤުރުބާނީއެއް ކަމަށް ރައީސް ވިދާޅުވިއެވެ. އަދި ކޮވިޑުން ރައްކާތެރިވުމަށް ހިންގާ ވެކްސިން ޕްރޮގްރާމްގައި ވެސް އަންހެން ބޭފުޅުންގެ ޙިއްޞާ ވަރަށް ބޮޑުކަން ރައީސް ފާހަަގަކުރެއްވިއެވެ.
މިފަދަ ޚިދުމަތްތެރި އަދި މިފަދަ އަގުހުރި ބަޔަކު، ޤައުމީ ޚިދުމަތުގެ ދާއިރާގައި ބައިވެރިވާ މިންވަރު އިތުރުނުކޮށް، އަޅުގަނޑުމެންނަށް ޙަޤީޤީ ކުރިއެރުމެއް ނުހޯދޭނެކަމަށް ރައީސް ވިދާޅުވިއެވެ. އަދި އަޅުގަނޑުމެން މިކުރާ މަސައްކަތުން، މާތް ﷲގެ ވާގިފުޅާއެކު، އެކަން ޙާޞިލުވާނެކަމުގެ ވަރަށް ބޮޑު އުންމީދެއް އަޅުގަނޑުގެ އެބައޮތް ކަމަށާއި، އެކަމަށް އިތުރު ހިތްވަރު ދިނުމަކީ ކުރަންޖެހޭ ކަމެއް ކަމަށް ރައީސް ވިދާޅުވިއެވެ.
ދިވެހި ދައުލަތުގެ ފަރާތުން ރެހެންދި އެވޯޑުގެ ނަމުގައި އެވޯޑެއް ދިނުމުގެ މަޤްޞަދަކީ، އަންހެނުން ކުރާ މަސައްކަތްތަކާއި، ޙާޞިލުކޮށްފައިވާ ކާމިޔާބީތަކުގެ އަގުވަޒަންކޮށް، ޤައުމީ ތަރައްޤީގައި އަންހެނުންގެ ބައިވެރިވުން އިތުރުކުރުމެވެ. އަދި މިންތީ ތަފާތުތައް ނައްތާލައި، ދެޖިންސުގެ ދެމެދުގައި ހަމަހަމަކަން ޤާއިމުކުރުމަށް މަސައްކަތްކުރާ، ވަކިވަކި ފަރުދުންނާއި، އަމިއްލަ ޖަމުޢިއްޔާ ޖަމާޢަތްތަކުގެ މަސައްކަތްތައް ބަލައިގަނެ، ޤައުމީ ފެންވަރެއްގައި އަގު ވަޒަންކުރުމަކީ ވެސް ރެހެންދި އެވޯޑް ދިނުމުގެ ވަރަށް ބޮޑު ބޭނުމެކެވެ.
